凌晨三點幾就起身，因為第一班纜車係4:30 ，而我哋呢度去纜車站大概要8-10分鐘，我哋4:00出門口，落到大堂已經見到大排長龍等shuttle，我哋在大堂等好友揸架車過嚟，接待處的小姐同我地講，建議我地坐shuttle，原因係去到纜車站會比shuttle 嘅乘客優先入站，揸車嘅人要排到最後，所以我地唯有放棄揸車，跟住人龍去排隊，不過都好快，因為一早門口已經有幾間shuttle 等緊，大概上咗三、四格車就送晒我哋去纜車站！
去到纜車站望到有兩條隊，一條係旅遊巴shuttle人客，而站嘅另一邊應該就係私家車條隊，入咗纜車站都有好多人，因為上纜車需時，每架纜車可以坐四個人，我地三個坐埋一架，上山嘅時候因為天未光，所以望出去其實乜嘢都睇唔到，上到去纜車站，旁邊有間咖啡店，出面有好多座位，就係平時睇佢嘅宣傳相果個位置，上到山氣溫好低，不過佢有一D藍色外套供應，我哋諗住去攞返件着，去到只係見到剩返兩件童裝，不過果兩件童裝都幾大件，我地有理冇理攞咗先，我地兩個女士竟然着得到！所以我兩個有外套着都好過冇，在餐廳旁邊上多一層，係另一個平台，可以望到餐廳果個平台，其實我覺得除非你搭第一架車過嚟，否則都唔可以係第一批上到去，之所以要第一批上去，因為要有利位置就要第一班車嘅人先至攞到，否則你係一定要企人地嘅後面，無論有冇雲海，想影個靚D嘅 view都有困難 !
尋日已經預告左睇到雲海嘅機會率只有20%，上到嚟當然係冇雲海睇啦，既然睇唔到雲海，太陽又未出來，就去其他地方啦，沿住順路行，第一個景點係山上面嘅郵局 Unkai post，你可以買一張 ¥200 嘅明信片，寫上地址，然後放入藍白色郵筒就會幫你寄，唔使另外比郵費！我同好友都各自寫左張明信片比自己寄返屋企！
過咗郵局之後有幾張高櫈 Cloud Bar，個高櫈係大概有十幾呎高，要爬上去坐低影相，我都有爬上去不過畏高嘅我真係好驚，因為佢在路邊，下面係山崖，而且一路爬一路搖，所以都咪話唔驚，由於天未光所以好難影到好睇！影出嚟只有黑影！
再行前D係 Cloud Walk，係一段伸出山外面嘅觀景橋，在橋上面影相效果唔係咁特別，反而離開咗 Cloud walk ，再行過D既 Sky wedge ，望返轉頭可以影晒成個 Cloud walk 都幾靚，所以佢有個指示牌話比人聽呢度係 Photo spot ！再行上係 Cloud bed，係有一D圓型嘅波波組成，類似雲嘅形狀，我唔知佢有咩特別作用，我覺得佢可能只係裝飾？ 跟住係 Contour bench ，其實係幾行木櫈，俾人坐喺度睇景或者休息一下！我哋去到呢個位置見到太陽開始出來！最後一個景點係 Cloud pool ，我以為佢係金屬做，原來個網係用繩做，換句話講你要花的力氣先可以企上去，因為唔容易企得穩，所以每次最多只能夠企10個人，就算上到去影相效果都唔理想，因為兩個人都企唔穩，加上天仲未光，影出嚟都係比較暗！
行晒咁多個景點之後，就有條路落返去郵筒，然後去返纜車站還返件外套，就搭纜車走，其實我覺得如果知道果日睇到雲海嘅機會率係非常低，可以唔使咁早上去，因為第一班纜車係最多人，除非你想睇日出，如果唔係晏小小去仲好，一來冇咁多人，要搵個好D嘅位置都易D，二來天色會好D影相出來都好睇D，當然如果機會率高嘅話，就一定要咁早先睇得到，上去官網其實佢會報告過去七日睇到雲海機會有幾大，我睇咗呢幾個禮拜，佢大概每個星期有一日有雲海出現，當然佢睇到個雲海嘅意思，唔一定係你心目中好似海報果個雲海咁靚，坐 shuttle 走嘅時候見到車上面有一幅相，應該係近期出現最靚嘅雲海嘅相，個日期係今年嘅7月7日，所以我覺得，可能近幾個月可能都冇一次雲海係好靚，所以冇再update新相！
去到酒店附近先去食個早餐，食完早餐都係七點幾，大家都要返酒店休息一下，因為好友要揸車唔夠瞓會好大影響，而且11點先至check out ，所以我哋可以小睡兩個鐘左右！呢兩個幾鐘真係好好訓，而且好大幫助，當堂精神好多，夠鐘11點就去check out ，然後就離開星野度假村喇，之後都唔知有冇機會再嚟！
下一個站係去十勝，由於仲有時間，所以我哋去附近搵個位置放飛機，去咗一個叫做日勝峠嘅地方，就響度放飛機，點知出咗意外，好友架飛機唔見咗！我哋去咗附近一個地方，係飛機最後出現嘅位置，搵左一輪都搵唔到，由於我哋夠鐘去下一個點，所以暫時放棄，晏D睇下或者再返嚟搵！
