又到一年一度的美酒佳餚巡禮，已經第六年參加呢個活動，今日相約好友一同前往，我哋由金鐘呢邊入場，呢邊主要係日本酒、威士忌同埋手工啤酒嘅專區，入去見到築地．山貴水產有個booth ，我哋買咗一份燒鰻魚同埋買咗杯十四代，鰻魚同埋清酒唔係想像中咁好，跟住見到一間食日本野，好似唔錯，買咗一份油金魚配帶子，呢度有位坐，我哋坐低食，呢個時候就撞見朋友，有D朋友經常在Facebook見，但係好少見面，偏偏就係偶然相遇，見到面都真係好開心！跟住又見到富士水產，呢間每年都幫襯，今次買咗帶子同埋蜜瓜，蜜瓜冇舊年果D咁甜，可能唔係好熟，所以甜度唔係好夠！帶子味道就唔錯！
食咗少少野，就去飲下酒，我地先去咗尊尚品酒區，主要因為今日好曬同埋好熱，而尊尚品酒區係有冷氣的，之前入過去一次，覺得果D貴價紅酒，自己唔識品嘗，而佢要用嘅token 比較多，所以唔係咁值得去，今次因好友未去過，而我地又有尊尚品酒証，所以入去行下，我地只係試咗一款酒，同埋攞咗份免費芝士，在裡邊涼住冷氣食同飲！
我地涼完冷氣之後又出去行下，一路買下嘢食，一路試下酒，又去舞台果邊聽歌坐下，就係咁樣玩到天黑，入夜之後越來越多人，我地D token 好似用極都用唔完，因為每次我地區用一、兩個token 買一杯酒分3份飲，所以好襟用！最後因為太多人，所以我哋匆匆忙忙用咗D token 就算喇！
沒有留言:
發佈留言