又飛了，十二月去左東京，兩個幾月後又飛，原本想去北海道，左計右計覺得太貴！加上二月仍然很凍，所以都係去我最愛的東京！
最近工作不太順利，四面楚歌，危機四伏！趁呢個假期散散心，充充電，回去再拼博！
今次乘搭香港航空，因為見佢做特價，平過 HK express ，只係佢包20kg 行李太少了！如果計埋行李超重費用都係貴多幾百，所以都係買香港航空！去到機場，先影下相先，因為未試過在機場見到新年裝飾，其實都係最後一日，因為見開始拆野！去寄左行李先，零晨機冇乜人，D地勤顧住傾計，好似話緊某人不是，所以說話語氣麻麻！
一上機就落雨，不過都準時起飛，飛機冇電影睇，同埋只係派左包小食包，同一杯飲品，跟住熄燈瞓覺，雖然瞓左有兩小時有多，不過瞓得唔太好，降落前半小時機長便擴播，準備降落！
6:30 便到達 Narita airport ，降落後在跑道行了近半小時才泊好機！過關唔多人，我係呢班機最早過關果幾個，因為好多人一落機去左廁所，我習慣過關後才去，因為排隊需時，越早排越好，因為成班機咁多人，日本人做野比較慢，同一班機早D同遲D可以差好遠，過左關，又係行李等人，攞完行李即刻去買火車票，零晨機冇乜人排隊，應該要試下自助購票，不過已經排左隊，前面只有兩個，下次先試！買左7:44 果班車，在三分鐘後開，即刻走落去上車，其實唔使一分鐘都可以上到車，搭 NEX ，指定席，見架車得幾個人，諗住旁邊冇人坐，點知去到 T2 有人坐我隔離，明明大把位，唔知點解票務員要咁安排？因為係指定席，而且中間亦有幾個站，以為有好多人會上車吧！到落車都係大把位！
去到東京站差不多9:00，今次入住淺草橋的酒店，這個酒店是新開的，應該在今個月15號，即係五日前才開業，由東京站搭山手線，兩個站到秋葉原，再轉總武線一個站到淺草橋，雖然距離東京站只有三個站，但係要轉兩次車，車程只係幾分鐘，去到淺草橋站行去西口出，所以口有電梯，不過呢個電梯先落一層，再轉第二部電梯再落一層，一出閘前左邊就見到一列食店，就在左手邊第一個街口行入去，街口嘅鋪頭寫住Big Bang，行三個街口就到，但係呢三個街口都係橫街，每個街口嘅距離大概係三四個舖位，所以好近，離遠已經望到酒店嘅招牌，門口亦有好多花牌，就知道佢係新開張，酒店走年輕新潮路線，一入門口接待處，酒店職員都係着得比較casual，我先放低行李，今晚先至返來check-in，職員都好友善，接待處旁邊有食嘢嘅地方，亦都有廿四小時售賣飲品同小食，要在此買小食同飲品，要先買一張積分咭，價值1000円，相等於10分，例如買支水要一分，就在張卡扣1分，如此類推！原本想今日去箱根，不過搭咗凌晨機，就唔想咁舟車勞頓，所以今日先去附近行街！
先去豊洲，先要搭JR總武線一個站去秋葉原，再轉山手線搭三個站去有樂町，由JR 有樂町站出，見到 O1O1 轉左一路行，就見到 Metro 有樂町線的入口，搭四個站去豊州，準備去搭百合海鷗線，先見到有個牌寫住定休日，先諗起豊洲同築地一樣，逢星期三係定休日，所以唯有返轉頭！搭返Metro 有樂町線去返JR有樂町，再轉山手線去渋谷！
