今朝早餐又係星乃咖啡，我打算每日都係食佢🤭 食完早餐就行去巴士站搵巴士搭去広島城，喺巴士總站嘅7號上車站等30或者70號巴士，都可以去到広島城！
搭到去合同廳舍前站落車，落車已經見到広島城喺遠處，步行前往，唔肯定個入口喺邊一面，行咗去最近嘅位置，應該係広島城嘅側邊，呢度有個公園入口，行過咗一段公園嘅路，先至去到広島城，日本好多呢種城，呢座睇落有點殘舊，可能長時間無翻新，入到去又係要買飛先，跟住逐層行上去參觀，每一層都擺咗一啲相關嘅歷史資料，不過呢座城冇乜嘢特別之處，可能對比大阪城或者熊本城都較為細，所以唔算特別多嘢睇，不過佢有一個位，放咗一頂古代武士帽，俾人用嚟影相，我都影咗兩幅，頂帽其實幾重，不過貪得意影下，呢度有間非常細嘅商店，基本上只有一個櫃檯，賣一啲紀念品，見到有啲日本以前嘅XX家族紀念品，喺出邊比較少見到，但係我對佢冇乜興趣，所以冇買到！參觀完行返出去，有間商店，買咗少少食物就走喇，出去嘅時候落雨！我行返去頭先落車嘅巴士站，因為嗰度有巴士去到Aeon mall 附近！
搭70號巴士去到祇園辦事處站，都要40分鐘車程，落咗車仲要行10多分鐘，沿路經過JR 衹園駅，一陣走嘅時候去呢個站搭火車！去到AEON Mall 先去食啲嘢，去咗一間和食処だいだい，叫咗個魚生飯，個賣相都幾靚，質素都OK，價錢都好平！食完嘢喺商場行咗陣，都冇乜嘢啱心水，又冇隱形眼鏡賣😔 咁就行去搭火車！
睇Google話仲有20分鐘先有火車，所以慢慢行，但係差唔多行到去火車站嘅時候見到有車埋站，就係咁樣Miss咗架火車，就要等返20分鐘🫠 呢個下衹園站好細，冇乜人搭車，所以上到車都好多位坐，我只係搭三個站，去咗一個叫做橫川駅站嘅地方，頭先搭巴士嘅時候經過見到呢度幾靚，所以落嚟影吓相順便轉車去outlet，因為呢度有巴士去outlet，要搭61號巴士，又係啱啱走咗架車要等成個鐘！如果頭先唔係Miss咗架火車就啱啱好😔 唯有附近行吓，見到呢度有個商場，不過個商場好細冇嘢好行，主要係得一間超市，附近亦都有一間藥妝店，又係好細，所以都冇乜嘢行，佢呢度有個電車總站，都幾靚，所以影吓相，再行去巴士站等車，準時有巴士埋站，由於outlet喺總站，佢中間仲要經過一個好似屋苑嘅地方，喺屋苑入邊兜來兜去，結果要50分鐘先去到outlet🫠
落車第一時間睇定回程嗰架車幾點有車，方便陣間走嘅時候預時間，雖然我諗住走嗰陣搭返61號出返橫川站，但我見架巴士嚟嗰陣冇停低載客就走咗，我都有啲擔心，不過見到有其他車，總有車可以離開，所以影低晒每架車嘅班次同埋上網再睇吓佢哋去邊！呢個outlet都真係好大，可能而家落雨，冇乜人行，整體感覺都係同其他日本嘅outlet差唔多，都係嗰啲商店，行左陣入去地庫行，唔使攞遮，地庫呢層主要都係食嘢，所以我買咗少少食物，再行多陣冇乜嘢啱就走！出到去見到啱啱有架巴士準備走，即刻追上去，咁啱巴士上有幾個外籍遊客，同司機溝通唔到，擾攘咗一輪，我先至啱啱好追到架巴士，而果幾個外籍遊客因為問司機幾多錢，司機唔明白溝通唔到，所以佢哋落咗車冇搭到，反而幫我可以追到架車！回程呢架巴士係直接返去廣島駅！而且唔使兜入去頭先嗰個屋苑，可以直接出返去市區！
返到去広島駅，去Minamoa 食晚飯，前兩日已經見到有一間食Soba ，係鋪滿咗青檸片嘅冷麵，經常喺網上見到人哋share啲相出嚟，但係從來未食過，所以一定要試吓佢，呢間叫做Yabusoba やぶそば，入到去只有三枱客，店入面有兩個卡位係靠窗嘅，有一個有人坐緊，店員叫我坐另一個，一個人霸咗個卡位唔係幾好意思，不過我諗佢都唔會有太多客，叫咗個青檸冷soba，配天婦羅蝦，通常呢啲食蕎麥麵嘅地方都係配天婦羅，不過我冇為意原來個天婦羅蝦係有飯底，不過都食到，因為原先只係唔想食咁飽，留肚去居酒屋食蠔，不過佢碗飯都唔係太大碗，所以都OK，個冷soba好清新，雖然青檸嘅香味唔係好出，但係終於都叫做試咗我想食嘅嘢，所以都好開心🤭
食完飯原本諗住喺商場行一陣，但係又夠鐘閂門，因為個商場收八點，呢幾日基本上都冇機會認真行過個商場，唯有行返去酒店對面間居酒屋再食嘢🤣 店名係瀨戶のさかなと牡蠣 魚燻，呢間居酒屋都幾爆場，滿晒座，剩返吧枱位冇人坐，佢亦都只有幾個吧枱位，咁我就包咗吧枱位呢個area🤣因為得我一個人坐Bar枱，店員好忙碌，俾咗張紙我嘟QR code落單，叫咗兩隻生蠔加兩隻燒蠔，叫咗杯Sake，店員攞杯sake 嚟嘅時候，話呢款Sake 賣剩嘅份量唔夠一杯，所以送俾我飲😅 咁我就唔客氣，生蠔冇尋日嗰間咁好食，當然佢個份量係細隻啲亦都係價錢平啲，燒蠔亦都係偏細隻，跟住叫多一個燒牛舌，另外再叫一杯飲品，牛舌唔算特別好食，因為佢係薄燒，食完晒嘢就走，過條馬路就返酒店，又去便利店兜咗個圈，跟住就返酒店休息，因為今日行咗好多路😅
沒有留言:
發佈留言