尋晚都幾好瞓，今朝又去絆魚壽司，今次凈係叫D平價壽司，有裙邊、赤貝、牡丹蝦、蟹柳等，賣相仍然欠佳，部分食材新鮮度低左，應該唔會再幫襯，食完壽司，搭車去東京站，先去望下 Press butter sand ，想問下到期日，因為新鮮做，應該唔放得耐！見佢有一個賣！咁就買一個試下先，順便買問下佢到期日，見到有幾部機即時做，見幾個女仔整得有點生手！打開部機時，D餠亂晒！人龍只有6-7人，買一個¥170，問左店員十日內要食，咁遲兩日先買，見對面問 Newyork perfect cheese 仲多人，有十幾人排隊！到時或者兩間都買！一路行去京葉線，食左佢試下，味道唔錯，個餅比較硬，芝士芯就軟，一齊食就啱，幾特別！
去到舞浜，去左 Disney Store 行左個圈先至入園，先去幫好友去 Lost and found 問下佢留低左個相機袋，問完一輪，都係話要本人打電話比佢地，唯有等好友自己攪，先去 shop 行下，今期 Duffy product 都幾靚，行完 shop 再行過去 Gondola 影下相，影影下聽到有人拍手掌，原來有人結婚！一對新人坐上 Gondola ，碼頭有人拉小提琴，仲開埋香檳，然後開船，沿岸遊客都拍手同影相，好浪漫，價錢一定好貴呢！
今日海洋呢邊明顯比樂園果邊靜，少人D，見到有幾個位置都圍左板翻新，好多佈置仍然以復活節做主題，行到去船果邊，之前食過船入面 S.S.Columbia Deck B 果間 Dinning room，上次去 full 晒冇位，今次見有侍應在樓下介紹，即係冇乜人？上到去要等位，正值一點幾，午餐時間，話要等45分鐘，見前得三、四枱，咁就等下，等左廿分鐘左右，可以入坐，得返我同後面一枱等，好多人聽到45分鐘都唔等，入到餐廳見到大把位，大約有十多張枱係冇人坐！日本真係好奇怪，唔知佢地係咪定左幾多個侍應對幾多個客，在商言商梗係做多一單得一單！不過日本人好難講！頭先六、七枱等位，其實可以一次過入晒仲有枱剩！唔怪得唔多見有人走，但係又有位入人啦！仲要一路有D攞左飛返來都有位！
一坐低，叫左燒牛肉配龍蝦尾，先來沙律，然後麵包，佢個軟包都幾好食，跟往來牛肉，見佢冇龍蝦尾，以為分開上，食完牛肉睇返餐牌張相，我諗佢落錯單，比左淨係燒牛肉果個餐，因為燒牛肉餐塊牛肉大塊D，配龍蝦就會係三片燒牛肉，食完先發現，咁冇辦法啦上！一心想食龍蝦，冇得食！最後上埋甜品，呢度食物質素幾好，服務亦好好！餐廳環境有少少鐵達尼 feel，所以我幾鐘意食呢間！
食飽左去搵D野玩下，原本想玩新果個 Nemo & friends , Sea rider ，好長龍，轉左玩隔離果個，基本上唔使排隊，好快可以玩，跟住去訂35週年掛飾，呢兩年，Sea 都出掛飾，前年果個幾靚，今年果個冇咁特別，不過話晒35週年版本，就買返個！行返去Toy story 果邊，睇下有冇得玩，見今日好多遊戲仲有 fastpass 攞，Toy story 就冇！見排隊60分鐘，又排下！呢個3D遊戲都幾好玩，由排隊到玩完出來都係45分鐘，算快了！出來見平日勁多人的 Big Band Beat，冇乜人，仲有30分鐘開始，又去排下，排左十分鐘就可以入場，原來呢個劇院都幾大，有兩層，我坐樓上第一行，都睇得清楚，其實呢個係現場樂隊演奏，加埋現場演唱，仲有埋米奇、米妮、Daisy同埋 Goofy 表演，主要係20至40年代百老匯式歌舞，表現都唔錯，氣氛好好，尚算精彩，可惜唔俾影相！
睇完劇出嚟，仍然係落雨，去攞返個掛飾，行返出嚟，見到 Sea rider 無人排隊，咁就玩埋先啦，雖然埋去果陣冇人排隊，可能佢要等夠人，都係要等到有返咁上下人數，先至可以入去，呢度之前玩過一次，係類似潛艇咁樣，當時覺得呢度好殘舊，後來去年翻新左，變咗宜家呢個 Sea rider ，入到去見到個機艙同之前係一樣，只係翻新左唔同顏色，個玩法都係相近，只係畫面轉咗做 Nemo ，當然個畫面又新又靚，呢個都幾啱小朋友玩！
今日行程差不多啦，諗住去貢多拉果邊食晚飯，見佢個晚餐都幾貴，而且份量都唔少，所以都係去返我只至愛嘅餐廳 度食個意粉算啦，因為唔想返到新宿先至食，食完又瞓覺，冇乜時間消化，所以都係食完先至返去，食完飯最後衝刺，就係shopping ，不過買嘢真係唔多，只係買咗幾件，好快就走喇！我見到好多人走，因為都幾大雨，搭迪士尼線一個站就到舞濱，經過商場嘅時候，見到賣帽嘅果間 Override，又入去睇下，因為見佢做緊夏天草帽 promotion ，因為我要去放飛機，好多時都好曬，如果帶 Cap 帽又比較熱，但係一頂闊邊嘅草帽就啱喇！見到有一頂可以防UV，戴上去試下又幾好睇，仲可以捲埋方便收藏，頂帽上面有條闊絲帶蝴蝶，有幾個顏色，試齊晒都係黑色絲帶最好睇，店員都覺得啡色草帽配黑色絲帶蝴蝶最啱我，所以都係買咗黑色絲帶果頂，買完晒野返去囉，都好攰，搭火車由舞浜去東京都有得坐，但係東京返新宿就要企，返到新宿快快脆脆返酒店，又去7-11 買咗一包菠蘿，7-11 真係好多野賣，連最多遊客要食嘅水果都有，不過可能冇乜人知，睇佢個樣好似賣唔晒，反而尋晚見到果堆月餅，就賣咗幾個！
沒有留言:
發佈留言