除夕倒數

好多年冇去現場睇煙倒數了，怕人多擠迫，今晚跟好友門食飯然後去倒數，我地去左金鐘添馬公園，去到都好多人！我地剛剛好三分鐘前到埗，去到一陣便倒數了！好熱鬧，跟住即刻放煙花，記得以前去過海運大廈睇煙花，煙花好似要跌落你頭上，好靚好震撼！今次雖然遠左D，但係都好靚！

新一年祝願大家身體健康、世界和平、人人開心生活！

漁火

約了好友食飯，睇完戲先去，之前約左成兩個月都約唔到，最後放棄經常夾唔到時間果兩個，一行七人，六大一小去打邊爐，呢間第一次來，兩枱唔識的人坐一間房內，頗嘈吵，幸好另一枱好快走，之後冇人入，我地先可以包房食！我地叫左菜乾豬肺湯底，好少用呢一個做湯底，店員叫我地先飲湯，個湯都幾好飲，我哋差唔多飲晒成煲，再加返湯打邊爐，食物方面呢度冇乜特別食材，都係D大路野，我地叫左牛頸脊、脆肉骨腩、響鈴、雲吞、韮菜餃、午餐肉等等，呢度D脆肉骨腩好厚身，正，食完飯趕下場，去金鐘睇煙花同倒數！

玩轉極樂園 Coco

Imelda 的丈夫是樂手，他們生了一個可愛的女兒 Coco，後來 Imelda 的丈夫去了追求音樂夢想，離開了 Imelda 和 Coco 後，便沒有再回來，被丈夫拋棄後，Imelda 帶著女兒，為求生活，走去學做鞋，而且做得很好，自此代代傳承都做鞋，而且在家族再也不准有任何音樂，他們一家是墨西哥少有不喜歡音樂的，直到現在，Coco 已經是太婆，她的曾孫 Miguel 卻非常喜歡音樂，而且對他的偶像，已故歌手 Ernesto 非常着迷，常偷偷睇 Ernesto 的影帶和彈結他，Ernesto 在影帶中經常叫人把握機會，令 Miguel 決定不理家人反對，去參加亡靈節當日的音樂比賽，可惜被家人發現，並將他的結他打爛，在沒有樂器的情況下，他急於搵結他，便走到 Ernesto 的墓室，偷偷取走結他，卻令他進入了亡靈世界........!

呢套戲宣傳了幾個月，卻在聖誕節後才上畫，迪士尼少有用黑色世界故事，成套戲色彩繽紛，畫質非常漂亮，雖然係講亡靈世界，卻是有笑有涙，戲中音樂都有濃厚墨西哥風格，年邁的 Coco 很可愛，男主角扮鬼的造型也很可愛，可能迪士尼想日後萬聖節除了 Jack 之外，多一個選擇吧！始終怪誕屍新娘已經好多年，現在新一代已經不認識！

一開場是一般約廿分鐘的魔雪奇緣，令原本104分鐘的電影變左兩小時，約左朋友食飯，好彩冇遲到！

麻市滋味館 again

兩個好友12月生日，一個月頭，一個月尾，約左成個月，終於約到今日！

原本想去另一間，但係冇位，改左去呢間，上兩個月同朋友來過，主要食海鮮同小菜，今晚4人食，總有一個甩底！

我地叫左炸子雞，餐牌寫住要預訂，不過今日假期前夕，有現貨供應，叫左半隻，另外叫左蟶子，每人一隻，粉絲蝦煲、冰梅肉排、小炒王、奄仔糯米飯，同好友至愛的蜆芥鯪魚球！呢度食物質素都唔錯，價錢合理，只係位置較偏僻，不過開始有口碑，起碼唔同的朋友圈已經有兩個去食過！佢呢度D啤酒幾抵飲，$20支，但買一送二，即係$20 三支！牌子係雪花，我冇飲，唔知味道如何？

食飯時都傾下一月一號開始公司的改組，雖然有兩個好友已經離開了公司，但仍然關心，當然最關心是我再與舊上司合作，會發生甚麼事，會否再被針對，大家都要拭目以待！

Outback Steak house

尋晚去完好友屋企食飯，今日又相約一齊出去食午餐，我地相識以來，第一次在聖誕正日一齊出街，所以好開心！

出咗去銅鑼灣，去咗呢間餐廳食飯，因為好友之前去過，又食過兩款令佢地好滿意的牛扒，所以今次再嚟食，雖然係聖誕假期，但係店內都唔算多人，就咁walk in 仲有位，我地想叫慢煮牛扒，知道佢係假期先至供應，但係話店員因為聖誕節所以唔供應！！唯有叫好友上次食過的 Black label 牛扒，點知又話要五點後先有供應！唯有要次一級的牛扒，叫左一客 New York strip，一客 Ribeye，另外叫一個長通粉，跟餐的湯，味道不錯！兩款牛扒味道也不錯，當然講唔上話非常好，整體食物都算唔錯，只係侍應唔多夠，好難搵到侍應追野！

食完飯我哋在銅鑼灣行街，先去Sogo行吓，印象中好少同佢哋去銅鑼灣，我地行咗一陣又去希慎行下，因為我要買冰糖燉檸檬，冇左佢又乾咳！平時在旺角 Cinema city 買，但係最近缺貨，點知誠品又有得賣，咁就去誠品度買，不過我見今次買呢一樽冰糖燉檸檬，比平時飲開果D冇咁杰身，好似落少左冰糖咁，好多手工食品，大量生產就保持唔到質素 ! 

