萬發海鮮菜館

又到一年一度聖誕交換禮物嘅飯局，今日甩底王又甩底，又話腰痛，今次又去深水埗食，呢間飯店有幾個舖位，深水埗區好多呢類嘅小菜館都係咁樣嘅形式，呢間都好多人食，我哋都叫咗好多嘢食，開頭人未齊嘅時候，已經叫咗個滷水拼盤，原來都好大碟，跟住又叫咗蟶子王，每隻要$78 ，不過佢蒸得老咗，肉質有啲硬，叫咗爽滑魚皮、黑椒薯仔牛肉粒、蠔餅、椒鹽鮮魷、半隻霸王雞、半隻燒雞、薑蔥魚卜，食物整得都好夠火候，而且抵食夾大件👍🏻👍🏻

食完飯又係交換禮物嘅時候，每年都總有人搞事，買埋啲唔等使嘅嘢，今年有人買罐頭鮑魚，又有人買成箱零食，我就抽到個小型放濕機，之前抽到個香薰機，我好似成日都係抽到呢類型嘅嘢🤣🤣🤣