Woft

今日約咗好友一齊為我慶祝生日，約咗去旺角呢間 Woft餐廳，去到原來個格局係類似酒吧咁樣，主打手工啤酒，好多吧枱位，不過入邊都有幾張餐枱，我哋四個坐餐枱, 一坐低睇吓餐牌先，食物選擇都唔算少，未嚟之前已經上網睇過有乜嘢食，餐牌啲食物名好得意，我哋叫咗個pizza，叫做 Hong Konger ，入面有午餐肉同埋太陽蛋，好港式嘅配搭，  我哋又叫左白汁焗大啡菇、避風塘薯條、泰式生蝦、藍青口配白酒汁、一口蜜糖腸等、食物味道都唔錯，不過份量就好細，所以要叫兩round，飲品方面，大部份有酒精，手工啤酒有好多款，好友叫了一款叫做 Kagua 有中文字寫住馨和的啤酒，我就叫咗一杯叫做Wet dog 的cocktail ，另外兩位好友唔飲酒，所以就咁叫檸檬茶飲。甜品叫咗焗棉花糖，再食埋我哋帶來的蛋糕，好飽呢！真係多謝佢哋！

我哋成晚傾去旅行的趣事，又傾吓最近煲緊乜嘢韓劇，成晚傾得好開心，好朋友就係無論幾耐冇見都一樣咁好傾！傾傾下，突然間有人提出，不如一齊去旅行，呢個話題一提出大家都好興奮，即刻話要夾假期，不過其中一個好友非常忙碌，恐怕今年未必成行，希望明年能夠成行啦！我成日覺得，一齊去過旅行，有去過大家屋企食飯嘅，先算係最好朋友！