2025年11月日本東至西長途旅行 Day 13 - 上野、淺草橋、銀座

好友今日返香港，所以我哋嘅活動範圍只在上野，先check out，然後寄存行李，就出去搵食，搵咗酒店附近有間coffee shop 叫做 Shelves coffee，店入面淨係賣咖啡，食物就只有曲奇餅，佢都有咖啡豆賣，去到嘅時候店入面冇乜人，我哋坐低嗌咗兩杯咖啡同一件曲奇餅，呢度嘅咖啡幾好飲，好友仲話曲奇餅好好食，但係我就唔鍾意食曲奇餅，所以冇試到，好友再買多兩塊上飛機食，我哋坐左一陣，店入面越嚟越多人，甚至要等位，我哋就去食晏！

去咗上野火車站旁邊嘅商場，去搵一間叫做寿司処ニノ宮，去到要等位，不過等兩張就到我哋，叫咗幾款壽司，同埋海膽手卷，仲另外叫咗Wasabi(要俾錢)，因為我哋以為冇Wasabi喺壽司入面，原來係有，只係份量好少，所以食唔出，不過佢呢度嘅Wasabi係真Wasabi，即時手磨嘅，所以唔會好攻鼻，壽司嘅質素都唔錯，食完壽司仲有時間喺附近行咗一陣就返酒店攞行李，同好友一齊行到去火車站就分道揚鑣，佢搭火車去機場，我就去淺草橋，去酒店放低行李！

前幾日住嘅酒店係Apartment，跟住book咗同一集團嘅酒店，位於淺草橋，先去酒店check-in，放低件行李之後，就去銀座，諗住去試吓一間咖啡店Glitch ，但係門口有條長人龍，所以放棄咗，本來想去食一間拉麵店，叫做銀座八五，但係見到佢原來要預約，而且已經full booking，兩間都食唔到，就喺附近行吓，見到另一間Latte Art Mania，同前日嗰間分店比較，呢間地方大啲，但係人客少好多，今次唔飲咖啡，飲咗杯焙茶！呢間嘅店員全部都係女仔，亦都冇展示拉花攞獎嘅資料，所以兩間分店應該係好唔同！

跟住行去搵另一間拉麵店叫做 Morry，叫咗佢招牌拉麵，係京都熟成醬油拉麵，呢間店應該比較多遊客，見佢餐牌有多種語言選擇，而且都幾多外國人嚟幫襯，所以店員都能夠講英文，拉麵嘅味道都唔錯，個湯都幾好！食完嘢就去附近行街，去咗UNIQLO，今次唔去12層樓嗰間，去咗呢間只有七層樓，因為佢樓下有間OK超級市場，聽講話啲嘢好平，不過去到見佢就真係賣日用品同食物嘅超市，佢有個位係賣藥妝，不過藥妝部關咗門，睇唔到佢啲價錢係咪平！上返去UNIQLO，睇啱咗個熨畫，所以買咗件T恤印個熨畫，見呢間UNIQLO入邊有間coffee shop，係佢哋自己UNIQLO的，我就冇幫襯coffee shop因為都夜喇！買完嘢就返酒店休息！

酒店住後感：
Monday hotel Asakusabashi 
酒店位於淺草橋，如果搭JR，去邊都要經秋葉原轉車，除非搭都營淺草線，酒店出門口行一個街口已經係地鐵站入口，不過呢條線只有樓梯！如果行去JR淺草橋站東口只需要4分鐘，但係呢個出口冇電梯，只有樓梯，如果拎住行李嘅話就要行去西口先至有電梯，咁就要行多4-5分鐘，大約係由車頭行去車尾嘅距離！呢度附近都有好幾間酒店，都係一啲平價酒店為主，但係食店就唔係太多，而且呢一帶主要係一些賣手工製作物料的商店，例如飾物、皮革製品嘅原材料，酒店過D就已經有一間貴和製作所，主要係售賣飾物嘅散件。酒店嘅大堂唔係好大，職員都有幾個，房間比想像中大，可能因為佢俾咗雙人房我，房入面有兩張合併一齊嘅單人床，床同洗手間之間都有少少空位，電視機下面有一張摺埋咗嘅枱面，叫做多番少少位置擺嘢，行李箱可以擺喺窗下面嘅空位，洗手間就比較細，不過整體都算舒服， 2樓設有自助區水機，飲品售賣機等，酒店都唔算好新淨，但都係乾淨企理！

 

2025年11月日本東至西長途旅行 Day 12 - 上野、銀座、Skytree

今朝喺上野搵咗間咖啡店試吓，呢間叫做Renoir 啲咖啡店其實有好多分店，咁耐以來都係第一次去幫襯，我哋去呢間要上樓，餐廳有少少舊，我哋叫咗咖啡同埋三文治，味道不過不失，我諗呢間係一間老牌嘅咖啡店！

