雖然9月去左一轉北海道，始終掛念住東京，相隔差不多十個月，再次出發前往東京，今次 plan 左小小行程，覺得時間唔多夠，盡量安排順路行程啦！
今次又搭 HK Express ，早上9:20 機，呢幾日又話香港航空有可能執笠，每年都話執笠！好彩唔係搭香港航空！今朝又撘 N巴，巴士準時到站，睇巴士路線要差不多30個站先到我屋企附近，但係35分鐘就可以由總站來到！今日架車唔多人，仲有位坐，上次係爆晒！大約35分鐘就到機場，最近T2關閉左，因為要配合第三條跑道擴建，而 T1都加多左接待 counter！
去 HK express counter 寄行李，然後就過關，因為要去食早餐，唔知會唔會好似上次咁多人排隊，所以早D入去，而且出面都冇乜野行！依家自助過關都好方便，行李檢查亦都好快，因為今日個機場都唔多人，過完關就搭冇人列車去40號閘，今日 premium lounge 唔太多人，但係都要排一陣間隊，都好快入得去，依家 Premium lounge 已經冇支裝水供應，可能佢見好多人都攞幾支走，所以佢而家只係供應罐裝梳打水，我差唔多食完野嘅時候竟然遇見一個朋友，佢自己一個去台灣，佢話平時去1號閘果邊食早餐，但係佢話果邊打晒蛇餅，所以都過嚟呢邊食，因為佢同我一樣，要在200幾號閘果邊上機，佢早我十幾分鐘機，所以一齊過去，過到去大家分道揚鑣！
今次班機有幾個大陸女人，所以嘈左D，機師話飛行時間係3小時30分鐘 （咁快？）我上機後都好快瞓著左，瞓咗個幾鐘就醒啦，跟住攞 部 tablet 出嚟睇戲，之前download 咗套小飛象，啱啱好有兩個鐘頭時間可以睇戲，睇到結尾就到埗喇！今次過關好快，因為唔多人，過完關我就去搵下有冇locker可以放低行李，因為要去成田市，搵唔到locker就直接搭火車過去，揀咗搭京成本線，一個站就可到，到時再睇下有冇locker，雖然得壹個站，但係都收費262円！今次用咗西瓜卡個app，搭車都好方便！
去到成田市見到有locker，要700円，但係我冇Coins，附近又冇得找換，唯有拖住個篋去行，因為睇過地圖知道佢只係一條表參道可以行，所以拖住個篋應該冇問題，不過原來D路都幾窄，同埋比想像中多人行，而D人主要係居民，唔係遊客，仲有路過D車都幾密，根據車站指示去表參道個方向行，沿路見到其實有好多食店，仲有一D商店，個感覺有D似上次去九州嘅由布院，因為我見到有幾間舖喺由布院都見到有，可能係時間嘅關係啦，我去到嘅時候四點幾，好多食店都冇開，商店都係比較冷清，遇啱學生放學時間，所以條街好多學生！
沿路行就去搵鰻魚店，因為之前上網睇咗有間叫做川豐嘅鰻魚店，所以過去睇吓有冇得食，行到過去見到佢有開，平時門口會有D師傅喺度劏魚及串起鰻魚，今日去到就啱啱D師傅收檔，無緣睇到！店入面有枱櫈位，亦有榻榻米 ，當然榻榻米要除鞋啦！所以都係揀枱櫈位！叫左一客大鰻魚飯，同鰻魚肝，呢度係先俾咗錢，然後比張飛你，坐低之後有人收飛，然後就等佢上菜，好快就有得食，因為入嚟嘅時候，已經見到佢哋喺門口不停燒緊鰻魚，鰻魚燒得好靚，味道都唔錯，好食！個鰻魚肝我以為係燒嘅，原來係汁煮嘅，不過味道都OK，係咸左少少，食完野由表參道行對面馬路返番去車站，行到差唔多去到車站，就見到有間商店係賣行李牌，可以揀你想要刺繡個名，所以我都買咗幾個，不過都要等成半個鐘，因為來嘅時候見唔到，如果唔係入來果陣訂左先，走果陣先攞就啱啱好啦，成條表參道一來一回唔使兩個鐘行完，去到火車站，今次搭JR返機場，其實表參道在京成本線同埋JR車站中間，所以搭其中一條線去都一樣方便，回程搭JR去到 Terminal 2，去買NEX 套票，今朝在機場遇到friend嘅時候，佢話俾我聽網上做緊特價4070円，其實現場買都係一樣4070円，但係千祈唔好在自動售賣機果度買，因為自助售賣機係冇折扣，要排最長龍外國旅客果條隊果度買，因為要出示Passport先至有優惠，其實搭過好多次 NEX，買咗好多次飛，今次覺得啲職員態度真係唔係幾好，好似好唔耐煩咁，係日本來講呢種服務都算係好差 !
搭火車去東京大約一個鐘，由機場開出第一個站已經係東京站，在東京站轉車兩個站就到新橋，從車站出來，行大約五分鐘就到酒店，在酒店放低行李，就出去行下，呢度其實好近銀座，夜晚都好熱鬧，而且好多名店，酒店附近好似有D高級會所，因為見好多著和服或者晚禮服的女仕，開頭見到一、兩個以為有宴會，後來見到都幾多，而且在大厦入口招呼D男士，我諗係夜店入口吧！
沒有留言:
發佈留言