之前都知道香港會開驚安殿堂，原來咁快就到開張嘅今日！都係前兩日先知佢今日開張，既然放假就過去望吓啦！
之前在日本行過幾次，其實冇乜嘢啱買，最多係買藥妝類嘅物品，因為日本嘅驚安殿堂，擺設都幾亂，而且地方好逼夾，貨品嘅種類好多，所以擺得密密麻麻，其他野其實都唔係太啱使，而且大部份野都係中國造，可能在 Daiso 反而能夠買到野！因為佢有好多家庭用品，價錢好平，仲有好多都係日本做！同香港嘅$12店有D相似！
講返香港呢間激安殿堂，去到門口已經人頭湧湧，排隊安排有少少混亂，要由商場嘅扶手電梯上去排隊，然後兜返旁邊扶手電梯落，但係其實上到去又冇一條隊，上咗扶手電梯之後，跟住就即刻落返扶手電梯，所以唔明點解要上扶手電梯？定係上面根本冇咁多人排隊？但係由扶手電梯落到去，職員又叫我地上去排隊，但係我地明明係由扶手電梯落嚟，應該係直接入去店，所以都好亂！anyway，都好快入到去！
店入面嘅地方比想像中大，除咗同日本買嘅產品有D相似之外，亦都有牛肉、壽司、水果呢類新鮮食品，亦都有熟食、飯盒，不過藥妝類嘅產品就比較少，好多香港人買嘅藥物呢度都冇！始終都要留番D生意比日本果邊做，零食方面就有好多選擇，酒方面就唔係太多，不過都有齊香港人最熱捧嘅響、獺祭，仲有 Rimowa 行李箱，見到最受歡迎應該係水果，呢期係水蜜桃同埋提子最多人買！水蜜桃係唯一要排隊攞嘅貨品，有好多個收銀counter，收銀位置係非常暢通，因為有10幾個 counter ！
原本想買水蜜桃，但係仲有幾個地方要去，唔想拎住佢，因為水蜜桃係好容易撞瘀嘅，而且佢如果夠多汁的話會好重，所以乜嘢都冇買就走喇！
沒有留言:
發佈留言