去到渋谷先去搵新開嘅商場，去咗其中一個叫 Hikarie ，其實呢個商場唔新，我之前都去過，今次去有D唔同咗，買化妝品果層好似大左，因為我都係一、兩年前去過一次，所以唔係好記得，不過呢度地庫食品部好多嘢食，而且睇落都唔錯，不過生果就唔多！上咗去7樓睇下有咩食，原本睇樓層資料果陣，見到6樓有間食鰻魚飯，想去試下，不過架快速電梯直接上到7樓，諗住由7樓行返落一層，但係見到7樓有一間餐廳，有我想食嘅刨芝士，即刻轉呔去試下，間餐廳叫做 Cheese kitchen Racler ，午餐時間，有限量供應的牛肉及漢堡牛肉 set ，叫左一個試試，先來麵包，有個小火爐熱住芝士醬，用來點麵包食，亦有幾件炸脆左的菜和蕃薯點芝士醬食！主菜牛肉和漢堡肉用鐵鍋上菜，之後再有侍應將熱左的芝士拿來，將溶了的芝士刨落牛肉上，不過佢將最外一層邊皮的芝士也刨落去，其實呢條邊比較硬，好似橡筋咁！好硬！破壞左原本的口感！芝士亦不夠香濃，整體而言，失望！行出街見到 Mario 車隊經過，剛剛轉綠燈就走左，可惜影唔切！
食完野，繼續行，去左另一商場，Shibuya Stream ，與其話係商場，不如話係Food court，因為呢度有兩層，兩層都只有食店，呢度好新，應該開左冇幾耐，不過佢亦都唔算好多食店，大約廿間左右，因為啱啱食飽，所以幫襯唔到，既然冇乜野行就走！行出去又見到 Mario 車隊，又影唔切！見到對面有座大廈寫住 Pola，以為係事門店，行到去原來唔係，繼續行多陣就去搭火車落新宿，臨走又見到 Mario 車隊，見到三次，次次都影唔切！
過去新宿行下，先去高島屋，今日竟然係休業日！轉去附近行下，之前在網上搵到一家超市，叫做 Ito Yokada ，可能有賣我飲開果隻梅酒，由歌舞技町行過去大約十分鐘，即管行過去睇睇，由驚安殿堂行過去，中途見到有小條石路，回頭再看，再行過D就見到有個花園神社，行到去目的地果間超市，都係冇我想買的梅酒，其實呢間超市係7-11 同一集團的，我諗佢有貨都轉去7-11賣！行返轉頭，去返花園神社睇下，買左個御守，影下相就走，行返去果條神秘石路，睇地圖呢度係新宿遊歩道公園 四季の路，行入去見到有兩條橫丁，有D食店，應該主要做夜市，好多係居酒屋，再繼續行竟然有間溫泉，估唔到在市區咁旺既地方有温泉！雖然佢寫住天然溫泉，但我估佢係果種直係用天然溫泉水加熱，而唔係附近有泉眼果種！有機會再去試下！
行完一輪，去搵食，行左去思憶橫丁，見時間尚早，好多間都有位，大部分係食串燒同關東煮，見到有一間坐滿客但門外仲有十幾人排隊，唔通呢間好正？我就唔等喇，㨂左一間叫做埼玉屋弐号店，見到大部分客係外國人，而且冇食煙，見仲有二、三個位就入去，叫左燒羊扒、雞五種串燒、雞翼同牛肉！仲叫左杯梅酒，食物質素一般，食緊果陣，有兩個外國人入來，坐在另外兩個外國人旁邊，佢地傾左幾句，跟住好好傾，外國人係比較易溝通 social ，加上兩 pair 人年齡相約，所以啱傾吧！呢類小店雖然迫夾D，如果人多氣氛都幾好！
夜晚返洒店見到都幾靜，不過東口果邊就多D食店，而且多人D，亦都有藥房，因為東口果邊近住都營淺草線的入口，兩個車站接連處，所以比較旺D，返酒店 check in ，行李已送左入我房，順便飲杯 welcome drink ！Detox 水然後先上房休息！酒店比左間雙床房比我，唔知係咪本身冇單人房？因為酒店太新，訂房果陣D房冇相睇！
沒有留言:
發佈留言