尋日入左元朗,一早約定去BBQ,去到元朗大馬路就開始落大雨,我地去左明星飲茶,飲飲吓又出太陽,我地諗緊BBQ定打邊爐,其實大家都想BBQ,最後查詢左燒烤場"有瓦遮頭"就決定去BBQ,我地飲完茶,去左街市買海鮮,好耐無去街市,見好多少見既海產,見到d好大條既白鱔,都係$40,我地買左一條,又買左斤幾既蝦,都幾大隻,又見到有d成隻CD咁大既帶子,大得有點唔正常既感覺,我地又買左d蜆,蕃薯,然後去左Suki屋企坐,佢間屋都好大,九佰呎兩個人住,有兩間書房同厠所,一人一間,佢話間屋太大感覺好疏離,不過呢度環境唔錯,佢果兩隻倉鼠仍然好活躍咁搬左過來.
到左夜晚,我地出發去燒烤場,雖然有得遮,但係周圍都好濕漉漉,收費每位$80,食物任食,包一支水一罐汽水,可以帶野食去,見果度d炭爐放在露天地方任由雨水淋濕,不過燒起上來都無乜問題,我地買去d海鮮都好好味,d鱔又大舊又好味,而燒烤場d野食就普普通通,我地一路食一路傾,已經約定下次出來,希望今次Daisy大小姐可以請到假啦!我就提議遲d一齊出門去旅行,不過要夾到一齊請假都好難,我地傾到11點幾先走,我剛剛好坐到尾班車走.
沒有留言:
發佈留言