Pokka

去完迪士尼，出返去青衣食嘢，因為好友想在青衣直接搭車返屋企，我哋去咗 Pokka，都好耐冇去，見到佢嘅價錢比之前平咗，推出左一D套餐，冇以前嘅定價咁高，當然咖啡都冇減價嘅，都諗咗一陣夜晚黑好唔好飲咖啡，見今日攰攰地，應該唔會瞓唔着，最後都係叫咗咖啡☕️，我哋叫咗一個牛扒🥩同埋一個意粉🍝share食，食物質素就同以前差唔多，不過不失，咖啡就一樣好飲，可能市道都唔好，見到D店員係咁 sell 會員套票，不過就冇 sell 我哋，就算佢Sell我哋都唔會買，因為我哋都好少嚟呢度! 🤭食完飯想去商場行吓，不過好多舖頭都關門，我哋只係去Zara 行咗一個圈，已經冇嘢好行，所以就各自回家！😅

 

香港廸士尼15週年 - 夢想所在 奇妙15載

再同好友 F 去廸士尼，上次去太多人呀，加上城堡🏰上次未開， 21號果日正式開左，我哋係得今日有時間去，所以今日去睇吓個城堡入面有D乜嘢！在青衣食完野就入去，今日都唔係好多人，門口已經有D正式嘅15周年裝飾1️⃣5️⃣，之前都奇怪點解15周年冇大搞，原來要等埋個城堡，商店街都多咗好多15周年嘅產品，不過都未能夠吸引到我哋買，因為都唔係話好靚，我哋反而買咗一個頭箍，因為見佢閃令令好靚，在商店街行咗一個圈，就要去城堡睇吓，我哋在城堡外圍影咗一輪相，擴大左嘅城堡，加咗13個公主嘅特色在塔尖上，我哋一路搵每個塔尖嘅圖案代表邊一個公主，突然間見到有巡遊，即刻走咗去睇巡遊，呢個巡遊比平時嘅細型好多，都叫做有得睇吓啦，所以個個都衝晒過去睇，巡遊冇停低，一路行到尾，所以快速影完相就行返去城堡，繼續頭先未睇完嘅城堡裏面！

城堡裏面只有兩個室內地方，一個係同公主影相嘅位置，另一邊就係珠寶店，城堡嘅入口果邊係一個升降舞台，後面出去果邊就有13個代表公主嘅花圖案，同埋柱上面嘅雕刻，亦間中有D閃令令嘅效果，牆上面有D QR code，掃描QR code有林嘉欣把聲聲音導航，我地有排隊入去睇公主影相個位，因為而家冇得同公主影相，呢個時間有冇公主俾你遠距離影相，所以只係影下個房就走，珠寶店叫做入去望一望，因為有個足金嘅阿拉丁神燈、玻璃鞋、美女與野獸果朶玫瑰，所以都會影吓相！

睇完城堡就去睇奇妙夢想城堡故事展，展覽左成個城堡嘅設計、用料、建造過程嘅影片、每個塔尖嘅圖案模型、成個城堡嘅模型、每個公主嘅故事等等，我哋都睇咗半個鐘，因為要慢慢睇，同埋有13個公主咁多，呢個展覽都好值得睇，我相信佢只係會展出一段時間，睇完展覽出嚟見到城堡升降舞台有表演，當然要睇吓啦，係一場聖誕歌舞，睇完我哋又去玩Iron Man，入到去竟然冇人，去到等入場嘅時候先開始有幾個人入嚟，原本諗住會包場添，玩完Iron Man出嚟，見到原來聖誕樹🎄果邊有亮燈儀式，有少少煙花🎆，我哋只能夠離遠睇，不過見到有煙花睇都好開心！當然唔少得飛雪嘅效果啦！❄️

我哋行多一轉商店小鎮大街，跟住就走喇！走嗰陣睇新聞見到兩個樂園又要關門喇！😨星期三開始關閉兩星期😔好彩講得切今日去咗，如果唔係又要等到聖誕先，到時可能銀咭都入唔到喇！🤦🏻‍♀️

 

海港薈

相約好友到青衣集合，都有一段時間冇去青衣食嘢喇，過往我哋都主要係去食拉麵，今日見有間酒樓好似新新地，開咗唔係好耐咁款，而且好耐冇一齊去飲茶啦，所以去試吓啦，雖然係午飯時間，不過都有位，我記得以前呢個位我哋嚟食過嘢，好似都係酒樓，我哋叫咗幾款點心，有鮑魚燒賣、帶子腸粉、素菜餃、叉燒包、豉蒜炒尖椒，食物質素一般酒樓咁啦，我哋食咗一陣嘅時候，隔離枱有位嬸嬸，喺度咳😧，嚇到我哋同另一邊果枱客，你眼望我眼，開頭諗住佢唔知係咪濁親，過咗一陣佢又再咳，所以我哋同另一邊果枱都係調咗枱🤭，而家疫情咁嚴峻都有D驚，始終大家除咗口罩！

 

iMarigliano panettone

 

千呼萬喚始出來，話說早兩個月前已經上網訂咗呢個牌子嘅 panettone ，見到Facebook講16號D貨已經嚟咗香港，一路等佢送貨，等咗一個禮拜都冇消息，就問吓店家，客服只有一個人，因為我打過幾次電話去都係同一個人聽電話！佢只係俾咗順豐速遞個電話號碼我，叫我自己聯絡順豐，我打去check我張單，順豐果邊話冇資料，又再打返去店家，佢先至再幫我跟，轉頭再打去順豐又話有單，跟住佢話聽日送，我話冇人喺屋企要改期，最後要改遲咗三日先有人收貨，到收到貨之後，又發現少咗一個！🤦🏻‍♀️又要再打去客服，要再補送返，我叫佢星期日送返俾我，順豐星期六就話送貨！佢哋話星期日唔送貨，因為冇人收貨，就放咗去智能櫃叫我自己去攞！

