2024年2月大阪獨遊 Day 2 - 環球影城

今朝一早起身去環球影城！搭阪神難波線，四個站去到西九条，𨍭 JR 櫻島線搭兩個𠵍到環球影城站！大約半小時到達，7:45 已經入緊場，排隊嘅人比上次少，都係差唔多時間，但上次八點先開始入，我排緊隊入場諗住㩒張飛QR code 出嚟，先發現我未買飛，只係放左入購物車未比錢，即刻比錢，要等確認！好彩好快確認到，未排到入口已經攪掂，即刻可以入場，拿拿聲去Mario 攞入場券先，掃完QR code hold 住左，搵職員幫手，話攪唔到可以去大白鯊果邊有個service counter 整，但要行返出去，跟住個App 又郁返，要掃樂園入場券 QR code 又唔知點解掃唔到🤦🏻‍♀️跟住用另一部手機影低個QR code ，再掃又得左！揀左12:20 入Mario ，其實應該揀晏D，因為未影過夜晚的Mario 之前兩次都係早上，不過今日落雨天陰，睇吓會唔會開燈🤣

未入得Mario 就先去Harry Potter ，先在湖邊影吓相，去埋廁所，先去排隊玩Harry Potter and the forbidden journey ，入口寫住等候時間60分鐘，8:42開始排，條人龍一路keep 住行，冇乜點停，大約廿分鐘 9:03 已經可以去 locker 放低野，然後入去現，但係到我準備上車時，突然停左，唔知咩事，等左陣先郁返，跟住要所有人落晒車之後，空車行一圈返嚟冇問題先開始比人玩，都攪左十幾分鐘，出嚟之後在shop 見到都出左D新野！好吸引！都係走果陣先買！出返嚟見條隊，排到去廁所出面😳要130分鐘，頭先停一停機，多左咁多人？ 可能晏左，開始多人去完Mario 攞飛後過嚟，見佢條隊唔郁，可能真係要排好耐！好彩頭先玩左先！

跟住行去今次目標，鬼滅之刃無限列車主題區！先搵禰豆子爆谷筒，話說當年疫情期間2021年，USJ 已做鬼滅主題，推出左襺豆子爆谷筒，但係當時飛唔到，當然香港梗會有得賣，當時炒到七百幾，但佢其實只賣¥5500，當時可能平D，但滙率高D，都係$300 以下，可能當年銷量比預期少，又或者想補返比外地客，依家佢再做，當然吸引到唔少人，我第一時間搵爆谷筒，冇乜人排隊買，佢仲跟埋Cherry 味爆谷，我就左要爆谷，因為唔太鐘意食 😅 另外仲有賣炭治郎同禰豆子 churros ，呢個就好多人排隊，以前我都鐘意食樂園嘅churros ，但依家覺得好甜，所以冇食！商店內的產品幾得意，不過我冇買，因為主要係公仔、服裝、頭箍等，我只係買左條毛巾😅 除左產品仲有食品，餐廳有炎柱煉獄杏壽郎美食，又去食吓先！餐牌得幾款食物，叫左牛肉咖喱飯同cheese cake 。食物味道真係麻麻地，不過樂園應該都唔會有好好食嘅餐廳🤣 鬼滅主題區有機動遊戲，上次嚟做多啦A夢主題果陣玩過，係過山車嚟，所以唔玩喇！

在商店行左一陣，行過去 Spiderman 果邊，見Spiderman 已經拆咗裝飾，𥚃面可能拆緊了！行到差唔多夠鐘就去Mario 區，去睇吓機動遊戲要排120分鐘便放棄了，因為2:00 巡遊，今次想睇巡遊！在Mario 園區幫好友買少少野，影吓相就走了！

出返去睇巡遊，巡遊表演有比卡超，Mario 等，不過時間好短，15分鐘左右就完了！睇完巡遊就去買野，見出面商店有Harry Potter 產品就冇入返去Harry Potter 園區買，後來先諗起我想買音樂盒，出面商店冇，所以忘記左買！見到商店開始有 Donkey Kong 產品推出，不過就好少，好友的兒子喜歡Donkey Kong ，原本想買T shirt 比佢，但得兩款 T shirt ，成人果件白色，小童果件綠色底，有Donkey Kong 同香蕉圖案，我驚小朋友唔鐘意青BB😅，而其他都係紙盒手信，最後買左鐵盒朱古力！買完野去退稅，時間尚早，所以冇乜人，夜晚係超多人的！退稅要扣手績費，實際退返5-6%，好過冇😂 退完稅就走了，都玩左七個鐘，經過呢兩次入嚟USJ ，感覺好攰好多人，短期內應該唔會去USJ 了🤦🏻‍♀️

出返難波，先返酒店放低野先！出去食晚飯，尋日在法善寺橫丁，見到間鰻魚店，今晚去會一會佢！店名叫法善寺山かづ，門口布簾大大個鰻字，店入面應該有樓上，見樓梯口有鞋架，應該係tatami，樓下兩個卡位加幾個圍住廚房的counter 枱，我一個人當然坐counter 位，好處係望到師傅料理過程！見佢地一次過燒嘅鰻魚份量都唔少！餐牌頭先在門口睇左，佢除左唔唔同份量嘅鰻魚飯，鰻魚蛋飯，仲有鰻魚伴三文魚籽飯或者鰻魚伴海膽飯 ，我就叫左 ひつまぶしset ，呢個set 一般都係將鰻魚切細件，然後有幾種食法，可以就咁食，或者加蔥同wasabi，或者再加湯，我比較喜歡就咁食！😆 除咗主餐牌，仲有一張紙餐牌係當日推介食品，我叫左燒鰻魚肝同埋味噌醋帶子，帶子都幾厚，唔使點醬都好食！

食完飯去藥妝店睇定有咩要買同幫人買，出到嚟又落雨！行去心齋橋搵返尋晚見到一間叫 STIQ 的店，尋晚太夜，睇左一陣佢就關門，今日早少少，佢呢度係賣貼紙，呢啲貼紙其實係可以燙落件衫或者個袋度，佢仲有D淨色嘅衫賣，你可以買件衫再加貼紙即場教你點樣燙落件衫度，我就買咗件薄嘅長袖衫揀咗三份貼紙，佢一路教我自己燙，好快就搞掂，咁就可以創作一件獨一無二嘅T恤啦！當然你都可以買返去屋企自己整，不過佢教你一次就會好啲，因為都有幾個Step要做！

再行多一陣就返酒店，今日都出左嚟十幾個鐘，好攰！今晚要好好瞓返覺！😴😴😴