墮落花 The Fallen

雨來自毒品世家，自小由父親教導製毒，但長大後突然失蹤了廿年，直至父親去世，再回來打理家族的毒品生意，同時周旋在父親的養子，和父親的老拍檔時間，亦被警方控制，自己本身亦都有毒癮，經常都依賴毒品去逃避現實.....！

將套戲女主角溫碧霞攞咗最佳女主角，我個人覺得演技唔算好出色，係咪好大突破都唔敢講，因為我都唔知佢近年拍過D乜嘢戲，反而我覺演得唔夠放！反而另一女角陳漢娜吸引到注意！

火山燒

睇住呢間店新開張，但係一直都好多人等位，開咗幾個禮拜之後終於冇咁多人，可以去試吓，雖然呢間店個名叫做火山燒，但係真係用火山石燒嘅牛扒，就唔係咁多選擇，反而係主要食和食，其實所謂嘅和食，只係比較日式嘅西餐，因為佢都冇壽司同拉麵，反而係意粉同埋丼果類，我唔知夜晚嘅餐牌係咪有唔同，因為只係見到午餐嘅餐牌，可能夜晚會多D嘢食選擇吧！

當然要試佢哋嘅火山燒牛扒啦，火山石好熱，食咗好耐都仲係好熱，牛扒嘅質素都唔錯，以$100以下嘅價錢來講都好抵食，跟餐亦都有一個湯，有麵豉湯同忌廉湯嘅選擇，麵豉湯就好鹹，忌廉湯就略鹹，而牛扒嘅醬汁亦都係偏鹹，整體來講幾樣食物都係鹹咗D，亦都試咗佢哋嘅豬肋骨焗飯，亦都係略為鹹咗少少，再試埋佢哋嘅雞扒溫泉蛋飯，其實整體嘅食物味道都唔錯，而且價錢都好平，不過就各款食物的汁我都覺得咸咗D，如果可以淡返D就Perfect！

鍋心

五月生日飯局，呢個群組嘅生日飯就冇停過，只係咁岩12月至4月冇人生日，大部份人都係年尾生日，所以冇特別約出嚟，今晚我哋五個人，其中一個好想食海鮮，所以揀咗嚟呢間食蒸海鮮，群組入面有一對是舊情侶，分咗手差不多半年，但係再見亦是朋友，反而我哋就有D尷尬，不過既然當事人都冇所謂，我哋都好快冇嘢！

我哋訂左8:30 ，呢度嘅做法係分開時段，上一個時段清晒場先至會放下一個時段嘅人入去，所以係準時8:30先入得，個餐有八款海鮮，其中兩款係必然嘅選擇，係龍蝦同白蜆，我哋另外再揀咗鮑魚、肉蟹、海蝦、象拔蚌仔、蟶子、花甲，未開始蒸海鮮之前，每人一盅燉湯，係蟲草花雞腳湯，蒸海鮮就會有專人幫我哋整，整完就會分派俾我哋，海鮮都好新鮮，龍蝦同肉蟹每人有半隻，鮑魚、象拔蚌仔、蟶子就每人一隻，食完海鮮仲有一個蒸飯，蒸飯又可以揀幾款餸，其實未食個飯已經覺得飽，食埋個飯就更加飽，因為個飯每人可以有兩碗！仲要我哋買咗蛋糕，好友仲買咗個大嘅蛋糕，勁多cream，所以個個食到非常之飽，食完之後賣單果陣，店員俾咗張單我哋，話如果攞住張單去佢哋佐敦分店食，每位再減 $100 ，見佢佐敦果間嘅價錢係平了，再可以減$100的話， $200都唔使，真係好抵，只不過要21日內要食，所以大家約定下個月再去，因為我哋今次係五位，下次如果去佐敦果間食，最多五位有呢個優惠，第六位及之後每位就要比正價，都真係好抵！雖然個餐有少少唔同，但係大致上都有八成一樣，反正都係食得非常飽，就算食少一、兩樣嘢都會好飽！

深夜食堂

同兩個飯局好友食飯，分別係二月之星同埋四月之星，因為之前幾個月都冇出嚟食飯，所以大家都話今年唔食生日飯喇！只係想大家見吓面聚下，約咗去旺角呢一間食店，呢度係食日本嘢，佈置都好日式居酒屋咁，仲擺咗好多假櫻花，店入面嘅枱唔多，地方都頗細，全部都係二人或者四人枱，我哋三個人都係坐一張面壁嘅二人枱加多張凳，食物嘅選擇都唔少，類似居酒屋咁樣，有D串燒，同埋小食，我哋叫咗魷魚絲、燒茄子、牛舌、燒鯖魚、雞翼等等，雖然樣樣都係細細碟，不過都幾好味，同埋食咗咁多碟都幾飽，呢度冷氣唔係好夠，有少少熱，令人想飲多D嘢，始終居酒屋都係要靠飲品賺錢吧！

