話咁快就到左第5日！明天要返港，今日都諗唔到去邊，奈良、和歌山、神戶又太遠，近近地海遊館又唔大興趣！見大阪城原來好近，上次跟團匆匆忙忙，今次可以慢慢行！
由心齋橋搭長崛鶴見綠地線，去到森之宮轉環狀線去大阪城公園站，落左車，有個商場，望落幾新淨，見到有間 gram pancake ，上次在心齋橋果間食過佢地嘅疏乎里 pancake ，佢係限時供應，每日只有三個時段，每個時段只供應20個，第一個時段係早上11點，我見呢間冇乜人，時間又11:20 ，所以埋去睇下有冇得食，真係有，仲有六個quota ，所以叫咗一個疏乎里 pancake 同一個香蕉pancake，我哋坐玻璃窗邊，一路食嘢一路睇下出邊D人，雖然冇乜太陽不過天氣都唔算差，幾relax！
呢個公園好大，環繞着大阪城有護城河，而家呢個天氣，D樹都冇花睇，遲D如果櫻花開應該會好靚，我地行咗一個圈，去返大阪城正面影相，呢度旁邊有個小商場，入去行咗一陣，主要係買紀念品，見到之前買嗰隻錫杯，價錢比起百貨公司貴咗D，呢個遊客區價錢應該都係貴D，行完大阪城，我地原本想去中之島，但係搭錯咗車，所以最後去返心齋橋，行行下見到有一間難波神社，見到個御守幾得意，買左個送比人！沿馬路行，見到一隊 Mario 車隊，好友去年玩過，可惜我冇車牌，玩唔到！
返到心齋橋，去不二家食個 lunch，食完去天神橋筋商店街，此商店街位於南森町同扇町之間，我地行去日本橋站，搭市營地鐵堺筋線，五個站便到扇町站，由呢個出去，已經係天神檎筋的四番街，呢度一共有五番街，我地行去第五番街，再行返去街頭，呢條商店街比較舊，所以少人，食店頗多，亦有不少藥妝店，相比心齋橋，欠缺了一些服裝飾物店，其實日本好多商店街，真係好行又熱鬧的不多，呢區就像老區，店子較舊較民生，有幾家舊式理髪店，又有和服店，地方大，但冇乜嘢睇！所以行到二番街就走！
返到心齋橋已天黑，去搵野食，原本想去磯丸水產，行行下見有一大班人行左入條巷，望下原來係法善寺橫丁，我去過法善寺，小小的寺廟在遊客區中心，這旁邊有橫丁，橫丁內都是食店，見到一間叫做炉ばた燒水かけ茶屋的，是日式燒烤店，就入去試試，這𥚃的格局像爐端燒，店中間有一個大型燒烤爐，圍繞著爐的都是串燒和海鮮，人客圍著爐邊坐，氣氛不錯，我們上去一樓果層，我地叫左刺身同芥辣八爪魚，個刺身唔ok，始終呢度主要都係食串燒，做得唔好其實應該唔好賣，燒烤方面叫了燒貝殼類三種，有扇貝、蠔、螺，仲有蝦、粟米、金菇、雞翼、雞肉串，燒烤食物質素好，海鮮夠新鮮，一邊坐一邊睇住店員在爐前忙得團團轉，整理食物，亦睇住自己order的食物製作過程，一路食一路睇，都可以坐成晚，店員燒烤好的食物，會用長長的木板仲過來給你，貝殼遞過來的時候，仍然有火在燒，感覺特別新鮮！
沒有留言:
發佈留言