把哥哥變成可攜帶的尺寸 Bring Him Down to A Portable Size

里子是一名作家，她有丈夫和兩個兒子，父母早已離世，還有一個哥哥，已經很久沒有聯絡，有一天，他接到一個陌生電話，原來係警署打電話嚟，通知佢哥哥已經離世，由於她是哥哥的唯一親人，哥哥早於七年前已經離婚，所以警署希望她前往領回哥哥的遺體，她由滋賀縣前往東北的多賀城，她相約哥哥的前妻和女兒，一同前往辦理手續，因為當時是哥哥同住的兒子發現他的屍體，現時他的兒子良一，已交由兒童福利中心照顧，他們亦要辦理接回小良一的手續，他們亦要着手清理哥哥的遺物，整個過程中，里子回想了不少和哥哥昔日的事情。。。。！

尋日本來想睇呢套戲，但係因為時間唔啱，所以今日先睇，喺香港上映嘅日本電影係比較少，所以通常可以上畫嘅都唔會太差，其實睇咗海報，會唔以為佢哋帶哥哥嘅人形紙牌四圍去，原來並唔係咁樣，只係將哥哥嘅骨灰帶回家，兩兄妹多年來都有好多磨擦及誤會，其實劇情係可以想像得到，成套戲最發人深省嘅兩句說話，一句係”什麼是家人？”和里子的疑問，如果兩人的情況對調，哥哥會否幫助她？

Santiago: The Camino Therapy 朝聖之路萬漫步

Fred 係一個中學教師，丈夫正與她分開，並且想離婚，她仍然想維繫這段婚姻，而他的女兒亦要準備入大學，女兒亦抱怨與她缺乏溝通和了解，一天，Fred 在學校一時衝動掌摑了一名學生，導致遭到學校的解僱，她的好友希望她能夠參與做毅行導師，因為他們的機構服務對象多數是問題青年，作為中學教師的Fred，亦很了解這些青少年。另一邊，Adam 是犯案累累的問題少年，法官給予他最後的機會，要他選擇坐牢或者參加更新毅行，去朝聖之旅，他選擇了朝聖之旅，而他這趟旅程的拍檔導師正是Fred，兩人一開始已經互相討厭，但Fred仍然覺得可以改變Adam，亦知道這趟旅程他們將會面對很多磨擦。。。！

這是一部法國電影，所以對白以法文為主，劇情係大家想像得到嘅走向，我之所以有興趣睇，因為之前有一個舊同事，曾經獨自去西班牙行朝聖之旅，我相信和這個電影入面的朝聖之旅是同一個地方，那時候聽說他每日瞓醒就開始行，直至行到天黑休息，每日如是，要維持十天左右，對於每日只做幾十分鐘運動嘅香港人嚟講，每日徒步近10小時，是非常不容易的事，所以當到達終點的時候，是會非常激動，明白到經歷千辛萬苦而到達目標的滿足感，雖然呢套戲喺呢方面嘅描述唔係好深，主要都係講兩個主角喺過程裏面，點樣睇會到自己嘅問題，如何去改變自己的命運，都值得令人諗吓，有啲改變唔一定要經歷千辛萬苦先至領略到，可能喺香港行一日山，放低個手機唔睇，對住藍天白雲去思考，都能夠體會到😄
 

蝦霸 / Tokachi-Milky

去K11 Musea 睇戲，先去食啲嘢，去左地庫呢間拉麵店，主打蝦油拉麵，當然唔少得有蝦拉麵，不過我就揀咗叉燒拉麵，同樣都有一小碗蝦油跟埋俾你，佢個湯都幾多泡沫，都幾濃厚，加咗啲蝦油會更加香，叉燒味道都唔錯，不過比較細塊，拉麵就不過不失！

食完拉麵，喺戲院附近有一間牛奶雪糕店，佢有一啲泡芙賣，同埋一啲抹茶製品，我就揀咗抹茶affrogato ，佢隻杯係用燕麥做，所以個杯係可以食，裏面係牛奶雪糕，再加咗一啲抹茶，味道都唔錯，抹茶略為淡咗啲，個燕麥杯係好厚，所以都幾抵食！

 