飯局作客 - 聖誕聚餐

平安夜到好友家中食飯，今晚蒸海鮮打邊爐，海鮮有鮑魚、象仔蚌、扇貝、大頭蝦、龍躉、魚鰾，當然唔少得牛頸脊同菜啦！今日仲有雞子同冬菇！好友細心地剪掉蝦腳和鬚，方便我們吃，我地先用蒜蓉蒸海鮮，海鮮汁流入湯內，增加鮮味，D龍躉肉好滑，好鮮甜！D蝦一樣好鮮甜！好正！我地食剩牛肉同菜，好飽！

飯後仲有糖水，好友燉左雪耳木瓜，用左新鮮雪耳燉，好少用新鮮雪耳，多數都係雪耳乾，個質感冇咁爽口，但係有D膠質嘅感覺，好味！今日我地飲左兩支梅酒一支冰酒！D梅酒就快飲晒，下次去日本要入貨！講開日本，見大阪環球影城會做美少女4D遊戲，好友話同舊同學去，因為她們都是粉絲，由於係期間限定，只在三月至六月有，原本佢地七月去北海道，依家可能改去大阪，而我地就照原定計劃四月去東京！

大娛樂家 The Greatest Showman

巴林自小已在腦海有一個色彩鮮豔，歌舞昇平的畫面，但他出身貧窮，爸爸是個裁縫，他跟著爸爸到富有的人家處做衫，因此認識了 Charity，可惜巴林的爸爸早逝，巴林年紀小小，為求三餐一宿，去了做鐵路工人，而 Charity 爸爸希望女兒學習上流社會的社交禮儀，所以送了她去寄宿，兩小無猜只憑書信來往，他們長大後，巴林終於迎娶了 Charity，兩人生活清貧，但與兩個女兒生活幸福，巴林工作的船公司結業，他偷偷拿了船隻的登記証向銀行借錢，成功接手了蠟像館，希望能實現自己童年的夢想.......!

相隔數年，Hugh Jackman 又拍歌舞片，總比拍狼人舒服些吧！能夠拍兩種不同片種而又成功，也沒有太多人可以，雖然真係佢唱歌跳舞的戲份不多，成套戲的歌舞都好聽好睇，尤其戲中歌手 Jenny 在美國的第一場表演，唱得好好聽，戲中兩個小女孩好漂亮可愛，而那些奇人異士都不算很怪，可能現代人的接受程度和以前不同吧！

616 牛肉火鍋專門店

午餐好少食火鍋，今日去西環食！店子的位置不太起眼，午市時間都有D午餐食，店內約有六張4人枱，兩張圓枱，店內有好多老舊的擺設，好老香港的感覺，去到的時候只有兩枱客，平時火鍋店都比一盤鼓油、辣椒等配料你自己調，呢度就自助形式，有個位置放左D配料，個位置可以放張大圓枱，好少食店會犧牲咁多位置擺配料！

呢度餐牌係用平板電腦落柯打，有好多牛嘅刁鑽部位，好多聽都未聽過，例如匙柄、脖仁、胸口膀等，我地叫左牛駝峰、牛朴肉、胸口膀、脖仁等，見佢價錢都係幾十元，所以好細碟，而其他火鍋料都係牛，例如牛丸、牛肉餃等，甚少不是牛的食物，真係啱晒牛魔王！我地都叫左牛肉餃、牛百頁同皇帝菜，呢度食物質素都唔錯，店員亦都好殷勤，價錢都算合理，環境都都說坐得舒服，下次可以再來吃過！

22年後の告白 -我是殺人犯- Memoirs of a Murderer

1995 年，東京先後發生五宗連環謀殺案，兇手有三個大原則，首先要在至親面前殺害死者，讓至親目擊案發經過，第二，從死者後面勒死對方，第三，不會傷害目擊的至親，好讓對方告知警員當時情況，案件一直無法找到真兇，直至政府宣佈更改訴訟期限，22年後的今天，已經過了訴訟期限，突然有人出來承認自己是當年的兇手，而且出了一本書，講述當年行兇的過程，事件引起哄動，甚至令兇手爆紅，事件在社會上引起極大的迴響，特別是當年目擊兇案的至親，對兇手非常痛恨，兇手甚至獲得電視台邀請上電視節目.......!

近年都有D日本嘅電影上，雖然係入邊嘅演員大部份都唔識，不過我比較喜歡睇一D查案嘅電影，所以都去睇呢套戲，劇情發展都有D出人意表，都幾好睇，結局安排都幾發人深省。

利苑

睇完戲約咗好友在九龍灣吃飯，晚飯時間好多地方都無位，我哋七個人，好多食店只有細枱，最後揀咗貴一點的利苑！就一定有位！

今晚係慶祝好友生日，佢帶埋佢個仔來，小朋友都好耐冇見喇！已經九歲仔，成晚淨係帶住耳機睇住手機玩遊戲，樣樣野都話唔食，問佢食唔食麥當勞佢即刻話食！我哋話食完飯帶佢麥當勞，佢覺得難以置信，因為我地一路叫佢食D野先，食食下就話唔去麥當勞，我哋話一定帶佢去叫佢食咗嘢先！

我地叫咗一個六人套餐，有三個前菜、燉湯、炒龍躉球、鮑魚鵝掌、薑蔥焗大蝦、貴妃雞、同埋龍蝦湯泡飯，食物質素都唔錯，份量亦都啱啱好，我地都買咗蛋糕，今次係我買，本來想去九龍城買，但係佢地話去九龍灣食，我在旺角睇戲，所以最後都係在朗豪坊買咗！今次又係傾到雞啄唔斷，走嘅時候在地鐵站磨多一陣先至走！