跟住我地揸車去十勝千年之森玩 Segway，之前在網上預約左，去到之後有一個識講國語嘅導師，負責接待我地，首先我哋要填一D個人資料，然後揀一個頭盔，導師話今日天氣比較凍，所以俾咗對手套我哋，我同好友都用緊一個斜孭袋仔，佢建議我地用背囊，佢都有背囊提供，所以我哋將個袋仔放咗入背囊，準備好晒裝備之後，佢就講解今日嘅行程，首先要跟佢練習半小時，然後我地會去一個休息站，旁邊可以睇吓羊，亦都可以買飼料餵羊，然後行一段路，到第二個休息站，可以去洗手間，再有10分鐘自由時間，聽完講解之後就跟佢一齊出去練習，由最基本點樣開動架車，然後點樣前後左右控制，然後慢慢跟着導師行一段路，又要行上斜路同落斜路，開頭有啲論盡，不過慢慢都掌握到個技巧，其實主要係講平衡，基本上係重量決定方向！
我地去到第一個休息站，飲杯水，睇下羊，見到隻羊有個木框在頸上，導師說是阻止佢跳出圍欄，睇完羊繼續用 Segway 行一段草地上山，上到山，風景好靚，今日天氣好好，導師話向住山大叫會有回音，我地試左大叫真係有！我地都影左一陣相，然後落去山腰，去到第二個休息站，可以去厠所，睇下花，見到一種叫做羊耳朵的草，質感真的很像動物的耳朵，很有趣！
休息完之後是自由活動時間，我地可以在草地上自己駕駛10分鐘，導師一放我地自己去玩，大家即刻風馳電掣，飛快走到好遠，而且車速很快，剛才跟在導師後面還是戰戰兢兢，一放我地自己活動，即刻變脫韁野馬！好攪笑！導師在旁睇住我地，又幫我地影相和拍片，好快10分鐘就完結！真係想繼續玩！其實我地都玩多左幾分鐘！結束左我地今次 Stage 1 體驗之後，去返接待處，交還背包和頭盔後，在小店睇左一陣就走，真期望再來玩 Stage 2！
在千年之森走的時候三點幾，天未黑，我地再去返日勝峠揾飛機，揾左成個鐘都係揾唔到，好友決定放棄了！開車去帶廣的路程上，好友心情壞透了，大家都 dead air，他太太即時上網 Check 佢地份保險包唔包，又搵保險朋友問，話應該有得賠，但要有報案紙，我地先去酒店 check in ，然後要去報警 ！
今晚住帶廣站前里士滿酒店 Richmond hotel Obihiro Ekimae ，check in 時問左酒店職員，警署在火車站旁，我地去到就見到警車，這個算是一個小警崗，裡面只有兩名警員，一個老差骨加一個年輕警員，我地入去，一講英文，兩個警員分別問 English OK? 以為佢地識英文，再講落去，佢地已經答唔到，兩個都只能講非常簡單單字！當然花D時間，加網上翻譯，加身體語言，再加佢地有本翻譯天書，攪左一輪，都溝通到，但係一講到要報案紙 copy 就溝通唔到！我地話要証明文件証明我地有報警，佢地話比唔到，又唔可以影印或影相，佢地打電話搵左一個識小小國語的人，我地又搵左一個識小小日文的人，但係都溝通唔到，因為有D字眼兩邊都唔識講，不過個老差骨好熱心幫我地，打左幾個電話周圍問，終於話我地可以明早去另一個警局，取得報警証明！算係鬆一口氣！走的時候警員還說 sorry 唔識英文幫唔到我地，其實我地好感激佢幫忙就真！
攪掂左之後，我地去食飯，知道附近有屋台，就過去望下，雖然在帶廣站附近有好多洒店，而屋台呢邊都好多食肆，不過條街都好靜，可能因為係淡季吧！去到北の屋台，原來係一條橫街兩邊都係屋台，有一番至四番街，一共只有19間屋台，但看來不是很有歴史那種，而且比較冷清，亦不見有人排隊！我們只是看看便走，因為我地原定去食豚肉丼，只係想睇下屋台有冇令我地改變主意的食店，既然沒有，就照原訂計劃，去食豚肉丼！
店子就在北の屋台旁邊，店名是 帶廣 はげ天，其實佢主要係做天婦羅的，唔知點解做埋豚肉丼，仲要豚肉飯出名過天婦羅！入到去仲有半小時 last order ，我地見餐牌上的豚肉飯只有四片或六片豚肉的分別，今日大家冇食 lunch 都好肚餓，所以叫晒三碗六片的，再加燒扇貝，見 menu 張相得兩隻，所以要叫左兩客先夠分！豚肉飯送來時好香，佢應該係即叫即烤D豚肉，亦可能本身煮熟左肉片，再烤一烤令表面有焦香，個飯來的時候仲熱，而且有炭燒味，個醬汁同白飯都好好味！扇貝來的時候變左每客三隻，可能見我地三個人吧！味道都唔錯，好新鮮！食飽之後，見收銀處有醬汁賣，買支返香港食先！返酒店時，去 7-11 買飲品先再返酒店休息！今日折騰左一日，今晚一定好好瞓！
酒店入住後評價
Richmond hotel Obihiro Ekimae
帶廣站前里士滿酒店
酒店在 JR 帶廣站對面，車站四面都是酒店包圍住，酒店對正站前地標果三隻手雕塑，我地揸車有停車場，但車身太高，要泊隔離果座地庫停車場，酒店的接待處在二樓，要上一層，電梯卻沒有二樓，因為用了 L 字(Lobby) 代替2字，令人誤會電梯不停2樓，接待處很細，只有一、兩個職員，但亦有自助機，旁邊有茶包供住客自取，房內空間較細，單人房或雙人房是一樣大，酒店有小小舊，房價是四百多，個人認為算是合理，早餐在一樓（地面）的餐廳，buffet 型式，食物選擇不多，最特別是豚肉丼和多士，豚肉丼是名物，必然要食，多士味道偏甜，外脆內軟，口感特別！
沒有留言:
發佈留言