振安大押(Coffee Boats) / 樂食坊

今日又過灣仔，因為睇到之前有網上宣傳，介紹一間舊式當舖改裝而成嘅coffee shop，原本想約好友一齊去，但係成日都夾唔到時間，所以就自己去睇吓，舖頭個位置喺大有商場斜對面，門口係冇任何翻新，入到去地方都幾細，因為從來冇去過當舖，所以都想入去睇吓，沖咖啡嘅位置就喺二叔公個位😂 裏面保留咗一啲舊式嘅當舖印章，舊嘅當票，仲有個好舊嘅夾萬，後面有條樓梯可以上多一層，上到去就係一個空間，擺咗一啲枱凳，俾人坐低飲咖啡，牆上面就擺咗少少介紹當舖嘅資訊，我買咗一杯手沖咖啡，問店員有冇咖啡豆賣，佢哋話有，話而家買咖啡豆可以送一杯咖啡，如果已經買咗咖啡的話，就可以減返咖啡錢，咁試咗杯咖啡味道都唔錯，我飲果杯係Thailand honey，咖啡豆係泰國嚟，再喺香港處理，就買埋佢包豆返去試吓，因為屋企都係剩返兩包咖啡豆，應該一個月內會飲晒，所以買定一包！

飲完咖啡行去灣仔街市旁邊嘅茶餐廳，之前睇介紹佢有個蓮藕煎肉餅，個樣好似唔錯，所以就叫咗呢個嚟食，呢間茶餐廳因為個老闆娘係60歲先創業開茶餐廳，見到好多報道貼咗喺牆上，亦都見到佢本人喺店內一眼關七，我叫咗個飯等咗好耐， 等咗20分鐘連飲品都未有，老闆娘發覺我等咗好耐，就問廚房係咪整緊，廚房當然話係整緊，但係我想講得我一個客，一杯飲品都要等咗20分鐘，老闆娘催促佢哋上咗飲品先，我先至有嘢飲，最後個飯係等咗35分鐘，老闆娘頻頻致歉，話因為肉餅未煎熟，所以比唔到我，我唔知乜嘢肉餅要煎35分鐘，如果要等咁耐，係應該落單嘅時候候話俾人聽要等咁耐！根本係佢個夥計漏咗單，但係漏咗單嘅顆計態度仲要係面露不悅，本來等左半小時我要取消，淨係俾飲品錢，因為只有飲品嚟咗，老闆娘堅決唔收錢，我諗佢都知係佢啲夥計漏咗單，最後佢話個飯都整好了問我仲食唔食，我唔想佢唔收我飲品錢，咁就食埋先，老實講，個肉餅唔係唔好食，但係唔算好出色，反而個蛋煎得幾好，最重要係等咗咁耐先有得食，老闆娘本人係好好人，亦都係好老實做生意，我諗佢唔換咗啲夥計，只會累死佢自己！

 

反斗奇兵 ｜Peaceminusone : The First fan

好友係Bigband fans ，相約去海港城睇展覽，當然唔少得買相關嘅商品，我哋book咗最早嘅時段，今日落雨，戶外位置濕晒，不過勝在一早冇乜人，可以自由影相，然後上去商店度購物，今期嘅產品都幾靚，而且價錢都唔算貴，我就冇嘢買，好友就買咗成千蚊產品，不過有部份係幫朋友買，然後去睇展覽，其實展覽嘅場地係非常之細，之前都係做其他展覽，所以嚟過好多次，真係差唔多一眼睇晒😅

睇完展覽本來想去食點心放題，但係話要搭枱，所以我哋放棄咗，就轉咗去iSquare飲茶，因為我哋本身book咗下星期食晚飯，今日就去食個lunch，不過lunch就冇特別優惠，而且冷氣仲好鬼凍，所以我哋都唔坐得耐，好友相約12月去東京，所以大家都傾一傾啲行程，初步傾咗想食啲乜？🤣🤣其他嘢淨係傾咗搭凌晨機，始終仲有四個月時間，所以慢慢再諗吓先！

 

泰麵

今日過去灣仔，過去藍屋嗰邊，終於試咗好多人排隊嘅泰麵，之前排晒長龍，而家熱潮過咗，去到唔使排隊仲有位，店舖係半開放嘅形式，今日落雨所以唔太熱，如果天氣好應該都幾熱，招牌食品係泰式和牛濃湯粉，就試吓呢個，另外叫咗杯青檸梳打，佢除咗有四大片牛肉，仲有兩嚿牛腩同埋幾粒牛丸，個湯底係船麵嗰種，都相當濃厚，算係我食過船麵之中最好食嘅一間，牛肉片半生熟都幾嫩滑，牛腩同牛丸都不過不失，整體都算物有所值，食完見到佢餐牌有甜品，糾結咗一陣究竟食芒果糯米飯定係椰子雪糕，最後因為驚糯米飯太多，所以揀咗椰子雪糕，點知佢椰子雪糕嘅份量係好大，雖然只有兩球雪糕，但係佢個雪糕球係比一般雪糕店嘅雪糕球大，仲伴咗唔少椰子肉同埋粟米、花生，所以份量係好大，個人認為雪糕偏甜咗少少，因為我本身食少甜，所以會覺得偏甜咗啲，其他人食應該唔會太甜，食埋個雪糕真係好飽，整體嚟講都唔錯，有機會會再嚟試吓其他嘢！

