2018年4月東京迪士尼樂園35週年之旅 Day 2 - Tokyo Disneyland

今日要入園喇！今日有點涼，先去食壽司，去我最鐘意去果間絆魚壽司，今次覺得佢質素下降，壽司做得頗為求其，外觀欠佳之餘，新鮮度也減低，尢其拖羅，不知是否他們晚上做壽司放題，入左D差D既食材呢？反而貝殻類都ok 好食，食完匆匆離開！

入去東京迪士尼，由JR 新宿站搭中央線（快速）橙色果條線，在7。8號月台，往御茶ノ水、東京方面，火車都頗頻密，過左9:00繁忙時間，唔太多人，搭4個站，13分鐘就到東京站，落左車，落一層轉車大堂（唔使出閘），會有好多指示，話俾你聽邊個方向去京葉線（武蔵野線），有好多手信店，見到今期大熱 Press butter sand ，埋去望下，每人限買五盒！收22:00，如果今晚走先買應該賣晒，搵一日過來買，去迪士尼應該買唔到！認住佢在丸の內南口的出閘口，近住5號月台入口斜對面！佢對面有間叫 Newyork perfect cheese ，有D類似，唔知得唔得？

繼續前往京葉線，呢段路大約行十分鐘，沿途好多野賣，吸引到人停低睇，十分鐘路程隨時行左成個鐘！不過呢度收得夜D，多數十點，方便樂園出來的客人，所以我唔會停留，留返夜晚先，費事拎咁多野入園！去到京葉線，去得京葉線大部份人都係去廸士尼，所以跟人群行就冇錯，京葉線有1。2號同3。4號月台，兩邊月台都寫住去一樣的地方，但係人人地去3。4號月台，次次見到都係咁，冇去研究點解，反正跟大隊冇錯，只要架車經舞浜就得喇！今次撘快速線，三個站就到舞浜，如果搭各駅停線就要停6個站！

去到舞浜，全部人都係去廸士尼，先去買車飛，廸士尼線車飛，一日飛¥650，今期有35週年飛，有米奇、米妮版本，仲有 Easter 主題飛賣，買完飛在車站內影相，然後搭一個站去廸士尼樂園站，在售票處買左兩日券，今日都幾多人，而且外藉人士較多，以前覺得好多大陸人，後來好多泰國人，近期多左外國人，今日都好多！

一入場在入口位置影下相，在大街有一座擺設，上面有每五年週年紀念的米奇，造型跟返當年，上次30週年紅+金，我都記得！呢個擺設每五分鐘播一次音樂，前面排長龍影相，我都影左張！影完一輪相去搵D野食，周圍都勁多人！搵到一間食熱狗的，其實我唔多食腸仔，不過冇乜選擇，太多人了，買個熱狗餐，在公園長櫈坐低食，呢間熱狗店，出左一款超長腸仔熱狗，見好多人食，我就冇試喇！

食完野行左兩圈，覺得冇乜野買，就坐低等睇巡遊，今年因為35週年，所以有新巡遊，老實說，唔算精彩，講到巡遊，呢樣係日本迪士尼唯一輸比香港迪士尼的！不論音樂同花車，日間定夜間巡遊，都輸晒！睇完巡遊幫好友搵 McQueen 爆谷桶，又比我搵到！跟住去左 Haunted House 玩，上次玩過，見早D果陣排長龍，依家少左好多人，就去排下，全程排隊到玩完出來 45分鐘！見到小小世界都要排60分鐘，佢都算快！

出到來都6:00，天快黑了，去搵野食，見到有間 Hungry Bear restaurant ，成間都食咖哩，叫左個Hungry Bear curry，加左沙律，都幾大份，食到好飽！好彩早D去，晏小小又爆場！食完飯在附近行下，見一間 shop 有得著西部牛仔裝影相，我想起第一次來東京迪士尼都影過類似的相！當然佈置同依家唔同，比較少去樂園呢邊，所以都影返張玩下！

影完相行一陣，都冇收獲，早少少走人，搭返迪士尼綫三個站去返舞浜火車站，其實可以行過去火車站，不過有一日乘車券就坐下先！避開最多人走既時候，就有位坐，去到東京站，兩間 cheese cookies 店都賣晒！！！

早D返酒店休息，去7-11 買梅酒，見到佢地竟然有月餅賣，雖然係迷你月餅，一個個賣，但係邊有人買架！