今朝又去星乃珈琲店食早餐！😆 食完早餐在Ekie 商場行吓順便搵吓間コメダ珈琲，今日陽光普照非常炎熱！呢個商場在火車站兩邊，星乃這邊，有松本清，樓上原來有Pokemon 專門店，D公仔都幾靚，不過唔係fans ，所以沒有購買，再行去旁邊的酒店，搵到間コメダ珈琲就在Via Inn 酒店樓下，之前有考慮過住呢間，因為近火車站和巴士站，在咖啡店見到想要買嘅花生，因為唔想孭住出街，所以唔買住，再行返去松本清，見佢對面有間賣串燒嘅舖頭好似幾好，不過只有外賣，睇吓有冇機會買返酒店食😄
跟住去返電車站，諗住去食Omakase ，尋日想訂位，但要比錢先，諗住睇吓 Walk in 有冇位，冇先至即場 book 明天，搭1號線去立町站，間壽司店在立町站同本通站之間，不過立町站就係搭少兩個站，在立町站行過去，大約4-5分鐘，呢間叫做鮨まつもと，據講在東京的分店是米芝連一星，所以試吓佢，去到店門口，店員問有冇訂枱，我話冇，佢叫我稍等，過一陣就話可以入坐，入到去係傳統壽司店格局，有十個位，另外有兩三間房，我入坐時未見有其他人客，可能11:30 剛開門吧！只有我一個客，叫了Omakase set 有前菜三款，壽司八貫，逸品係刺身，鱸魚丼、茶碗蒸、卷物、玉子、甜品，第一件壽司已經係大拖羅，非常之肥美，後面嘅壽司雖然佢有講係乜嘢魚，但係都講得唔係太清楚，😅 有個魷魚海膽唔錯，其他壽司唔算好特別，都算新鮮，個人覺得未係摘星嘅級數，個丼份量較少，大概只係比壽司嘅飯多少一倍😅，到我食完都未必見有其他客坐低，中間有一家三口講廣東話，想食蟹，因為呢度係一家壽司店和一家蟹店一齊做，但今日冇蟹，佢哋就係走左，所以全程之後我一個客包場🤣
繼續行街，呢度冇大囯藥妝店，有間叫Wants ，除咗松本清就係呢一間會係比較多分店！睇定啲藥妝，一陣臨走先至去買，行到去商店街，見到一間扭蛋機店，幫好友搵一款扭蛋，但係呢度冇，不過自己都扭咗幾個😅
由商店街行去原爆Dome，距離都好近，喺河邊見到一間意大利餐廳，個裝修都幾靚，唔知以為去咗意大利，而且放咗好多橙喺店外，因為佢主要賣鮮榨橙汁同埋Gelato，當然都有意大利餐食，我見好多人都係買橙汁，因為今日都好熱，我都幫襯咗一杯橙汁🍊見到河邊原來有船去宮島，不過就唔見有船，亦都唔見有人等，沿着河邊行，離遠已經見到原爆Dome，當然要行埋去影相啦！
過返去資料館嘅旁邊，有個平和の池同埋平和の燈，過咗呢個位置就係広島平和記念資料館，要買飛入場，入到去首先係一個投影屏幕，模擬原爆當時嘅情況，介紹咗好多事前呢個城市嘅本來面目，亦有原爆後，呢度點樣被夷為平地！睇到都幾感觸，戰爭帶嚟嘅禍害，真係希望唔好再有戰爭，再行入啲就係一啲相片同埋物品嘅展覽，大部份係當時原爆之後傷者嘅慘況，當時受爆炸洗禮之後嘅物件，好多傷者嘅情況都好嚴重，亦都有提過一啲傷者生還之後，佢哋嘅生活同埋影響！
睇完展覽原路行返出去，去咗SOGO行吓， SOGO旁邊有一個叫做廣島城門公園，地方好空曠，中間有一個空地，圍繞住都係一啲商店，大部份係兩層高嘅建築，不過見到呢度都好冷清，見冇乜人我就攞架細飛機出嚟放，飛咗兩三次，天色開始黑，所以就走喇！
搭返車返去廣島駅，諗住去BicCamera買隱形眼鏡，點知佢冇現貨，訂貨最快要三日，咁就趕唔切，所以冇訂到，但係幫屋企人買咗眼鏡噴霧，行返去Ekie 商場 ，上次見到有一間食生蠔嘅好似唔錯，特登過去食，嚟到第三日都未食過生蠔，只係食咗燒蠔，所以要試吓呢間得唔得，呢間叫做和久バル，除咗生蠔仲有其他熟食，不過我目標為本，佢嘅生蠔主要有三款，由細至大，分別係冲ノ島 Okinoshima 、岩かきヌーヴオー Iwakaki Nouveau 、かき小町Kaki Komachi，每樣叫一隻試吓先，另外飲品本來想飲香檳，但係佢要成支賣，最少都375ml 我覺得太多，所以叫咗杯sake，日本人食生蠔係配檸檬或者白蘭地，佢跟咗一小嚿檸檬，同埋一小支白蘭地，白蘭地係一滴滴咁倒出嚟，我覺得配白蘭地其實都幾夾，亦都可以帶到個鮮味出嚟，檸檬汁反而有少少鹹，所以我只會落一兩滴檸檬汁，再加兩三滴白蘭地，三款蠔都好新鮮，當然最大嗰隻係好食啲，因為細嗰兩隻真係好細隻，所以我再叫多兩隻大嘅🤭好好味，好滿足！
食完再喺附近行吓，去返尋晚見到嘅京鳥串燒店，買咗幾串串燒返酒店食，因為嗰度冇堂食只有外賣，返酒店嘅時候見到斜對面有間居酒屋，都係有生蠔食，聽晚就去試一試佢，返到酒店，食咗啲串燒先，串燒不過不失，可惜凍冰冰，如果熱熱地應該會好食啲😅
沒有留言:
發佈留言