鍋心

五月生日飯局，呢個群組嘅生日飯就冇停過，只係咁岩12月至4月冇人生日，大部份人都係年尾生日，所以冇特別約出嚟，今晚我哋五個人，其中一個好想食海鮮，所以揀咗嚟呢間食蒸海鮮，群組入面有一對是舊情侶，分咗手差不多半年，但係再見亦是朋友，反而我哋就有D尷尬，不過既然當事人都冇所謂，我哋都好快冇嘢！

我哋訂左8:30 ，呢度嘅做法係分開時段，上一個時段清晒場先至會放下一個時段嘅人入去，所以係準時8:30先入得，個餐有八款海鮮，其中兩款係必然嘅選擇，係龍蝦同白蜆，我哋另外再揀咗鮑魚、肉蟹、海蝦、象拔蚌仔、蟶子、花甲，未開始蒸海鮮之前，每人一盅燉湯，係蟲草花雞腳湯，蒸海鮮就會有專人幫我哋整，整完就會分派俾我哋，海鮮都好新鮮，龍蝦同肉蟹每人有半隻，鮑魚、象拔蚌仔、蟶子就每人一隻，食完海鮮仲有一個蒸飯，蒸飯又可以揀幾款餸，其實未食個飯已經覺得飽，食埋個飯就更加飽，因為個飯每人可以有兩碗！仲要我哋買咗蛋糕，好友仲買咗個大嘅蛋糕，勁多cream，所以個個食到非常之飽，食完之後賣單果陣，店員俾咗張單我哋，話如果攞住張單去佢哋佐敦分店食，每位再減 $100 ，見佢佐敦果間嘅價錢係平了，再可以減$100的話， $200都唔使，真係好抵，只不過要21日內要食，所以大家約定下個月再去，因為我哋今次係五位，下次如果去佐敦果間食，最多五位有呢個優惠，第六位及之後每位就要比正價，都真係好抵！雖然個餐有少少唔同，但係大致上都有八成一樣，反正都係食得非常飽，就算食少一、兩樣嘢都會好飽！