2024年2月大阪獨遊 Day 3 - 梅田

都有好幾年冇去梅田，近年多左自駕遊，去效區多左，而且印象中梅田係商場比較多，冇乜野街可以行，有都係食街，見咁耐冇去過，今次就去睇吓！

未去梅田之前，去一去Namba parks ，佢應該有個公園，想去睇吓有冇機會放吓飛機，去到見公園冇開 🤦🏻‍♀️ 

由難波出發，撘Metro 難波站御堂筋線去梅田站，行出去阪急百貨，去到阪急百貨，就落去地庫睇吓有咩手信賣，見到有一間係賣番薯片嘅counter，好多人排隊，而且有限量售賣，咁我又去排隊買吓，佢個番薯片有六種味道，每人限買六包，所以我就買咗六包🤣 雖然佢冇得試食，不過番薯片，類似薯片咁，只不過厚身D，相信唔會難食得去邊，而且咁多人買應該都唔差！（返去食過之後都覺得唔錯），跟住見到東京嘅 Tulip rose都有得賣，又買少少做手信！

買完手信就去食個lunch，之前上網見到有一間食鰻魚飯，個樣好似幾吸引，所以就去搵咗嗰間店，店名叫 Unagi Kushiyaki Idumo ，跟google 地圖去到唔啱，原來是在同層附近，要認住個門口個鰻字就搵到！而且通常有人排隊等位！呢間餐廳嘅座位安排係跟先後次序，即係話我雖然得一個人，但我前面有兩個人，即使只有一個位，都唔會俾我入，一定要我前面嗰兩個入座先，所以輪到我嘅時候，即使我只有一個人，而佢只有一張四人枱，佢都照比張四人枱我！而且日本係唔會搭枱，所以我可以坐得好舒服，我等咗差不多半個鐘先有位，等位嘅時候已經睇咗餐牌，一早揀咗鰻魚厚蛋飯，佢個飯🍚講明係750 g 😅太大碗了，所以改了半碗，當然價錢係冇得減，而且個賣相冇咁澎湃，不過真係唔想浪費，但係最終我都食唔晒，因為佢個飯比較硬，口感亦有啲怪怪地，而且份量太多，食完鰻魚同埋個蛋都差唔多飽，鰻魚好好味，係蒲燒嗰種，蛋唔算特別濃厚，不過不失！

食完飯行去商場嘅另一邊，發現原來呢度有間銀座篝拉麵 ！睇吓之後兩日有冇時間過嚟試一試！跟住上去近 Yodobashi-Umeda 個小廣場，之前喺YouTube睇過一條求婚片，就係呢個小廣場度做，當年條片入面果間餐廳，而家已經變咗Starbucks！就去買返杯咖啡飲，坐左一陣，又入返商場，去左Zoff 配眼鏡，半小時後可以取，在商場行吓，又買左 Enherb 的花茶！攞返眼鏡之後，就行咗過去隔離個商場，在大阪駅上蓋，呢度有個大水池，有個綠色公仔在水池中央，喺度坐一陣影吓相，又行返去Lucua ，買埋 Steam cream ，行埋超市，就返去難波，又返酒店放低野先！

今晚約左好友食燒肉，book 左 あぶりや國產牛燒肉，我早左到，坐在等位區等，等埋好友到咗之後，可以入坐了，呢度全部係卡位，今晚都好full booking ! 我地叫左普通燒肉放題，唔要包埋牛舌果款貴D嘅放題！因為之前試過，牛舌係薄切，味道麻麻地！所以唔要牛舌！我地叫左好多野食，因為好友一家都好有食力😂，食到最後甜品都清晒🍧食完就分道揚鏢，因為好友租咗車，所以佢哋住得比較遠，住喺大阪灣嗰邊，所以我哋都冇去行夜街就各自返去休息，然後話聽日如果時間夾到就大家再聚一聚！😏