自家手工意粉

舊年年尾嘅時候 City Super 做會員優惠果陣，買咗一包 00 號嘅麵粉，預備整意粉，一直都冇時間做，想整意粉嘅原因係幾年前已經買咗部意粉機，放咗喺屋企幾年都冇用過，今日終於的起心肝去整，之前在網上見到人哋嘅意粉食譜，就跟住去做，材料好簡單，只係麵粉、雞蛋、橄欖油，分量嘅比例亦都好簡單，係 1:1:1 ，即係每 100g 意粉用一隻雞蛋同一茶匙嘅橄欖油，要整多啲嘅時候就200克用兩隻蛋同兩茶匙橄欖油，如此類推，我用咗300克麵粉三隻蛋同埋三茶匙嘅橄欖油，可能睇落唔多，所以要整完之後先知啱唔啱！雞蛋用咗日本蛋，所以顏色比較深色，將材料混合之後，搓佢大概10分鐘，就變咗深黃色，然後就放落麵粉機度碌，教咗厚度係零度，係比較厚身少少，碌成薄片之後，再碌麵條，我覺得麵粉麵團搓手得略為濕咗少少，過麵粉機嘅時候應該落多少少粉，所以麵條出嚟有點黐，我用咗衣架鋪左廚房紙，然後掛起個意粉吹光，食譜話最少要吹兩個鐘，我就啱啱好兩個鐘就煮嚟食，吹左兩個鐘頭的意粉都唔係好乾，我諗主要原因係有廚房紙阻礙咗佢通風，同埋麵粉都係偏濕咗D，未煮之前先係鑊度整咗茄汁蝦，另一邊再用水煮意粉，唔知要煲幾耐所以自己睇住，不過原來手工做嘅意粉吸水力好強，平時買現成嘅意粉冇咁索水，煮呢個意粉D水好快乾，而且好快熟，煮完即刻倒過去隻鑊度兜茄汁蝦，個茄汁煮得太過乾身，雖然加咗水都係略為覺得佢乾，因為冇乜汁嘅關係，個意粉唔係好掛到汁，所以食起上嚟有少少淡，下次試吓蛋嘅份量加重D，睇吓個味道會唔會蛋味濃D！

雲壽司

今日去中環睇醫生，睇完醫生落咗去銅鑼灣，好似都有好幾個禮拜冇去香港區，知道崇光做緊特價，所以佢行咗兩個圈，仲去咗11樓間 Café 食咗個牛扒，飲番杯藍山咖啡！

在行咗一陣，去咗總統戲院果邊，見到呢間壽司店應該新開冇幾耐，見到價錢都唔算貴，有試下佢啦！店入面大概有12個位，我地叫咗一個特上壽司盛，再加左大拖羅刺身，壽司嘅質素都唔錯，大拖羅入口即溶，價錢合理，值得再食，不過呢日佢哋要落場，所以食完都好快要走，下次可以再去試過！

海港

好友 F 又搬屋了，剛剛搬了屋兩星期又要搬走，大家花咗好多時間落間屋度整理，點知咁快又要搬，雖然都係搬返去附近，一來一回搬咗兩次都用咗幾千蚊！今次搬呢度都係上水區，亦都係比較舊嘅村屋，不過叫做環境好過之前果間少少，起碼唔使行樓梯，屋入面果兩部冷氣簡直係古董，一部聲寶牌一部日立牌，保守估計超過15年，但係仍然好凍！真係好嘢！上次嗰間屋就多曱甴，今次呢間屋就多蚊，好友張按摩椅，又係入唔到門口，前後搬兩次屋都搞唔掂，今次就曾搵人上門拆左張按摩椅搬入屋之後再裝返，又要比多千幾蚊，不過呢度佢簽咗一年租約，所以都值得整，今次因為我唔得閒所以冇幫佢手執屋，希望佢自己搞得掂啦！

我夜晚先入去，幫佢搞咗一陣之後就出去食飯，因為佢屋企真係冇辦法整到嘢食，我哋一行六人，出發去上水食飯，落車嘅時候見到有間海港酒家，就上去食啦！都唔記得有幾耐冇去過酒家食飯喇！我地叫左幾個餸，食完都係九點幾，酒樓都已經清場，準備10點關門，搭返車出去10點幾，等遲D好友執好間屋之後先再去探佢啦！

鮨穴

好友K生日，約咗我同好友J去銅鑼灣食飯，去咗呢間日本餐廳，之前我同好友J食過一次午餐，晚餐都係第一次嚟，我哋每人叫咗一個壽司set，再加左一D串燒，食物嘅質素都係保持到水準，因為好有J識人，所以請咗我哋飲 sake，我哋傾開計，講開好友F新屋情況，我冇同佢哋講太多，亦都冇話比佢哋聽，好友住咗兩個禮拜又要搬，亦都冇話俾佢地聽實際住喺邊，因為好友 F 唔想佢哋知咁多，始終分咗手，再見不是朋友！不過我亦都有埋怨好友K，如果唔係佢要佢前度咁快搬走，佢就唔使搬完又搬，仲要住D環境好差嘅屋，如果比多一個月時間佢搵屋，成件事就唔同晒！

食完飯我哋買咗兩個榴槤，去咗好友 K 屋企食，自從好友F 搬走咗之後，成間屋真係多咗好多空間，始終兩個人同一個人住係有分別，雜物都少D！加上好友帶走埋隻狗，唔會成屋狗毛飛來飛去！兩個榴槤一個好食，一個熟過頭唔好食，而家真係好難買到好好食嘅榴槤！