今朝一早起身，因為 book 左去玩Segway，之前在北海道玩過，所以都想試吓東京 Segway ，要去西立川個國營昭和紀念公園，車程預計一小時左右，預D時間去到揾！之前在網上預約，又係要 credit card 比佢 hold 額先，我原本想約星期六，不過天氣預告話會落雨，今日會好天，所以約今日，見佢每個時段有6個位，訂果陣得我一個，唔知仲有冇其他人，因為我都係出發前兩日先訂！
由東京站搭中央線快速，去到立川站轉青梅線一個站就到 （後來發現原來中央線係由東京站開出，應該直接由東京站可以直達！）去西立川用左65分鐘，車站一出已經係公園！去到門口公園未開，好多學生等緊，其實仲有幾個人等緊，有D帶埋相機、腳架預備影相，公園9:30開門，我book 左10:00，預約果度話9:50 在入口果支 Segway 旗等，我早左，所以四圍影下相，準時9:50 有人行出嚟揾我，我地行去一個辦公室，照例要填D野，佢呢度會全程幫你影相，因為你玩緊嘅時候係唔可以影相，佢今日有兩個導師，因為教果個唔識英文，另一個做翻譯，要兩個人招呼我一個真係唔好意思，佢哋問我有冇玩過，我比上次在十勝影果D相比佢睇，佢地話唔同公司，佢地在北海道都有，仲有話教練4-10月會去北海道教！
攪掂文件就出去練習，佢呢度D Segway 車比十勝果架細DD，因為我學過所以練一下就上手，跟住一路同兩個教練遊公園，教練會介紹下公園，我哋先去咗一個大草地，草地中間有一棵大樹，教練話佢有個百年歷史，係呢個公園嘅代表，之後我哋又去咗睇紅葉，又上左個小斜坡睇富士山，可以遠眺到富士山，今日仲好好天，富士山亦都冇雲遮住，真係好幸運！我諗如果自己嚟，係唔會搵到呢個斜坡睇富士山，雖然有其他位置都睇到，但係冇呢個位睇得咁靚！又去另一個斜坡睇附近軍事基地，雖然望唔到，但係佢不斷有直升機來回，就知道果邊係軍事基地！
行到咁上下我哋就去休息，去咗一間茶室，每人有一杯抹茶，我就多一件小食，係紅豆和果子，味道幾好，飲茶嘅時候我哋坐室外，可以望到有個水池，仲有少少紅葉，加上天氣好，環境好舒服！休息完再繼續行程，去咗一條長長嘅路，兩邊種滿銀杏樹，可惜樹葉已經落左大半，冇早幾日咁靚，成個地下都係黃色嘅樹葉，樹枝有少少禿禿地，仲見到有一對新人喺度影相！呢條銀杏路旁邊有間小店，可以在小店戶外 BBQ，都幾特別！😄睇完銀杏樹就返返去辦公室，完成埋最後功課，佢有個簿仔俾你寫低行程，又有個公園地圖，俾你畫返今日嘅路線，佢話下次帶呢本簿嚟玩 Segway，可以減1000円！其實呢個公園好大，我地揸 Segway 當然好方便，如果行路真係行到腳軟！話咁快完成兩小時嘅 Segway，可惜佢冇自由活動時間，上次在北海道十勝，可以有10分鐘自由時間，在草地上自己玩，呢度就冇啦，因為呢度冇大草地，而且人比較多，唔適宜自由活動！臨走果陣導師話如果去横濱玩 Segway 要有駕駛執照，因為會揸 Segway 出馬路！
離開西立川返車去渋谷，再行過 Scramble square ，因為尋日閂晒門行唔到，地面果層係賣手信，有好多間店，都好吸引，不過呢度嘅手信偏貴，部份賣朱古力嘅更加係好貴，有D蛋糕都好靚，但係要冷藏，唔適宜做手信，其中一間最多人排隊嘅叫做Échiré，不過佢賣嘅都係即食果種法國糕點，好似 Madeleine 、cannelé，排晒長龍，仲要好多都賣晒！ 睇咗陣見到有一間賣脆條配醬料，佢有得試食，食咗一個羅勒醬都幾好味，不過佢話開咗蓋之後，要冷藏及一個禮拜內食晒，我就覺得份量太多，除非果一個禮拜每日都食，同埋雪凍左沾脆條食應該冇咁好食，不過脆條本身都幾好味，所以我淨係買咗脆條！
行咗一陣間肚餓，去搵嘢食，尋晚見到其中一間叫做 Tsuru Ton Tan食烏冬嘅店好多人排隊，今日再睇下，都係多人排隊，不過都係十幾個人，同埋見到裏面其實有位，所以就去排，排左15分鐘就有位，睇睇餐牌，全部都係烏冬，真係好難揀！最後揀咗 Sukiyaki 烏冬，另外佢有D剌身，見到有馬剌，就試吓！印象中未食過，佢個樣好似雪花牛肉，食落口質感好似冇魚腥味的鱆紅魚刺身咁，煙煙韌韌，冇乜味！個烏冬用一個好大嘅碗裝住，有埋圍裙比你，味道都 ok ！
食完野再喺商場行咗一陣，見到其中一層有一舊好似雲咁樣嘅裝飾，好多人都喺度影相， 舊雲嘅下底有一間小店，主要係賣飲品、雪糕，佢其中一款飲品係有D棉花糖好似做咗一舊雲咁，所以買咗杯試吓飲，另外仲試咗佢哋嘅豆乳抺茶雪糕！
在附近行咗一陣，見到有一間店，賣D古靈精怪野，其中有D昆蟲嘅零食，應該係昆蟲乾，見佢寫住 from 泰國，價錢都唔平，原本想買包試吓，但我覺得佢個價錢唔值，所以冇試！行完街就落去新宿，因為約咗朋友食飯，朋友去咗北海道，今日會過嚟東京，所以約左今晚食飯，佢地後日就走，我哋原本約咗去食一間叫做鳥良嘅食店，但係上到去冇位，所以我哋改咗去歌舞伎町果邊睇吓有咩食，最後去咗山內農場！！好明顯佢哋唔係好鍾意試新野，同埋佢哋要可以食煙嘅地方，之前同朋友去過一間叫做塚田農場，都係同一個集團，我哋就覺得啲嘢食麻麻哋，不過佢係居酒屋咁嘅氣氛，佢哋就係鍾意佢可以食煙！上到去啱啱好有位，朋友負責叫嘢食，因為佢哋熟D，跟住叫咗飲品放題，我同朋友就飲梅酒，佢太太就飲Sour，老實講食物嘅質素真係麻麻地，不過大家志在傾吓計飲下酒！
食完野分道揚鑣，佢地住池袋，同我相反方向，我返到酒店都好攰，冲個涼就瞓！明天又要早起身！
沒有留言:
發佈留言