鮮味蒸滾鍋

好友上個月生日去咗冰島，所以冇同佢食飯，今晚就約返佢補祝生日，去咗大角咀呢間火鍋店，佢都係任食火鍋，我哋唔想食雞煲，所以揀咗個文昌雞雞湯，另外有蒸海鮮，蒸海鮮就定咗有揀五款海鮮，我哋揀咗龍蝦、扇貝、龍躉、蟶子、蟹，佢本身亦都有跟咗一啲蜆，亦都有個南瓜排骨粥底，每人仲有半隻乳鴿，個雞湯食完雞可以打邊爐，我哋都係叫咗菜同牛肉，已經食到非常飽，質素都算唔錯，好友話佢平時都有嚟，我就第一次嚟，食飽我哋就行返去旺角搭地鐵！

 

泰仔美食（宋皇臺站出口）

又到六月之星生日飯，主角話想食泰國嘢，之前我哋食過呢一間舊店，最近佢搬咗去近地鐵站，因為舊店成條街都收樓重建，我哋叫咗好多嘢食，上次食過覺得最好食嘅係燒雞翼，今次食就爭啲喇！上次食完係要encore，今次就唔需要，生蝦刺身亦都唔算好新鮮，有少少腥味，咖喱就保持水準，配埋蒜蓉包就冇得頂！其他食物就一般，唔算特別出色，佢呢度座無虛席，我諗唔少人好似我哋咁，食過舊舖覺得好食，不過轉咗鋪之後好似爭咗少少，不過服務仍然好好，店員係非常友善，明顯見到對面小曼谷啲客俾佢搶走晒，因為見到小曼谷冇乜人😅

 

香港潮州節

今日特登走去灣仔會展，就係為咗睇香港潮州節，因為佢係免費入場，所以都幾多人，而且以長者為主，今日剛好有肥媽表演，所以就更多人，其實呢個展覽，真係講潮州嘢嘅係好少，都係講少少僑批，其餘大部份係食嘢，應該叫做潮州美食節🤭 有好多係潮汕牛肉丸，因為要冷藏所以我都冇買，佢亦都有啲即食嘅，亦有唔少試食，當然要排隊攞，我就冇排到，原先見到一檔煎韭菜餃，好似唔錯，見冇人排隊，諗住轉頭去買，轉頭返去已經排晒隊，所以又冇買到，淨係見到嗰啲潮州粿公仔，覺得好得意，不過佢係非賣品，所以影吓相就算！

行咗個圈冇乜嘢睇，就行咗去睇新開嗰間京東，佢未正式Grand Opening，暫時係soft opening，店嘅面積都幾大，都好多嘢賣，除咗電器仲有賣座廁、鋅盤等浴室用品，而且好多產品佢都有得試機，真係幾吸引，不過暫時冇需要買電器，所以純粹參觀！

 

屍殺禁區 Colony

 

科學家徐永哲根據佢自己嘅研究，認為透過喪屍病毒，能夠統一人類的言行，他將病原體打進自己身體，令到自己成為疫苗，再聯絡警方，通知他們某大廈內將會發生襲擊，然後前往大廈尋找姜汝哲，因為徐永哲覺得佢盜用咗佢嘅技術，所以先令他變成喪屍，再讓他襲擊其他人，同一時間權世貞教授在現場聽演講，她與前夫一同用膳之際，商場爆發喪屍咬人，他們被迫躲在商場內，同時想辦法與外界聯絡，希望能找到方法阻止喪屍。。。！

睇呢套戲因為要睇全智賢，因為好友好鍾意佢，我哋都鍾意睇佢，而且喪屍片題材一向都係韓國片嘅熱門題材，套戲都幾好睇，雖然主角又係由頭帶到尾，打唔死嗰種，不過總係要全靠主角先至可以救到人😅

掬•Kaku、The Grill room (Humphrey’s)

今日同好友去中環食晏睇戲，去咗上次食過嗰間Moody食意粉，跟住去咗一間新開嘅茶店，叫做Kaku ，佢應該係新開冇幾耐，我哋每人叫咗一杯茶，佢都有賣咖啡，好友本來想飲咖啡，但係個職員話佢淨係識沖茶，沖咖啡嗰個今日冇返，所以唯有飲茶，我就覺得個茶唔算好特別，正正常常算合格！

