今日 Book 左 fine dining lunch ，之前睇 Do 姐晚間看地球，有一集在東京和 Bosco 去食 Fine dining 覺得好吸引！所以揾左果間食店，位於六本木西麻布，先要上網預約，見佢一個人都可以 book ，睇左佢餐牌，見午餐價錢幾千円有交易，晚餐要萬幾円，預計仲要加錢 upgrade 食材，所以都係揀午餐化算D！網上預約要俾信用卡資料，因為太遲取消嘅話要比50%至100%訂金，同埋俾錢嘅時候已經可以揀定要邊一個餐，佢只係會hold住你個額，直至到你現身，然後再計數，因為你可能會加飲品或者其他食物，因為佢午餐淨係包一杯咖啡或茶，如果你要飲酒或者其他飲品都要另外計錢，原先諗住約12點，但係佢顯示要12:15pm先有位，所以就約12:15 PM，由酒店去餐廳，先行去銀座站，行出去中央通嘅時候見到有間三越，所以先去三越行左陣，攞左張旅客折扣咭，有5%折，有效期三年，在地下果層睇啱左個頸巾扣，其實唔係新野，以前都見過，今次覺得佢幾靚，所以買左個，有折又可退稅！
然後就去搭日比谷線直接過去六本木！去到六本木站，搵1C出口，1C 出口一出去就係六本木Hills，商場呢個位置係圓形嘅，好容易認，之前已經嚟過，沿着扶手電梯上去就會見到佢哋好似蜘蛛咁嘅藝術品，行右手邊就係去Grand Hyatt 酒店，落左扶手電梯，沿住 Grand Hyatt 酒店行，見到有間北京菜館，旁邊有間 Lawson，繼續行就見到一間 Family Mart 外牆有D紅色柱，好似 W字咁，佢旁邊果條行入去，唔使一分鐘就見到一座 building 有兩支藍色國旗，係希臘領事館，餐廳就在它旁邊！
餐廳名叫做 Eneko Tokyo ，可以在佢地 web site 直接訂枱，https://eneko.tokyo/sp/
睇佢哋網頁上面介紹，話佢哋由2012年開始連續六年攞到米芝蓮三星嘅西/葡菜，午餐由5000円起，至13000円，分別係6-8道菜，晚餐就13000-20000円，我比預約時間早左半小時到達，因為驚揾唔到，原來都好易搵，因為餐廳12:00pm 先開，所以在外面影下相先，店員好醒目，見到我就知我訂左枱仲講得出我名，應該得我訂左一位，其他客兩位以上，佢安排我坐在酒吧坐住先，之後入去一個叫做 Garden 既房，佈置係田園風，枱面有D植物，呢個 area 係食餐前小食同 welcome drink 的， welcome drink 有白酒或另一款唔知乜嘢酒，因為聽唔明日本口音的英文！白酒質素都可以，主廚好似係西班牙人，可能用西班牙酒都唔定。
餐前小食叫做 picnic ，食物用一個去 picnic 用的藤籃裝住，你自己打開藤籃去體驗旅行的心情，藤籃內有三款食物，三款小食都係一啖一粒，第一個像迷李漢堡包的是炸鰻魚，其實食唔出鰻魚味，不過炸得好脆，個人唔太喜好食炸野，所以唔太喜歡，另一個紅菜頭卷，外面果層好薄好脆，裡面甜甜地幾好味！最後係一粒好似蕃茄咁波波，是最特別的一款，其實它不是蕃茄，紅色外層像一層薄薄脆，一咳爆開，裡面凍凍地像飲品但沒有酒精，好有驚喜！👇🏻👇🏻
食完小食就上樓上用餐區，呢度地方唔大，大約十張枱左右，另外仲有房，一入門口有個 open kitchen ，睇落好似係處理D前菜、甜品既地方，應該另外仲有廚房！今日前後只有五枱客，侍應大約有三、四個，其中一個比較好junior 嘅侍應原來係中國人，佢同我講國語，其他人客都係日本人，衣著比較斯文，我就好 casual ，一睇就知係遊客！
因為一早訂左餐，所以攞左我訂果個餐的餐單比我，六道菜已經食咗餐前小食 picnic，跟住係 starter ， starter 分開兩款，第一款係 truffle egg，先有一個侍應會擺一張枱仔，在你面前整，枱上面有一隻匙羹，匙羹上有一個蛋黃，跟住佢攞個針筒，將D汁料打到入個蛋黃入面，佢有少少似分子料理，又係要一啖過食左佢，個口感好特別，因為你諗住佢係一個雞蛋，但係佢裏面有D暖暖地嘅truffle 汁，好有趣嘅一個 starter！