 

The End of Oak Street 末世橡樹街

1982年，Greg 和Denise 兩夫婦與一對兒女Audrey 和Brian 住在橡樹街，還養了一隻狗Starbuck，夫妻兩人感情出現了問題，Denise 想做作家，亦都開始寫書，一天Denise前往探望鄰居老太太，老太太表示花園無故長出了一棵植物，Denise用即影即有相機影低植物的模樣，再到圖書館尋找資料，但沒有資料顯示這是什麼品種，圖書館的管理員說，這植物像恐龍時期的某種植物，不可能在現代出現，她亦沒有再作深究。在半夜，橡樹街出現了一道強光，伴隨着強大嘅風力，他們的狗在後院狂吠，亦吵醒了Brian，隨後全屋停電停水，電話線亦打不到，翌日，他們發覺Starbuck不見了，於是父母外出尋找，順道看看老太太停電有沒有影響到她？就發現老太太倒臥家中，並發現老太太的花園已經變了一個樹林，而兩夫婦回家途中竟發現不明的大型動物出現襲擊人類。。。！

套戲嘅題材都幾特別，不過都有少少無厘頭，有啲位都幾搞笑，不過冇詳細解釋點解會有咁嘅現象出現，亦都冇解釋點解會喺呢個地方出現恐龍，總之成條村好似得佢一家人冇乜事，大部份時間都避開到暴龍😅就算俾暴龍咬個場景都好搞笑，不過當係輕鬆吓睇吓都無妨🤣

 

功夫女足 Kung Fu Soccer

峨嵋隊嘅成員個個都係武功高強，隊長雙雙要求隊員一定要以打贏波為目標，她的拍檔鈺瓏，自小已經一齊練波及學功夫，她們正準備參加國際大賽至尊無敵杯，她們的師太，安排了師叔徐風做他們的教練，在過程中，發覺師叔原來暗地裏與對手合作，導致她們在第一輪比賽中輸了，同時她們內部亦有不少拗撬，導致隊員出現內訌，比賽的日子佔近，嚴重影響了她們的士氣。。。。！

同好多香港人一樣，大家都係睇周星馳嘅電影長大，所以對佢嘅電影有一定嘅期望，呢套戲亦都好多兩極嘅評價，我個人覺得，成套戲搞笑嘅地方唔多，都係較為認真嘅方式去演繹，雖然當中有加插一啲笑料，都離唔開周星馳嘅影子，成套戲只有兩三場聽到觀眾大笑，而且劇情嘅發展亦都係意料之內，所以我覺得唔好抱太大期望去睇，加上成套戲國語對白，主演嘅演員都唔係香港人熟悉的國內明星，開場冇耐已經見有觀眾睇幾次手機🫣 甚至有人瞓咗覺(有鼻鼾聲)，因為一路都講國語對白，以為會轉廣東話，點知成套戲都係國語，只有極少量廣東話對白，仲少過英文嘅對白，而且好多港星只係客串咁嘅形式，對白少又出場時間短😅😅雖然有啲鏡頭都係對周星馳致敬，相信有唔少觀眾同我一樣覺得太少了🫢
 

Ramen Cubism 立体派ラーメン拉麵

今日去中環睇醫生，都係鍾意睇返我相熟嘅醫生，始終都係對醫生有信任，所以有咩問題我都係問佢🤭

睇完醫生去附近食啲嘢，之前睇網上嘅影片介紹呢間拉麵店，就去試吓，雖然店嘅位置喺旺區，不過佢嘅位置喺一條巷裏面，仲要行樓梯上，平時行過真係冇留意呢度有間拉麵店，去到見佢冇乜人，我去嘅時候得兩枱客，因為過咗繁忙時間，坐咗一陣仲得返我一個添😅佢嘅拉麵都有好多選擇，又變咗選擇困難，原本想試吓佢哋個冷麵，但係見到個雞醬油拉麵又好似幾正，所以最後都係揀咗醬油拉麵，將油湯嘅味道唔錯，佢有兩款雞肉，有一舊係冇雞皮，另外有兩嚿係有雞皮，而且火炙過，同埋仲有一塊叉燒，個溏心蛋都好靚，好好味，整體成個面都好食，另外又叫咗一份炸雞，因為得我一枱客，所以個炸雞係即叫即炸，熱辣辣，好食，所有雞肉都係日本雞，雞味同肉質係與本地雞有分別，炸雞好Juicy好好食👍🏻下次要試吓其他拉麵先得😄店入面嘅水都係用咗紀州備長炭，增加礦物質，水質亦都順滑啲👍🏻