去到火車站，見到有間買牛奶嘅專門店，好似秋葉原嗰間咁，呢間就細一半，不過就唔使入閘都飲到！我哋買咗兩支牛奶飲，好味！跟住又見到日本幾出名嘅麵包店Truffle，店入面唔係好多人，不過佢限制咗入店嘅人數，每次最多八個，我哋等咗一陣就入得，買咗兩個麵包，其實佢好似香港嘅豬仔包咁，但係味道好食好多！

我哋再搭車去銀座行街，好友喺商場買咗盒手信，其實我都有興趣，不過驚個篋唔夠位，所以都係冇買到，跟住我哋喺商場搵咗間意大利餐廳，叫做La Vasara，食咗個pizza，同一個意粉，味道都唔錯，跟住我哋行咗去八重洲嗰邊， 見有個小小聖誕市集，喺嗰度食咗杯sake 雪糕，味道又唔算好突出，行咗陣街我哋就過去押上！

Skytree 都做緊聖誕市集，每年聖誕佢都係會有Event，我哋主要想去試吓嗰杯Mulled wine，不過味道麻麻哋，我哋又食咗盒薯條，然後就入返商場行街，跟住去食晚飯，揀咗一間食壽喜燒嘅店舖，叫咗一個和牛壽司，兩款唔同肉嘅壽喜燒，真係一分錢一分貨，貴啲嘅牛肉確實係靚啲好食啲😅 食完嘢搭返車去上野，去Donki 行一陣就返酒店，好友明天返香港，所以要執行李！順便放一啲行李喺佢嗰邊，等佢幫我拎返香港先🤣

 

2025年11月日本東至西長途旅行 Day 11 - 池袋、表參道、渋谷

今日早餐，去池袋食拉麵，我地至愛的銀座篝，喜歡去池袋分店貪佢唔使排隊！銀座本店經常要排隊的！今朝去到都係得5-6 個客！我叫咗新出嘅小魚乾拉麵，好友就堅持原味雞白湯拉麵，其實佢前後出過幾次新嘢，好似上次喺大阪食過蠔湯拉麵，就做得麻麻哋，今次都唔例外🤣都係麻麻哋，都係食返雞白湯拉麵好啲🤭食完拉麵我哋去返地鐵站，買咗兩杯即榨嘅橙汁飲，唔錯！

食完嘢我哋去咗新宿行咗個圈，主要去睇波鞋，睇唔啱就搭車落去外苑前駅，去搵一間咖啡店叫做 Latte Art Mania ，呢間店其實好細，入門口仲要有一級樓梯，導致個門唔可以開晒🤔所以只係開到半個門入去，座位亦都只有十個左右，而且個通道都好窄，我哋去到嘅時候仲有6-7個位，叫咗兩杯咖啡，聽講佢呢度嘅拉花攞個獎，店員都喺我哋面前做拉花，我哋另外仲叫咗份三文治，我哋杯咖啡都係黑色嘅，係佢哋招牌咖啡，味道都唔錯，我哋留意到兩個店員都幾靚仔🤭 飲完咖啡走嘅時候，門外竟然有六個人喺度等位😅

我哋行過去表參道，好耐冇去過呢個地方，我印象中佢係好多名店，但係今日行過嘅時候就見唔到有名店，可能因為我哋唔係行嗰邊！我哋行過Starbucks嘅時候，入去飲咗杯Soupuccino🤣 

跟住又行返去渋谷，因為今日係好友嘅生日，所以我搵咗一間爐端燒嘅居酒屋，店名叫做炭火焼き リリー 渋谷店，不過我哋冇訂位，去到嘅時候只有室外位，佢店裏面有個爐，主要都係圍住個爐坐，而室外只有兩張枱，我哋冇得揀唯有坐室內，不過我都有行入去影吓個爐，我哋叫咗條喜知次魚、蝦、大蔥，呢啲都係燒烤，另外叫咗個巴馬火腿包住提子同芝士嘅前菜，又叫咗雞翼，我叫咗杯十四代，好友就飲Ginger Ale，食物嘅質素唔錯，而且好好服務，我哋出入店舖嘅時候覺得店裏面比較焗，但係室外又好凍😅最主要係今晚天氣比較涼，所以我哋食到咁上下都覺得好凍，最後店員攞咗隻生日碟出嚟，因為我到埗嘅時候已經問咗佢有冇蛋糕，佢哋話只有生日碟，用朱古力寫生日字，另外加一支雪條😅所以我叫佢哋照寫生日字，雪條上面有支噴火蠟燭，所以呢隻係生日碟，唔係生日蛋糕😆好友好開心好surprise，仲有三四個店員一齊出嚟同佢講生日快樂！佢都有少少尷尬🤣不過都開心嘅！因為呢一餐食物質素好，服務又好，唯一係比較凍！佢食埋條雪條仲凍😅

食完嘢搭返車過上野，返酒店之前去咗便利店食smoothie ，見佢出咗隻番薯杯，所以我試咗番薯！感覺就係食凍嘅番薯🤣 返到酒店我哋攞埋啲生果出嚟食，有蜜瓜同埋我在山形買的車厘子啫喱！