平時去廸士尼唔會太早，今日早啲去因為諗住睇吓攞唔攞到新果個機動遊戲 Soaring 嘅 fastpass ！去到售票處先知道今日樂園會提早關門至到6:30Pm ，佢話可以三點後加多 2000円轉過去 Disneyland 果邊，果邊收10:00pm，我考慮下先，好彩今日早左入嚟，如果唔係就少左時間，在售票處已經睇到邊個機動遊戲嘅 fastpass 冇晒，果然係 Soaring 同 Toy story！
唔知係咪因為佢早收，覺得樂園入面冇平時咁多人，一入園去咗商店街行一陣先，因為都幾凍，其實冇乜特別野要買，純粹係睇吓行吓，跟住去買D小食食吓，見到佢新出左兩款小食，一款係有D似大阪燒嘅小食，但係佢係一條捲埋嘅，入邊有D好似意粉咁嘅嘢，不過食落口就麻麻哋，好似食緊一團麵粉包住另一團麵粉咁，跟住見到有個雞卷，又買來試吓，基本上佢係成舊雞俾肉卷埋，然後在上面放咗一D梅子粒，呢個都可以，因為啖啖肉都幾抵食，既然食得小食，就一定要食至愛嘅骨付雞肉腸，佢都係排最長龍嘅一款小食，跟住再買左個肉包，佢好似雞包仔咁嘅味道，味道都可以！
食完野行過去睇吓 Nemo 多唔多人，見到都幾多人，睇下夜D會唔會少人D先玩！跟住行咗去 Mermaid 果邊，去搵 Soaring 果個遊戲，原來近住中東果邊位置，離遠已經見到好長龍，望吓個等候時間要兩小時，都要照排啦！因為一心想玩佢，頭果段一直排室外都幾凍，排左成個鐘頭先至入到去室內，前後足足排咗110分鐘先至有得玩，佢好似環球影城入面嘅Minions 咁，每邊有三排座位，要將個人物件放在櫈底，綁安全帶，我坐第三行，遊戲開始嘅時候就會見到前面果兩行升高左，我直情望到第二行D人嘅腳係畫面嘅上方，呢個遊戲係裸視3D再加坐位搖動，一個巨型嘅圓形屏幕顯示畫面，其實好清楚望到側邊嘅人，不過像真度都係好高，就好似坐住飛船去世界各地睇唔同嘅風景，當然係刺激D啦，最似係睇鯨魚嗰part，D水真係想彈埋你度咁，好多個位都幾驚，不過都覺得佢好好玩！可惜排隊時間太長了，fastpass睇怕要9:00先攞到！
玩完遊戲行咗一陣間街就去搵D嘢食，之前想試吓果間 Maggllan’s 餐廳，行過見到有位就試吓，原來佢除咗餐廳仲有個位置飲嘢，餐廳在下一層，今日只有三款set Menu，揀咗一款龍蝦，另外叫咗杯特飲，特飲有個紀念品係個杯，店員嘅服務態度好好，同隻船上面嘅餐廳應該係同一間公司，因為佢哋供應同一款嘅麵包，就係我哋最鍾意食嘅米奇軟包，不過今日唔係好肚餓，食咗兩個就夠喇，上次同朋友去，食咗三個都覺得唔夠！食物嘅質素亦都同出一徹！
食完嘢出嚟都開始天黑喇，周圍影吓相然後再去玩 Nemo，直情唔使排隊，可能因為今日要早收，呢邊好似冇乜人咁，大部份人應該去左 shop度買緊野，咁我就趁冇乜人影吓相，然後就過去買野，因為買嘅嘢唔多，好快搞掂就走，其實佢收6:30，好多人6:30先開始買嘢，所以出返嚟都已經七點幾，時間尚早就可以去火車站個商場行吓，以往係行完商場先入園，今次可以夜晚過嚟行，我行完一陣就行返去車站果間 Bon Voyage，睇吓有冇乜嘢要買，呢度都好多人，行到攰攰地就走喇！
出到去東京站想買手信，因為朝早見到有間叫做 Tulip Rose ，見D手信都幾靚，見佢係新開應該唔會咁快賣晒！點知都係賣晒，唯有第日再嚟，搭返車返酒店只係兩個站，真係方便好多，先返酒店放低野，再出返嚟，去搵果間篝拉麵，到步第一日已經嚟食，點知佢定休日冇開，上網睇過佢收10:00 pm，見到仲有一個鐘，就過去排隊，去到點知已經截咗龍，真係同佢無緣，行咗兩次都食唔到！唯有轉搵其他嘢食，但係附近食店應該冇收到咁夜，一路行返酒店一路睇吓有冇嘢食，大部份都快將關門，行吓行吓搵到一間鰻魚店，見到佢收12:00am，仲有時間，諗住食個細鰻魚飯啦！
呢間店個名叫做銀座高之屋，見到間店有兩層，入口旁邊就睇到師傅喺度燒緊鰻魚，店員招呼我上樓上坐，呢度地方唔大只有幾張枱，不過我見佢仲有兩間房仔。睇吓個餐牌原來唔止鰻魚，仲有串燒同埋一D其他嘢食，有少少居酒屋feel，不過如果淨係買鰻魚開到咁夜都冇意思，都唔會咁多人夜麻麻去食鰻魚飯，就係佢有小小居酒屋咁，先至收咁夜，既然有其他嘢食，就試吓其他嘢囉，不過都會食鰻魚，但係唔係咁想食飯，所以叫咗淨鰻魚，加咗碟雞翼，一串燒鰻魚肝同埋一串燒扇貝，另外叫咗杯梅酒，鰻魚都幾好味，不過冇跟白飯嘅鰻魚，就喊左D，雞翼都幾好味，鰻魚肝就正路野，扇貝個樣睇落麻麻哋，佢有兩塊好細嘅芝士在扇貝上面，味道都OK，杯梅酒都幾好飲！食飽飽就返酒店休息！
沒有留言:
發佈留言