之前想約好友去韓國，但係夾唔到日期，最後改去澳門玩一日，原先想住一晚，最後都係決定即日來回！
我哋一行三人，一早相約好友在上環港澳碼頭等，先去咗蘭香園食早餐，跟住就上船，一個鐘頭嘅船程，我哋有兩個都瞓咗覺，仲幾好瞓添！落船過咗海關，先去搭免費 shuttle ，去咗威尼斯人行咗一陣，睇吓人地坐貢多拉，好友去左曼聯專門店買衫比老公，然後我地坐的士過去官也街食午飯！今日周圍都幾靜，上次來官也街的時候很多人，今次少咗好多，我哋去咗一間叫做山度士的葡國餐廳，店裏面只有三、四枱客，呢度嘅佈置好多係足球相關的，好多球隊嘅相同埋紀念品。餐牌嘅選擇都唔少，我哋上網睇吓食評，揀咗一啲推介嘅食物，叫咗燒乳豬、葡式炒蜆、馬介休炒菜、燒鱸魚，食物未到之前，先來了三個脆皮豬仔包，呢個包好好味，個皮好脆，但係唔會好硬，好食！個乳豬味道唔錯，個皮唔係脆果種，不過都好味，馬介休係鹹魚，但係食落一D都唔鹹，鱸魚就不過不失，我哋又飲咗葡國汽水，味道都冇乜特別！
食完飯在官也街行咗一陣，好又買咗手信，又買咗大菜糕甜品食，跟住好友又想食木糠蛋糕，我地就決定坐低食，呢間甜品店有兩層，我哋上樓上坐，樓上只有我哋一枱，我哋叫咗一款原味木糠蛋糕，一款朱古力味木糠蛋糕，又叫咗兩杯咖啡，一齊share食，印象中好耐之前食過木糠蛋糕，今次食個味道好陌生，可能太耐冇食已經忘記咗味道！個質感有小小似雪糕，味道都OK ，我哋一路食一路傾計，傾左好耐，店員都好有禮貌問我哋使唔使開冷氣，我哋話唔使，我諗反正都冇客，佢哋唔介意我哋坐幾耐，坐到咁上下，就搭的士去新豪影滙 Studio city ，因為今晚訂左食buffet，先在商場行咗一陣，有朋友介紹玩呢度個 Batman機動遊戲，不過兩位好友冇興趣玩，所以我哋都冇玩到，行到咁上下，就去食buffet！
餐廳地方都幾大，見到佢大約將三分之二的位置欄起咗，只係留返三分之一俾人客食 buffet，呢個食物嘅選擇都幾多，我諗最重要係啱唔啱食，見到有師傅即開生蠔，係法國生蠔 Fin de claire ，佢將生蠔擺好一碟碟，每碟有四隻，我都好鍾意食生蠔，所以都食咗幾碟，另外又食咗雪蟹、蝦、刺身，呢度有麵包蟹，但係我冇乜興趣食，熱葷都有好多選擇，有鐵板煎蝦、牛扒、烤鴨、燒味、咖哩等等，我地食到差不多夠鐘就走，去到碼頭好友又買手信，跟住上船返香港喇！
沒有留言:
發佈留言