👇🏻👇🏻
👇🏻👇🏻
另一個人starter 係鰹魚肉，有兩塊炸嘢薄脆係用姜整，中間有舊綠色嘅係 wasabi mustard ，有陣橄欖味，個侍應話有Wasabi，但係就唔係好食得出，可能佢只係落咗好少
👇🏻👇🏻
跟住仲有一個 warm starter，呢個比較簡單，因為寫明係帶子同牛油，上菜嘅時候有一個木盤裝住好多唔同顏色嘅海藻，同埋一舊石頭，好有意境，上面有一粒帶子放咗在一個好細嘅貝殼上，跟住侍應就放左D牛油泡沫落去，然後佢叫我拍video，個侍應倒D液體落個木箱度，跟住個木箱就會出晒煙，好靚嘅一道菜！
👇🏻👇🏻
主菜方面有三個選擇，主要係魚、羊、牛，如果揀牛係要加錢，原本想食羊，最後都係諗住試吓佢個牛，佢係牛柳配個椰菜花醬，牛肉質素同味道都唔錯！👇🏻👇🏻
最後去到甜品有兩款，一款係無花果蛋糕，好簡單就係無花果味蛋糕 😅，上面有無花果肉同埋 sherbet ，清清地，唔錯！👇🏻👇🏻
最後，Petits fours ，顧名思義係四款甜品，其實有五款，由識講國語果個侍應負責，佢會成個箱攞過嚟，個箱入邊裝晒五款甜品，然後佢介紹完之後，每一款夾一件俾我，佢好緊張，隻手不停在震，而且最後有一粒好唔聽話，黐住個夾，令佢好尷尬，搞咗好耐先至整得甩，五款甜品入面有羅勒乳酪棒棒糖、玫瑰啫喱糖、macaron 、柚子朱古力同埋咖啡雲，好在5款甜品都唔會整得好甜，好啱我食，羅勒乳酪棒棒糖嘅羅勒味好濃郁，其餘都唔算好特別！👇🏻👇🏻
整體來講食物質素高，店員服務好好，雖然每樣食物嘅份量都細少少，但係食晒其實都好夠飽，臨走之前去一去洗手間，洗手間當然係好乾淨啦，佢仲有埋漱口水供應添，而且用嘅洗手液同護膚品都係 Aesop 牌子，之前訂位嘅時候雖然俾咗Credit卡，不過佢只係hold住你個額頭，你走嘅時候，先至會幫你計數再碌卡，走果陣，外套已經放在接待處，我沿路再影相，希望下次同朋友再來！
下個行程就係去 Grandberry Park ，呢個outlet在11月13號先至開張，知道佢將會有一個Snoopy館呢幾日會開，因為唔係特別喜好Snoopy，所以都唔等佢，我搭 JR 由六本木搭 Métro 日比谷綠去惠比壽，搭一個站去渋谷轉東急田園都市線，直接去到南町田 Grandberry Park 站，一落車已經係 Grandberry Park ，月台已經有個 Snoopy ，之前上網睇過，呢度有二百幾間店，日本 outlet 來講算細，而且冇乜大牌子，主打家庭及山系產品，以及歡迎帶狗狗前來，始終佢新開，又唔遠，可以過來行下！呢度仲有戲院，好啱一家大細，亦見唔少人帶狗仔來行街，呢度有賣寵物用品嘅店，亦都有幾間專賣露營，郊外旅行用品嘅店，有一間店出面仲有個水池同埋攀石，賣衫嘅店多數都係運動服裝之類，好快行完一個圈，因為都唔係好啱我，見到成個商場最多人的店竟然係貢茶！走嘅時候天色開始轉黑，搭返東急田園都市先落返去渋谷，呢班車係特急，所以回程快過去程兩、三個字，半小時左右便到渋谷！
今次去渋谷主要係去新開嘅 Shibuya Scramble Square，上次來渋谷呢度仲係地盤，佢啱啱開咗好似兩星期左右，先上去 Shibuya Sky ，有架專用電梯直接上14樓售票處，入場費要2000円，今日唔係好多人，即場買飛可以即刻上，搭佢哋專用電梯上去45樓，上到去需要將隨身物品放入locker，可以帶手機同相機，相機一定要有相機帶，唔可以用自拍棍或者腳架，放低野落locker，行出去就已經睇到附近嘅夜景，仲要上多一層先至係天台，天台四面都係玻璃，有職員看守，行一個圈都好快，大家都在佢哋最標誌嘅位置影相，呢度要排隊，不過佢地面有幾行燈，光線打上去面度，影出嚟效果麻麻地！anyway 到此一遊 !
影完已經八點，原本諗住行吓下面嘅shop，已經全部關門，見到地面果層有好多手信店，唯有睇吓邊日再嚟多次啦！
沒有留言:
發佈留言