2024年5月英法自由行 Day 7 - (法國) 蒙馬特Montmartre、小丘廣場Place du Tertre、紅磨坊Moulin Rouge 、老佛爺 Galeries Lafayette 、巴黎歌劇院Palais Garner、羅浮宮外圍Museé du Louvre 、兩柱子之間Colonnes de Buren / Les Deux Plateaux、薇薇安拱廊街 Galerie Vivienne、皮諾私人美術館Bourse de Commerce

今日第一站去蒙馬特，我哋張週票今日可以開始用，如果去蒙馬特步行要26分鐘，搭地鐵只需要三個站去到 Château Rouge 站步行13分鐘，有週票就當然搭地鐵，呢13分鐘路程唔算好遠，不過要行樓梯，跟Google 路線行，其實係去咗蒙馬特果間聖心堂嘅後面，上完3段樓梯仲要行一段斜路，再行多一段樓梯先去到教堂後面，我哋行完頭嗰3段樓梯嘅時候，坐低休息吓，見到有個圍欄掛晒鎖，就好似之前鎖橋咁！

去到教堂先入去參觀吓，我哋去到教堂嘅時候先至9:00 ，所以教堂入面唔多人，教堂裏面好靚，亦都好莊重，我都有捐錢點咗支蠟燭🕯️，影完相就行返出去前面嘅廣場 Sqaure Louise Michel ，呢度有幾段樓梯，同埋一D草地，我記得上次嚟嘅時候呢度好多人坐咗喺草地，今日就少好多，同埋上次見到好多綁繩黨，今日就完全消失晒，我哋影咗一輪相之後行到落去商店街，就喺街口嗰間餐廳飲杯咖啡，原本想買個包，點知原來餐廳左邊間麵包店，同呢間餐廳係冇關係，所以我哋唯有淨係叫咗杯咖啡飲，價錢都要€10，都算幾貴！飲完咖啡我哋行去商店街睇吓手信，我就冇乜嘢睇啱，去返上次去過嗰間朱古力店，叫做做 Maison Georges Larnicol，上次嚟嘅時候成間店都好多人，今次竟然冇晒人，得我同好友兩個，我哋揀咗啲朱古力做手信，又買咗一啲我哋自己食！

買完朱古力，我哋行返去蒙馬特嘅纜車站，呢度係有架纜車上去聖心堂，雖然路程唔係好遠，但係都係斜路/樓梯，所以有啲人都會選擇搭纜車，我哋就冇搭纜車，我哋只係經過行去搵小丘廣場，呢個地方我都未去過，跟住地圖行過去，只需要幾分鐘，不過呢段路都係斜路居多，沿途經過一個 Photo Booth，係懷舊黑白相嗰隻，都有D人排隊等緊影相😄 去到小丘廣場呢邊好熱鬧，好多人，原來呢個小丘廣場入面有好多畫家幫人畫人像畫，亦都有好多手信店，我哋見到有個男人拉手風琴，琴上面仲有隻貓，吸引咗好多人圍觀同俾錢，我都睇咗一陣，俾錢分開兩個兜，一個比人一個比貓😆 我就俾咗貓貓，一路行到去廣場中心位置，呢個位係最多畫家嘅位置，我哋見到一個剪影師，好似迪士尼樂園入邊嗰啲剪影圖片咁，就係幫人即場剪佢側面嘅影子，我都剪咗一張，老實講就唔係咁似，不過貪得意玩吓！😆 跟住我哋四圍行吓，買咗鳥結糖做手信，又見到一間 Pierre Hermé ，又入去望吓，其實佢喺巴黎有好多分店，不過我唔係咁喜好macaron ，同埋我驚巴黎嗰D會好甜，所以冇買到！

行完一輪我哋就去搵嘢食，見到一間餐廳叫做 Restaurant Le Poulbot，係法式餐廳，我哋喺門口睇一睇個Menu，覺得都唔錯，所以就入去坐低食，我哋叫咗一個油封鴨腿，同埋牛扒，兩份食物都跟咗一啲沙律菜，大量薯條，麵包，所以都唔使叫其他嘢，我直程都冇食薯條，好友就食咗少少話飽，呢個鴨腿我覺得同尋晚食果個差唔多，牛扒冇乜牛味😅

食飽飯就去下一個景點紅磨坊，我哋只係諗住去門口影相，行過去12分鐘，去到門口見到佢嗰架風車冇咗，之前聽新聞有講過佢隔風車跌咗落嚟，諗住佢應該好快整返，但係都仲未整，門口係咁影幾張相就走，到此一遊！

