去到第五天有點累，前幾天行左好多好多路，今天仍要行！不過可以行吓休息吓！在附近行一圈先，去左附近的 Hyatt Centric 酒店食早餐，之前在網上見人地食得幾舒服咁！行出門口落緊雨，去便利店買把遮，日本好多地方冇瓦遮頭，落雨就好麻煩！行去酒店好近，2分鐘就到，酒店樓下有 Rolex 及 LV ，旁邊有間高級法國餐廳 L’osier ，去食早餐的餐廳叫做 Namiki667，早餐時間供應 buffet 比住客，街客有散餐 Menu，叫左個 Benedict egg，同埋咖啡，餐廳環境幾靚，有室外位，但太凍了，所以坐室內，早餐質素幾好，咖啡就麻麻地！食完早餐行出去中央通，今日星期六成條大街封左冇車！唔知係有特別原因定係平時星期六都封，可以企在馬路中間影相！去三越行左陣，攞左張旅客折扣咭，有5%折，有效期三年，在地下果層睇啱左個頸巾扣，其實唔係新野，以前都見過，今次覺得佢幾靚，所以買左個，有折又可退稅！跟住去左 Uniqlo ，呢間 Uniqlo 好大，有好多層，亦有得綉圖案在衫上，但係要三日後先有得攞，所以冇整！
行左陣就轉去新宿，在地鐵站見到有共享雨傘，不過寫明只有日文！行去小田急地庫，見到D水果好平！士多啤梨同蜜瓜，都係2000円左右！去高島屋食 lunch ，見到想食果間人形町金半，價錢頗貴，店員話午餐完左，要食其他 set，店員態度唔係咁好，個表情好似”特價午餐完左，正價你食唔食得起？”係食就等半個鐘，其實剛過了午餐時間，冇人等位，只見有人走，本來都想試下，都係等佢午餐平D先試！轉左去食牛舌飯，以前覺得佢都幾好食，依家差左D！食完野去 Tokyu hands 行左陣，見天黑了，便過去恵比壽！
第一次去惠比壽睇聖誕燈飾，一個叫做Yebisu Garden Place的地方，聯乘 Baccarat 水晶，呢度會有聖誕商方，Taittinger 香檳 bar，仲有巨型 Baccarat 水晶燈，由地鐵站行去 Garden place ，會有幾條自動行人路，去到會場好多人，有好多聖誕裝飾，仲有兩座歐式建築物，唔少得大型聖誕樹，旁邊有小小聖誕村，只有幾間小店賣聖誕物品，同埋小食飲品，聖誕樹對落係一條斜路，兩旁的樹掛晒聖誕燈，斜路盡頭是水晶燈，好靚！個個狂影相！在水晶燈後面是香檳吧！都唔少人飲，本來有興趣。但在室外太凍了，香檳吧後面仲有座歐式建築，原來係羅布松餐廳，專係做婚宴的，都係在地鐵站的廣告牌睇見先知！
睇完水晶燈，走左入去旁邊的大丸百貨，因為雙手影相影到凍冰冰，要暖一暖先，落去超市見到水果選擇不多，見到有櫈就坐陣休息一下！見到有紙包裝牛奶，來自蒜山的4.2 濃度，就買包試吓，奶味濃，正！
睇完燈飾，行返去地鐵站，見到有個商場 âtre ，呢個商場在幾個車站都有，又上去行吓，見到一D商店平時好少見到的，都去行吓，呢度都有兩、三間雜貨店，好似 Afternoon tea、Yurindo，地面果層仲有好多手信店，我行左陣就走，因為諗住去銀座食拉麵！
返到銀座，去返篝，佢收十點，九點截龍，我八點幾去到，有十幾人排緊，排到九點截龍，截左龍之後，有三個外國人問店員可否做埋佢地，店員睇完店內情況及排隊人數，話可以做埋佢地！九點後D人快左理單，我排左足足55分鐘！裡面其實有16個位，見到遊客食完就走，本地人除非一位，否則都坐得耐，因為傾計傾得內，餐牌有十款選擇，主要係淨雞白湯，雞白湯配松露、配牛肝菌，湯麵和沾麵等分別！我叫了特製雞白湯麵，特製其實係多左份味玉（中文餐牌翻譯成咸蛋）同雞肉，湯入面有雞肉雲吞，先試個湯，雞味好濃，同時都幾”漏”！麵條幾”淋”，雞肉雲吞幾好味，可能個湯已經好濃味，D雞肉反而冇乜味！整體來講唔會有驚喜！呢度有松露油賣，亦都擺左D杯麵，不過杯麵唔賣嘅，店員話7-11有，我前幾日已經買左！不過見佢仲有一包類似薯條的零食，就未見過！呢度寫明 cashless，只收咭，不收現金，走個陣見隔離間風見仲有人排隊，當中多數同我上次一樣，食唔到篝，轉左去食風見！
沒有留言:
發佈留言