睇完戲之後我哋又過返尖沙咀，去咗堪富利士道，因為好友想食牛扒，去咗我哋上次銅鑼灣食過嗰間扒房，在尖沙咀的分店，不過我覺得今次冇上次銅鑼灣嘅牛扒咁好食，我哋叫咗個二人餐，加多一個 Risottos ，個飯都麻麻哋，所以食唔晒！

 

Billie Eilish - Hit me Hard and Soft Tour 巡迴演唱會3D 現場版

之前睇預告，見到呢套戲都好有興趣，因為呢個歌手自己都幾鍾意，不過佢嘅歌我只係識幾首，不過都想睇吓3D效果，現場感係咪好強勁，套戲已經上咗畫一段時間，所以冇乜人睇，今日呢場就得四個人，好耐冇睇過3D電影，佢係需要帶3D眼鏡，好彩屋企有幾副，之前因為太多已經掉咗一啲，有需要現場買都係$10 ，不過唔想再多樣嘢擺喺屋企，反正舊嗰啲都用得到！

3D效果加埋音響，現場感十足，開場嘅氣氛非常熱鬧，鏡頭好多時都影去觀眾，歌手真係純粹以歌會友，全程只係着住一套波衫，完全冇換過衫，亦都冇華麗嘅服飾，甚至係自己化妝梳頭，歌迷只係喜歡佢嘅作品，好不介意她的外型，佢本人亦都唔想用主流社會眼光去定義自己，係好有個性，最重要佢係非常親民，因為佢自己都曾經做過歌迷，知道一個小小嘅接觸，已經令到歌迷非常開心，所以佢有落台同觀眾擊掌，歌迷亦都看得如痴如醉，氣氛非常好，佢嘅慢歌係令人好感動，每次佢唱慢歌啲觀眾都聽到喊，唱快歌嘅時候大家亦都好興奮，雖然有啲歌我唔係好熟，但係我都覺得好好睇，中間亦都有加插導演同佢嘅對話，籌備成個演唱會都用咗好多時間同體力，真係唔係一件容易嘅事！

 

The Wall Street bar and lounge

今日天氣非常炎熱，係今年最熱嘅一天，夏天正式開始了，今日去尖沙咀食晏，路上太陽很猛烈，真係少一陣冷氣都唔得🥵

去咗呢間樓上嘅餐廳，去到只有兩三個客，佢有一部份位係窗邊，相對會比較熱，所以坐入D，唔使曬住太陽，不過冷氣都唔係太夠，因為少客人，冷氣都唔會開得太大，呢度有午餐，我哋分別叫咗鵝肝多士同帶子做前菜，主菜有蜆肉意粉同埋羊架，餐湯係忌廉蘑菇湯， 頭盤同湯都係比較鹹，雖然本身食嘢係比較淡味，仍然覺得佢比正常偏鹹，主菜就正常，不過整體食物嘅質素就麻麻地，不過店員嘅服務都好好，我哋食到得返我哋兩個，店員都唔會埋嚟清枱趕你走😂 不過我哋自己都想出去行吓，雖然好熱，所以就去附近商場涼吓冷氣🤣

 

別離無恙 Until we meet again

美空正在尋找工作，仍未找到合適的工作，一天她前往參加喪禮，離開時看見一個孕婦，在靈堂外要求她幫忙，告訴在靈堂內的丈夫，要把二人一起收拾的紙尿片，一同放入靈柩內，原來美空能看見逝者的靈魂，她告訴喪主他去世的妻子，就在靈堂外要求幫忙，而作為喪禮的主持者漆原，事後邀請美空在殯儀館工作，美空便開始了她在殯儀業工作的實習期。。。。

故事有點像之前睇過嘅日本電影禮儀師之奏鳴曲，戲入面都係講幾個喪主同逝者的經歷，如何在逝者去世後，家人得到釋懷，包括兩位主角自己都曾經係喪主，兩人在工作的過程中，同時學懂讓自己和家人都能夠釋懷，都有唔少感動場面，故事雖然沒有愛情分線，總覺得發展落去會有機會，男主角目黑蓮，是我頗喜歡的日本演員，但他演出的作品不多，有報道亦都叫佢做木村拓哉接班人，雖然冇木村咁靚仔，但係都有一種冷漠嘅型格🤭