2023年10-11月東京半獨遊 Day 1 - 築地、銀座、豊洲、新御徒町

好掛住東京，所以自己一個飛過去玩幾日，今次坐凌晨機，凌晨兩點幾先至飛，慢慢喺屋企出門口，再慢慢搭巴士過嚟機場，都仲有大把時間，機場入面當然係冇嘢行，因為所有舖頭都關晒門，剩返廿四小時開放嘅麥當勞，但係我已經食咗晚飯，所以冇再去食嘢，今次個閘口在天際走廊 Sky bridge 果邊，呢度有間無人商店，都見到有啲人喺度買嘢，我記得上次嚟佢都未正式開，我就冇入去睇！在天際走廊影一輪相，都仲有時間，行去閘口嗰邊等吓，坐喺度睇吓手機，好快就可以登機了！上咗機起飛後，過一陣就派小食，今次係一小包爆谷，同一支水，派完之後可以瞓覺喇！我諗瞓咗大概個幾鐘就醒咗，唔係太眼瞓！

到步後，過關都係差唔多一個鐘，又係行李等人，攞完行李用QR code過關，比之前快咗，可能加多咗自助過關機，之前有D人話用返過關填紙可能仲快，但係今次睇我覺得差唔多，雖然仍然有啲人要填紙，都唔見得佢哋好快！

一出去即刻去買火車飛，最近嗰班車8:50 ，買完飛仲有5分鐘開車，即刻走落月台上車，去到東京站再轉JR去上野，一共用咗1小時20分鐘先去到上野，跟住行去酒店，今次住新御徒町嘅 APA 366  ，因為好友已經在東京，會join 佢一齊玩兩日，佢哋book咗間Apartment，就在新御徒町，諗住大家一齊煮嘢食，所以我就租佢附近嗰間酒店，由上野站行去APA 要行10分鐘，我先去酒店放低行李，佢哋存取行李方式先進左，比低行李同資料之後，佢會有個QR code俾我，到時掃返QR code 就可以攞行李，再係俾個牌或者比張飛你嚟攞！放低行李之後，行過去好有間Apartment 望吓，發覺佢apartment對面都有間平價酒店，但係當其時搵唔到呢間酒店，否則的話喺佢對面仲近！

好友今日喺草津揸車出嚟，佢哋要去一去台場，所以我自己去搵節目先，晨早流流就梗係去築地啦！本來有間食蕎麥麵嘅店想試，但係今日星期日佢冇開，所以就去食壽司，去到築地市場人山人海，原本想話去食五款海膽嗰間虎杖，但係條人龍排到出街😅，想話去鮨國，數過了人龍應該要等兩轉😅，因為好肚餓唔想等，就去咗壽司清，我記得以前喺腸內市場食過呢間壽司清，佢個亞媽家姐 (omakase) 只係$3000幾円，質素不過不失，見到有一個位都唔諗喇，即刻入座有得食，除咗亞媽家姐之外，另外叫咗個赤貝、牡丹蝦、海膽軍艦，後加嘅壽司就麻麻哋！

食完壽司又出去行吓，原本想幫襯吓咖啡檔，但係佢好full好多人！見到街尾嗰間cheese cake小店，有咖啡賣，所以諗住入去飲杯咖啡，店入面只有幾個位，當然係冇乜人啦，因為冇人諗住會喺築地食cheese cake，不過我見佢個cheese cake 幾吸引，所以叫咗件試吓，又真係幾好食！去埋杯咖啡，加上個環境都唔錯，在熱鬧嘅築地裏面，難得可以 relax 咁飲杯咖啡☕️食件cake 🍰都唔錯！

食飽飽都係1:00 ，就行過去銀座！行到差唔多三越百貨，見到有間小店叫做 HOBBYRA HOBBYRE，佢係買一針只嘅物品，例如毛冷、刺繡、布料等，我正想買毛冷織頸巾，所以入去睇吓，見佢有D針織🧶成品，係可以買嘅，當然人工包料價錢都唔會平，佢啲刺繡都幾靚，我冇玩過刺繡，不過我相信唔難，所以買咗一幅試吓，另外再買咗D布badge 添 ！

