2018年4月東京迪士尼樂園35週年之旅 Day 4 - 涉谷、新宿

尋日落雨落到今日，今日仲大雨，仲有D橫風橫雨咁，應該全日都落大雨，呢種天氣打亂晒行程，今朝原本想去築地，不過呢種天氣，築地大部份地方冇瓦遮頭，又多人，肯定好難攪，轉去涉谷，貪佢商場多，可以多時間在室內！

一早食早餐先，近近地在附近食碗烏冬，在はらまるうどん食，幾百円攪掂，跟住去搭 JR 山手線前往涉谷，幾個站就到，在附近行下，見到有個商場叫 Modi，好新，在OIOI對面，不過賣D唔係大路野，見佢冇銀聯咭優惠，就知佢做本地客，多數賣衫！行左一陣，search 下附近原來有幸福 pancake ，又去搵下，停左雨，正值 lunch time ，pancake 應該唔多人掛！跟 google 地圖行，要行斜路，沿路好多食店，見到松屋就到，門口有招牌，上3/F就係，得4枱等緊，應該好快，望入去其實都有吉枱，上次去吉祥寺果間真係爆晒，日本唔興撘枱，所以餐廳如果係多四人枱，就有排等！香港就快開分店，另一間 gram 都會開，唔知質素如何呢？

等左13分鐘就入坐了，呢度仲有個房，旁邊有個 toilet ，個門整到書櫃咁，減低厭惡感！叫左個 Seasonal fruit pancake ，叫左杯 Ice tea ，要等廿分鐘先有得食，個 seasonal fruit 係藍苺醬，pancake 好味 ！ 希望將來香港有返呢個水準！走的時候已經滿坐，因為過左兩點鐘，好多人食完返來 食甜品！

幸せのパンケーキ 渋谷店 （A happy pancake) 地址：

東京都渋谷区道玄坂1-18-8 道玄坂プラザ仁科屋ビル 3F官網： http://magia.tokyo

食完pancake 搭車去東京站，諗住買 cheese cookie，果間 Newyork perfect sand 竟然已經賣晒，而 Press Butter sand 就要排隊，原本諗住在東京站買完上去大丸行，依家唔買住，走果日先一早來買！唔出閘，直接搭返去新宿！

返到新宿，先去伊勢丹睇下有冇 Saucepan ，冇！行左一陣，過去 OIOI，去 Mercibeaucoup 買左兩件T shirt，跟住行過去太子酒店果邊，因為要去食烤肉！

在網上見到有人介紹呢間立食的燒肉店，最重要可以一人一爐，而肉類就係每片咁order，唔同嘅肉同埋唔同嘅部位就唔同價錢，見到最貴都係¥300以內，對於我呢D最多食10片左右嘅人就啱晒啦！去到見到門面認得之前見過，因為有一次住太子酒店，見對面有幾多食肆，曾經望過呢間，當時因為爆左場所以冇幫襯，去咗過幾間舖食牛吉列，果間牛吉列就麻麻哋！呢間燒肉店係立食嘅，只有六個爐，我諗每個爐最多比兩個人用，即係話一係一人一爐就有六個客，或者兩人一爐，12個客已經最盡，可能只係企到10-11一個人，因為最出果個爐已經在入口，我未夠六點去到，只係得返兩個位，我企左係門口第二個位，再入多一位女士就已經無位啦，不過食咗一陣其餘果四個都走左，去到六點又會變返有四個位，不過好快又有人入，多數係一個人，食得唔耐！我第一次來覺得好有新鮮感，好彩店員英文都幾好，好過好多酒店職員，佢可以用英文介紹有咩飲品，我叫左杯梅酒，得一款冇得揀，不過味道都OK ，店員問我想食乜嘢，我在門口影咗佢地D木牌，牌上面寫住唔同牛嘅部位，同埋牛嘅產地，不過牛既部位寫日文，產地係漢字，所以我叫個店員介紹五款俾我，我淨係問佢有冇牛舌，佢話有，就叫左牛舌，另外比左四款牛肉，有牛肩、牛臀部、仲有聽唔清楚兩款乜野部位，另外叫左蘆筍同埋冬菇，冬菇俾埋牛油你，燒完搽 D牛油食，仲叫咗碗飯，個牛肩、牛舌同埋有款唔知咩名嘅牛肉好好味，所以要encore ! 跟住我又叫店員介紹多三款未食過嘅牛肉俾我，佢又俾咗另外一種牛腱，同埋有牛肶 位同埋臀部，都係唔同嘅牛，最好食都係栃木縣牛肩同牛舌，一共食咗11塊牛肉，食埋碗飯都好飽，可能頭先食咗pancake唔算好肚餓，下次我一定要再食，店員出出入入做野都有同我傾左幾句計，佢話佢哋都有好多間分店，後來上網搵咗係有八間分店，最搞笑負責切肉個師傅，用國語問我好唔好食，我以為係中國人，佢話係日本人不過識少少國語，仲話自己發音唔正，我就覺得佢講得幾好，差唔多食完果陣見到開始要等位，所以食埋就走喇，下次來東京再食啦！

立喰い燒肉治郎丸 地址：1 Chome-26-3 Kabukichō

官網：http://jiroumaru.jp/