今日早小小起身，去食碗一蘭拉麵先，有時太早真係冇乜野好食，食完拉麵，去返尋晚果間藥妝店，買完野攞返去酒店先！
今日去大宮，呢個地方，曾經去過，那時候尋找東京區的和服出租，找到一家在大宮的和服出租店，當時見有火車博物館，所以今次去睇睇！由新宿坐火車埼京線去大宮，大約35分鐘，去到見到好多指示去鉄道博物館，要由大宮轉車坐一個站就到，呢條單軌火車條路好特別，好高而且轉彎經過D大廈之間，可惜影唔切，冇相睇！去到博物館站，呢度好新淨，應該翻新過，沿途冇乜人，入場前都有兩個火車頭比人影相！買飛係自助形式，有張類似八達通的卡比你入場，入到去，好多小朋友！應該係好多幼稚園學生！一入去就見到食堂，左邊有紀念品店，右邊是火車展覽場，先去左邊行一行，呢邊除咗商店，仲有迷你版火車，可以比小朋友駕駛，要先去攞張券，不過今日冇乜人，好多迷你火車都冇小朋友駕駛，D車雖然好迷你，但係仍然可以容納到大人同小朋友一齊玩，另外仲有一架迷你版新幹線子彈火車，有幾卡車，可以坐到成廿人，亦都係最多小朋友玩的火車，當然佢速度都係非常之慢！睇D小朋友玩好開心，呢度比較適合帶小朋友來！
右邊係火車展覽位置，有好幾架火車，仲可以上一層望返落去，每架火車都有介紹，火車大部份係好古舊，內部雖然有翻新過！仲放左公仔，模擬有人推車仔賣零食的情景，不過有D陰森都幾可怕！影下D火車就走喇！
搭返火車出去中野，呢個地方第一次去，一出站就係商店街，由車站行去商店街仲一路有瓦遮頭！今晚仲有小小雨添！好在大部分商店街都有瓦遮頭！呢條商店街有點舊，亦唔係太多野賣，不過就好多食肆，主要在商店街兩旁的橫街，橫街全部係食肆，選擇好多，見到有一間叫做陸蒸氣的食店，望到入面氣氛好好，坐位係圍住中間一個火，火旁邊叉左D魚燒，好想試試，可惜唔招呼一位，唯有下次有機會再去試！行左兩圈，揀左間食炭燒黑毛和牛的，叫做 5 meet meat ゴーバル的店，入到去只有一行吧枱，仲有樓梯上樓上，我一個人坐吧枱就得喇！叫左份牛扒同一碟菜，D菜話係產地直送，又叫橙汁飲！
店員俾咗一份用兩塊麵包切成心形的starter，上面有D綠綠地色嘅沙律，食唔出係乜嘢嚟，味道麻麻地！碟菜睇落就幾靚，食落口好新鮮，尤其是嗰塊冰菜，幾好味喎！佢雖然有個汁比我點，但係我覺得就咁食都好鮮甜，塊牛扒就好細塊，味道亦都唔係想像咁好，只能夠講不過不失啦！
食完野行咗一陣街，買咗支洗面油同補充裝，同埋買咗士多啤梨，就落返去新宿，在 Lumine 行咗一陣，返酒店浸溫泉！今次帶手機影下浴場外面個門口，影俾朋友睇，因為朋友介紹我住呢間酒店，佢自己七月會來，所以叫我影D相俾佢睇！今晚溫泉冇乜人，露天風呂冇人，因為落雨冇瓦遮頭！但係我發現坐側邊，有少少位可以有瓦遮頭，個位最多只能夠坐一個人，果個人就係我喇！( ◠‿◠ )
沒有留言:
發佈留言