成個送貨嘅體驗都唔係咁好，店家在前面不斷推叫人買，後面根本應接不暇！令到原本諗住好食就再訂，都想打消呢個念頭！

試咗個蘋果玉桂味，質地都幾軟熟，味道都唔錯，比起平時在CS買果D好食，其實我都試過好多隻，
老實講個 panettone 係真係好食嘅，我亦都知道淨係聖誕節先有得食，不過我已經買咗三個，佢可以擺到四月，咁我可以慢慢食，食完再等出年聖誕，反正而家D 時間過得咁快，好快就等到，而且有時有D嘢係要期待下，先至會覺得珍貴！

Les Papilles

上次去銅鑼灣經過呢間餐廳，已經好有興趣去試吓，今日就特登過去試，餐廳嘅面積都幾細，大約只有18個位，今日只有三枱客，有一台係類似飲食雜誌嘅人，喺度試食同埋影相拍片！📸

我地就叫咗一個牛扒同埋一個鴨腿午餐，個牛扒上枱嘅時候怪怪地，因為佢就咁一塊牛扒上面有D綠色嘅醬汁，在網上面見佢呢款牛扒通常係切咗一片片，同埋有D伴菜，因為西餐好少係完全冇伴菜咁肉酸，味道就麻麻哋，因為牛扒over cook ，個汁又怪怪地，至於個鴨腿我就無試到，不過就話唔錯，飯後我哋叫咗熱咖啡飲，不過杯咖啡係室溫水咁嘅溫度，完全係唔熱或者暖，隔離枱咁岩都係叫熱咖啡，佢哋就嫌咖啡唔熱要求換過，我哋都有諗過叫佢換，不過都算啦，反正呢餐都係麻麻地滿意，臨尾我哋未飲完咖啡佢都就收走個杯！連個侍應自己收咗第一杯之後都覺得好似我哋未飲完，所以收第二杯嘅時候先問吓我仲要唔要，我話要佢先冇收，但係就已經收走咗另一杯🤦🏻‍♀️🤦🏻‍♀️

 

一樂小鍋

相約舊同事去食飯，佢離咗職已經差不多三年，只有舊年去醫院探Howard嘅時候見過面，足足有一年幾冇見，因為佢住喺馬鞍山，所以我遷就佢，過咗去石門食飯，今晚去食火鍋，呢間佢去開，在商場裏面的小店，店嘅面積好細，今晚只有四台客，不過已經滿咗一半，餐牌非常之簡單，火鍋套餐每位$238，然後有幾個選項，每個選項也有幾款食物俾你揀，我哋揀咗隻蟹、鮑魚、蝦、蜆等等，同埋D配料，海鮮嘅質素就不過不失啦，都算新鮮嘅，隻蟹都好靚，不過湯底就麻麻哋，不過志在聚下傾吓計，佢之前放租果間屋，已經冇租比人，同朋友搞嘅貓酒店，生意都唔係太理想，我諗因為疫情關係，都冇人去旅行，就唔使寄托隻貓去貓酒店，可能因為咁樣有影響吧！

 

 

好友 I 生日，揀咗去呢間韓式餐廳，近日疫情爆發第四波，每日都有幾十人確診，實在令人擔心，食埋呢餐，嚟緊都要盡量減少同朋友出來食飯！

前兩日在朗豪坊訂咗蛋糕，攞埋蛋糕至上去餐廳，呢度地方都唔細，裝修好新淨，應該開咗唔係好耐，睇吓個餐牌，呢度主要係食炸雞，當然都有D韓式嘅食品，我哋睇到都覺得好吸引，我哋先叫咗一款原味嘅炸雞，同埋一個煎蛋餅，跟住帶咗啤酒同埋西柚燒酒，個炸雞都幾好味啖啖肉，個醬就幾辣，蛋餅都好食，當然兩個餸係唔夠啦，我哋再叫多個蒜香炸雞，同埋紫菜飯團，炸雞下面有薯條，所以都食得好飽，食埋個蛋糕就啱啱好，店家用咗一個特別嘅碟，寫埋韓文嘅生日快樂，整得幾靚，成件事好開心！真係有D喜出望外！

Greenhouse

 

又係好友 J 的生日飯局，呢餐揀午餐食，因為好友月尾生日，佢好多日都已經約咗人，另外好友 F 亦都好忙，所以約今日一齊食lunch！

去咗時代廣場，我一早過咗去，佢哋未夠鐘放飯，我就去咗 cafe corridor 買杯咖啡飲，飲完仲要去City super 買蛋糕，買完蛋糕再上去餐廳攞位，其實我哋三個之前已經嚟過呢間餐廳一次，應該係舊年嘅事，而早兩個月我以我哋亦都去過 K11 Musea 果間分店，雖然個名有少少唔同，但係食物嘅質素都相若，我地叫咗牛扒、黑松露意粉，另外仲有幾款串燒，食完野想買個蛋糕佢哋就趕住走，我就去攞埋啲大閘蟹🦀，夜晚返屋企蒸埋佢嚟食！😆