築地．山貴水產

灣仔碼頭呢間築地．山貴水產，講左好耐，終於都開業啦，昨日 soft opening，今日趁放假就去試吓啦，大約1:40左右去到，離遠見到有人龍，不過唔算多人，大約20人左右，差不多lunch Time完結，陸續有人離開，排左15分鐘左右就可以入場啦！一入到去係售賣食品嘅地區，有好多日本水果、清酒、零食售賣，行入少少就係食嘢嘅地方，先係一啲包裝好嘅壽司同埋便當，再行入啲就係食肆，呢度主要得四間食肆，分別有浜燒區、龍蝦包、海鮮丼、立呑區壽司，仲有一個賣梅酒的位置，不過佢哋未有酒牌，只能夠賣支裝酒，亦不能夠在店內飲用！

我地先去浜燒區食燒海鮮，佢哋有幾個水池，養住新鮮阿拉斯加長腳蟹，標價$1380一隻，我地叫咗阿拉斯加"蟹腳"、鮑魚、大蝦、螺、和牛，雖然每樣價錢唔算太貴，不過叫多幾樣就唔平喇！食物質素好好都算物有所值，只係和牛話100gram ，我估計實際冇，因為真係紙咁薄！原本想買梅酒飲，但係冇酒牌，冇得買，想叫杯抹茶，又話賣晒.....!  我哋唔食太飽，因為要留返個肚食其他野！

跟住去食龍蝦包，除咗龍蝦包其實仲有一款海膽包，我哋兩款都叫晒，龍蝦包有分半隻同一隻龍蝦分別，麵包亦有分軟包同法包，我哋叫咗軟包，龍蝦包整好時，發現冇蟹鉗！同佢陳列出來嗰樣本唔同，店員解釋因為蟹鉗賣晒，所以加多咗龍蝦份量俾我地！兩款包都幾多沙律醬, 龍蝦包味道好，不過海膽包就麻麻地，因為海膽係加拿大貨，唔係日本野，味道爭D！

跟住想食海鮮丼，呢間係最多人排隊的，條人龍比較長，先去咗食壽司先，壽司店內人唔多，但係店員更少，要等人安排位，又要搵人落單，人手好缺乏，頭先食咗唔少野，所以只係叫小小嘢食，叫咗一個五件壽司set，另外叫左海膽軍艦、牡丹蝦壽司，壽司味道一般，海膽好細粒，不過都係日本貨，好食過頭先海膽包果D，牡丹蝦就比預期好！

最後一站海鮮丼！我哋去食的時候，已經冇人排隊，而且仲有位比你揀，見份量唔多所以叫咗兩客，不過選擇得返幾款, 好多已經賣晒！我地叫左特級同特上山貴丼，裏面有10款魚生粒、三文魚籽、龍蝦肉、松葉蟹鉗，特上山貴丼多左海膽，海膽又係加拿大貨，所以麻麻地， 10款魚生粒都麻麻地，通常切粒魚生味道都係唔太好，我地坐嘅位置，睇到師傅切魚生，覺得佢地手勢唔係太正宗、專業！同日本見到果D爭好遠！

食埋真係飽到不得了，足足食咗兩個多小時，跟住去零食部睇下有冇嘢食買，買咗一盒糖，同埋飲品就走啦，走的時候，去坐渡海小輪去尖沙咀，好快就到，下次如果再來，可以由尖沙咀坐渡海小輪過來會更加方便！剛才在地鐵站行過來，都要10多分鐘才到！其實呢間食店就在渡海小輪碼頭樓上，如果由九龍過來，坐渡海小輪就最方便！