今朝早小小起身去築地，今日去場內市場食，近幾次都冇去場內，次次都係場外巿場，尋日睇新聞見豊州準備得七七八八，搬去日期不遠了，好似話場內市場搬，場外市場唔搬，唔知係咪，anyway 去場內睇下，望左幾間壽司店，見到平日超多人的壽司大，今日唔太多人，以我所見佢門口放左十三張櫈，然後人龍在外面排，我估計門口十三張櫈等於一轉人數，見剛剛放一轉人在門口坐，人龍只有幾個人，應該等兩轉就有得食，一直想試好耐，難得咁少人，又去排下先，排左15鐘已經可以去門口坐低等，因為前面係兩位，三位，通常一位可以攝到位，店門13張櫈坐左12人，剩返一個，就會比好似我得一位果D先，平時呢D壽司一般40分鐘左右開始有人走，依家啱啱入左轉，而我又坐左入門口等候區，即係下一 round 就入得，即係一個鐘內，如果排人龍頭13個就等兩轉，第14個開始要等三轉，所以店員在人龍向人講要等兩小時！坐住等，點都好過企，人龍要暴曬，不過店員都好細心，預備左遮比人，我坐最後個位，D人唔知條人龍在出面排，好多時企我後面排，我都話佢地知，人龍在外面！
坐左45分鐘可以入坐了，大家心情都好興奮！店內只有13個位，由於地方淺窄，所有大D既包包要放上行李架，我放左背囊上去，店長很友善，又會問人客從哪裡來，用返佢地語言打招呼！我旁邊有台灣人同日本人，佢講國語又講廣東話！ omakase 有9件壽司＋1款小卷，每款壽司都會講一次係乜野魚，佢用廣東話講，所以好清楚食左乜，有大拖羅、玉子、左口魚、金目鯛、池魚、海膽軍艦、拖羅、蝦、牙帶魚、海鰻，拖羅小卷，每款壽司都好新鮮，好好味，難怪經常排長龍，店長同日本人傾計傾得好開心，氣氛很好！店員亦好細心，比壽司大家時，亦會跟返人客嘅入座先後次序去派，除左壽司亦有一碗麵豉湯，味道適中不會咸！店長話送多件壽司，叫我地揀，我揀左赤貝，另外加左一件大拖羅，好正！
食完壽司行去埸外巿場睇下，好快就走，去築地站，坐日比谷線去八丁堀，諗住轉車去東京站，轉車果陣去一去洗手間，先發現漏左背囊在壽司大！即刻返轉頭攞，好彩係日本！店員幫我keep 起左，去到壽司大果陣，冇人排隊！！只有門口等候區13個！見佢地應該啱啱坐低，如果依家到的話都要等兩轉！
又繼續行程，又撘一個站去返八丁堀，然後搭一個站去東京，去買左 Press butter sand 曲奇，最多只可以買5盒，對面 NY Perfect cheese 又賣晒！一點已經賣晒，係咪可以收工呢？買完撘車去上野轉車去田原町，第一次在上野轉車，要出閘，行左出街，見到 アメヤ横町，之前睇電視介紹過，又行下，呢度舊舊地，全露天，有D似原宿，但係老餅D，遊客都多，所以好多野食，我行左個圈，見到有間松阪屋，在日本都少見，以前香港都有，入去望下，舊！見佢做緊北海道節，睇下有冇馬油買比亞媽，冇！
繼續撘車去田原町，兩個站就到，車站已經完成翻新工程，好新淨，車都係新的，但設計是懷舊的，芥辣黃色的車身，配綠色坐位，仲有懷舊燈！呢幾年，成個東京D車站大部份在翻新，終於見到一個完成，其他大站新宿、涉谷果D仲有排，應該2020奧運前會完工吧！
去到田原町，行左一邊，冇收獲！坐低飲杯野先，去左我好鐘意果間 coffee shop，叫左 Iced ginger lemonade，同一個小食，個小食其實係罐頭魚加左D香草同青檸汁，配兩條多士！志在 relax 一下！呢度又有 Wi-Fi 可以上下網！休息左一陣繼續行埋對面果邊，都係冇野睇啱！第一次在田原町冇買野！
去返火車站撘一個站去淺草轉一個站去 Sky tree站！去到就快天黑了，在外面影左一陣相，返入室內行下，見到今日在東京站買的 Press butter sand 有分店，當然又係賣晒！今日好似去邊都好靜，好似市道好差咁，周圍都靜，未見過 Sky tree 咁靜，行左一陣去搵野食，食左鰻魚飯，份量晤太多，啱晒！食完返去喇！撘半藏門線，一個站到錦系町，轉 JR 中央總武線返新宿！
沒有留言:
發佈留言