跟住行去老佛爺，要17分鐘，呢間百貨公司好出名，我之前兩次都有去參觀，今次都唔例外，都要過去參觀一下😆 因為應該唔會有消費，純粹參觀🤣 去到老佛爺，入到去見到圓拱型天花，仍然係好靚，不過見佢起咗條玻璃行人道，伸出圓拱型天花嘅一半，俾人影相打，原本好友都想出去影相，但係要預約同埋排隊，所以我哋都冇去影，原先都想話喺旁邊間餐廳買杯嘢飲，順便坐低睇吓個圓拱型天花，不過餐廳都好多人等緊位，所以都冇得坐低飲嘢去欣賞佢，唯有圍住個商場行一個圈睇😆

睇完就行去巴黎歌劇院，唔使睇地圖，我都知個位置喺邊，因為好近，去到巴黎歌劇院，見到佢原來裝修緊，出邊亦都掘緊路，成個歌劇院都圍晒版，只係留返條樓梯🤦🏻‍♀️，我哋見到歌劇院側邊有間gelato 店，店名叫做Amorino，佢係將Gelato整到好似一朵花咁，之前在尖沙咀嘅羅布松食過，不過覺得呢度應該整得靚啲，都好多人排隊，我哋都想買來試吓，所以都照牌，其實入到舖頭係有一排自助購買機，好快可以落單，只係要等職員去切朵花出嚟，所以排喺店入面嘅人其實都已經俾晒錢，只係等攞雪糕，排外面果D未俾錢，所以都唔使急，因為俾咗錢都唔係咁快有得攞，排隊嘅期間都諗定要乜嘢味嘅雪糕，佢呢度有張海報，話自己D Gelato冇人造味道，Gelato主要有三款，一款係普通 cones ，另一款係有朱古力nuts 的cones ，同埋一款有macaron，我哋揀咗普通 cones ，gelato 有12 款味道，另外有六款sorbet ，我揀咗 lime & basil 、raspberry 同芒果味，唔要macaron 😂 頭先我哋排喺門口出面第三四個位，有排隊到攞得Gelato 只係17分鐘，都算好快，買完就過馬路去返巴黎歌劇院門口條樓梯坐低食，大部份人都係坐喺呢度食，gelato 好味！👍🏻👍🏻👍🏻  不過溶得比較快，因為製作亦已經用咗一啲時間，再要行過嚟，所以要快快脆脆食！我原先想去斜對面嗰間餐廳飲嘢，而家食咗雪糕就唔飲喇！

食完雪糕，我哋由巴黎歌劇院行去羅浮宮，一條直路行過去，我哋喺羅浮宮外的金字塔影相，我哋各自影咗差唔多半個鐘，就行去一個叫做兩柱子之間嘅地方，佢其實係一個廣場咁樣，有好多黑白間條嘅柱，可以企上去影相，附近有兩排好整齊嘅樹，影影下相突然間落雨，所以好快離開呢個位置😅

然後就去咗一個叫做薇薇安拱廊街 Galerie Vivienne，呢個係一個小商場，不過個佈置都幾靚，見到有啲餐廳同埋商店，不過好多商店都冇開，見到有一間賣玩具，我哋入去行咗個圈，都冇乜嘢啱，留喺商場度避吓雨 😛

跟住行去搵皮諾私人美術館，之前喺網上見到都有啲人介紹呢間美術館，我哋行幾分鐘就去到，不過去到先發覺原來要收費，見到價錢都唔貴， 大約港幣$120左右，不過好友覺得好似冇乜嘢睇，又嫌貴，所以最後都冇入到去！只係在門口影咗張相就走！

跟住就返去酒店附近搵嘢食，去咗車站對面嘅另一邊，見到Google嘅評分比較高嘅一間意大利餐廳 Pizzeria de Bari，就入去試吓，餐廳地方唔係好大，大概有10張枱左右，但係只有一個職員，計埋我哋只有三枱客，另外有兩個人等緊外賣，一個職員負責落單同埋煮嘢，我哋落單嗰陣時，個職員嘅態度麻麻地，我唔記得佢問我朋友乜嘢，總之佢聽唔到好友嘅回答，就好唔耐煩問多一次🫢我哋叫咗一個 ‎Buratta 蕃茄沙律，同一個Pizza ，老實講，佢呢度食物真係唔錯，難怪好似唔優做咁 😅 食完呢餐，就返酒店休息，雖然今日好多地方都係到此一遊，或者喺外圍影一影相，但係都行咗好多路，所以對腳都好攰又痛🥹