又出發𠶜！
去年11月去過東京，三月去過大阪，今日再飛東京！真係好掛住東京，今次心情特別興奮，今年係東京廸士尼樂園35週年，每五年都有一次大型活動，上次30週年同好友一齊去，玩得好開心！可惜今次好友未能同行！過去五年對果次行程一直津津樂道！雖然廸士尼海洋早兩都有15週年活動，但始終不及樂園呢邊活動精彩！所以今次都好期待，好興奮！
今次坐 JAL ！好耐冇撘過 JAL ，記得人生第一次去日本就係搭 JAL，近年搭國泰為主，因為 JAL 一向好貴，今次我廿幾日前先 confirm 到假期，遲左訂機票，價錢比平時貴左幾百，竟然JAL 差不多價錢？咁就搭下佢！
早上10:40 機，有點晏，因為去到日本都當地時間4點幾，過埋關，撘埋車，去到新宿預計都6點幾！一早七點去搭機場巴士，原本等 A29，車仲有三分鐘先到，來了架 A26，這是一條新路線，主要是經一D新屋苑，不過對我冇分別，因為已經過晒D新屋苑先到我呢邊，機場巴士其實好快，如果我搭地鐵轉機場快線仲耐！35分鐘已到達機場！今日姨甥仔都飛，不過佢早D，所以諗住見唔到，點知都係遇見，仲一齊去食早餐！不過分開坐，小朋友和同學仔一齊，梗係唔想同 auntie 坐啦！今次終於可以食到 Spaghetti House 喇！次次零晨機或早機，佢未開門或關左門！之前去 Premium lounge 食，食來食去都係魚蛋粉、腸粉，都食到悶！今次整返個三文魚奄列，正！食完早餐同姨甥道別，但始終心掛掛，見佢兩個小朋友，老師又不在，總擔心佢唔識去閘口，又驚佢搵唔到，又想佢獨立D ( ´∀｀)，唯有離遠後面跟住佢，其實大家同一方向，因為佢 Gate 1 ，我 Gate 16，見佢一大班同學會合左，就直係分道揚鑣喇，始終佢夠鐘入閘，我仲有大把時間！
仲有時間，行去 Gate 40，上去 Premium lounge 攞返支水先！然後慢慢行去 Gate 16，在 Gate 15-19 呢邊，都係第一次來呢度同平時20-40果邊唔同，D櫈都唔同様，人少D，感覺無咁雜！呢度個小朋友玩樂區，有銀河系的地氈， 等的時候，影下相，又攞支Stablizer 試下玩下，好快就排隊登記，呢班機感覺唔多人，唔似國泰咁長龍，好快可以上機，亦都好快可以起飛！今次飛機餐食物唔錯，在機上商店想買兩隻碟，點知要中長線先有得賣！
到埗已經係當地時間4:00，今日排隊都好多人，上次去大阪打指模、影相同過關分開做，要排兩次隊，今次都係，感覺會快D，始終 counter 係咁多個，唯有加D細的counter 做打指模同影相，過左關攞行李，又係行李等人，海關又大排長龍，攪左45分鐘先過到海關，又要排隊買車飛，剛 miss 左一班車，要等半小時！
在月台等車，17:19分先開車，去到新宿已經差不多七點！去酒店 check in 先，今次又住 APA 歌舞技町塔樓酒店！之前住過兩次，貪佢算就腳同平！必要時可以浸一浸溫泉！不過D房直係好細，張床邊斜的，因為房細，個個坐床邊，所以個邊係斜的！先去我至愛高島屋 look 一 look ！想買快閃優惠，但係賣晒，再返洒店放低行李先，跟住就去揾食！
星期日的新宿，超多人，平時去日本多數係星期一至五，印象中好似冇試過星期日去！今晚想食烤肉，間間都好爆，一於去之前食過，又冇人果間牛兵衛 Gyubei ，就在新宿駅南口，My Lord 九樓，呢度有幾層食店，大部份在裝修，幸好這間有開，而且如我所料，大把位！旁邊幾間食店都爆晒，得呢間有位，其實覺得佢D牛好食，價錢唔太貴，可能日本人食烤肉放題都係¥3000左右，甚至更平，以呢個價錢又唔係放題，可能覺得貴吧！不過呢度D厚切牛舌真係正！依家做緊神戶牛 promotion ，價錢唔太貴，但份量當然唔多！不過我一個人食，都好夠！食完野去藥妝店行左陣就走，早D瞓，明天早D出動！
沒有留言:
發佈留言