跟住去三越百貨行吓，入去見到有間Pop Store D衫都幾靚，價錢亦都唔算太貴，我睇中一件褸，不過我覺得要再買鞋去襯，所以冇買到，我攞咗遊客嘅優惠卡，買咗一個頸巾扣，之前買咗個，因為太重，所以今次買一個細啲嘅，跟住再上樓上，搵我平時飲開嗰隻花茶，揀咗四款花茶，每樣買D，原本想買個杯，因為之前嗰個打爛咗個蓋，但係佢冇大少少size，所以都冇買到杯！跟住再落去地庫睇吓啲手信，冇乜睇啱，就行過去Loft，都睇唔啱嘢！

跟住搭車落去豐洲，因為約咗好友去豐州果個Lalaport 商場，呢個 Lalaport 雖然有少少舊，但係好大，足足有三棟，聴講附近就嚟開間新的 Lalaport，希望下次可以去🤣 呢度其中一座係停車場，下個有間大型超市 Aoki ，我哋去買肉肉肉，今晚煮牛扒🥩買咗松板牛扒同薄片，另外買咗一D鹿兒島牛肉片、薄切牛舌、刺身、赤海老，又買咗包大阪王將餃子，今晚一律煎煎煎🤣🤣🤣

上到去好友間apartment ，好新淨，而且比想像中大，除左兩張床，仲有張梳化床，同埋一張拉落嚟嘅上格床，足足可以住四至六個人，之前好友叫我屈蛇住佢呢度，我見呢度冇間房，而且費事比酒店知道就肉酸🥹，雖然佢check-in完都係用密碼出入，大堂基本上得一個Staff，而且夜晚冇人 on duty，真係屈蛇都未必有人知！🤫 房內有張大枱，同梳化一樣長，洗手間同浴室分開，又有洗衣機，真係唔錯，價錢亦都相當合理！酒店只有兩個車位提供，而且價錢都偏貴，但勝在泊完車就可以上樓，不過其實周圍都有好多街泊位，而且價錢都好平，不過好友之前喺網上搵唔到，原來附近有咁多泊車位，所以先至 book酒店嘅車位！

又係男士大展廚藝嘅機會🤣，我發覺而家D朋友群中，多數都係男士煮食，女士坐晒喺度等食 🤣🤣 我哋留返松阪牛最後先食，先食咗鹿兒島牛同埋國產牛舌，兩款牛都唔錯，牛舌仲有D驚喜添！一向對薄切牛舌都唔太滿意，今次又出乎意料之外好食，而且好腍！跟住食松阪牛薄切，呢個應該平時用嚟做shabu shabu 或者壽喜燒，就咁煎一煎，就好好味，最後煎埋個松阪牛，始終最好味都係松阪牛！😋😋 食埋剌身同蝦，好正！

食完嘢再出去行吓，因為好有被去過上野阿美橫町，所以過去行一陣，其實我哋都係主力行藥妝店，因為其他店舖大都收咗舖，好友左藥妝店買咗少少嘢，我就冇收穫，跟住再慢慢行返酒店，先諗起頭先買咗生果未食，所以上返去好友間酒店度食生果，又吹吓水咁，都傾到成12點先返酒店，好彩酒店都好近！

酒店住後感：
APA Asakusa Shin-Okachimachi Ekimae 366
APA 有好多間分店，呢間個no. 366
位置相當偏僻，如果由上野站行過嚟，要10分鐘左右，其實附近有個都營大江戶線嘅新御徒町站，不過呢條線唔經東京，如果由機場過嚟就唔係好方便，呢度附近都好靜，夜晚基本上淨係見到呢間酒店成條街都冇其他舖頭開！如果唔係就好友，根本唔會處理度，除非你自駕！
APA 酒店房出咗名細，，呢間又比想像中大咗D，起碼有張凳可以拉出嚟坐，如果住新宿果啲旺區，基本上要坐喺床邊，所以呢間酒店好多床都係傾側埋一邊，因為個個都係坐床邊當凳坐😅
設施都係一般基本嘢，唔會有太大期望，真係貪平先至會住 🤣