三和敘

早前去好友屋企食飯，前兩日好友屋企嘅大廈係強制檢測大廈，加上自己有少少流感症狀，所以好擔心，即刻走去做檢測，夜晚做完檢查，第二日已經有訊息通知我冇事，當堂成個人都放心晒，之前未有結果嘅時候，就已經諗好咗如果冇事就食餐好D，所以今日就食餐好D😄😆

本來想出去尖沙咀，但係因為今晚約咗朋友去我屋企食飯，要去會合好友攞海鮮，所以唔係好夠時間，就近近地去咗九龍城，原本想去買德昌嘅魚蛋，但係排得超長龍，因為限聚令冇得堂食，所以我諗今晚好多人喺屋企打邊爐倒數，同打邊爐相關嘅食物都排晒隊，好友話買海鮮都好困難，因為超多人，牛肉檔亦都因為人太多，牛肉唔會代人客切片，所以我地一陣間都要自己切！😅

在九龍城想話飲杯咖啡，行過三和敘，突然間諗吓都好耐冇嚟過，呢間野係比較貴，因為質素都高，不過午餐通常都有D套餐會平D，咁所以行過去睇吓門口個餐牌，午餐嘅餐牌真係平少少，但係真係少少，所以揀咗一個set lunch，係海膽蟹肉釜飯，有湯有甜品有沙律，算係抵食！