元朗燈籠街

過兩日就中秋節，今日得閒入去元朗影燈籠，條燈籠街近幾年都好多人去，我就從來未去過， 趁中秋節前過去睇一睇，入到元朗唔少得食返碗好到底嘅雲吞麵，上次食已經係幾年前去千島湖嗰次！我覺得佢D麵好似唔同咗味， 湯底同雲吞嘅味道就冇變，我食完雲吞麵再去勝利牛丸，食返碗淨牛丸，元朗兩大名物都食一食，勝利牛丸真係好多年冇食，我諗都有七八年冇食過😅 依家再食都保持到質素！

行去大橋街市，係燈籠街所在地，下一街市都冇乜方向，不過睇吓邊度最多人就應該係 😅 其實呢條燈籠街好短，大概係每邊五六個鋪位左右，當然佢哋係將所有燈籠掛晒出嚟，感覺好澎湃，然後條街有好多人，有少少水洩不通，有唔少人嚟呢度打卡，即係齋影相唔買嘢，好似我咁🤣，其實我都想買個燈籠，因為覺得佢都幾靚，不過最後顧住影相都唔記得咗買🤦🏻‍♀️ 不過呢度太多人，都好難影到好D嘅角度😅而且啲燈籠都掛得少少雜亂，加上我技術唔夠，所以影出嚟都唔係太有美感 😅