食飽飯就去咖啡展，場地分咗兩邊，先去咗近地鐵站嗰邊嘅場地，然後再上返去Blue bottle 對面，近地鐵嗰邊大概有四個booth，每邊兩個商戶，見到上次去灣仔嗰間當舖Cafe嘅Boat coffee，我就冇試到，好友就試咗覺得OK，另外又買咗薑柚樂，跟住就行過去另一邊，呢邊只有四個booth，主要係一啲日本嘅參展商，我哋試咗其中兩間，一間主要係拉花咖啡，咖啡嘅質素不過不失，因為我哋比較鍾意飲深烘焙，而日本咖啡多數係淺至中烘焙，今次就冇買咖啡豆，因為人哋啱啱送咗兩包咖啡豆俾我😄
飲完咖啡我哋行咗去第三街附近，見到一間賣Gelato嘅小店，就買杯試吓，佢呢度冇位坐，買完只能夠企喺度食，我叫咗豆腐同埋抹茶味，我就覺得一般，唔算好特別😅
今日出尖沙咀食呢間意大利餐廳，呢間餐廳好有歷史，但係我從來未嚟過，之前有一次book咗，臨時取消咗，今次再book過，正常可以唔使book，因為唔多人，不過見十一假期，驚好多遊客會嚟，所以最終都係book咗枱，我哋兩個人都係俾四人枱我哋，因為只有6-7 枱客，我哋揀咗兩個午餐，前菜揀咗Parma Ham同埋沙律，主菜就揀咗牛扒同埋卡邦尼意粉，兩款都好食，牛扒應該係用炭火燒，好細心地切咗一條條，方便我哋share，我哋另外叫咗一個Tiramisu，味道都唔錯，整體呢間service好，食物質素都唔錯👍🏻
食完晏，我哋行一陣街，去咗半島酒店商場，因為呢度有間意大利雜貨店，有好多意大利嘅食品售賣，我哋行咗一陣，買咗朱古力同沙甸魚罐頭，跟住睇到佢有個電視播緊片，之前蔡瀾介紹過呢間雜貨店嘅聖誕蛋糕，連續幾年喺意大利攞咗冠軍，不過價錢都唔平😅
買完嘢我哋行過斜對面有一間賣半島嘅吉祥物，嗰隻熊仔相關嘅產品，仲有一啲餅類嘅食物，知道佢中秋節就會買月餅，旁邊有個位置係coffee shop咁，我哋就坐低飲杯嘢，叫咗一客scone ，有原味同提子，另外叫咗一件士多啤梨蛋糕，我就試咗佢哋嘅抹茶latte，因為早排好多人話好飲，不過我就覺得一般，唔算好出色，不過試過就算🤣
尋日同好友食完飯，今日同佢前度食生日飯，因為另一個好友見到呢間火鍋店嘅廣告，諗起我哋上次喺成都食嘅麻辣火鍋，佢都話想試吓好唔好食，所以就去咗呢間度試試，見佢開到凌晨三點，我哋就晏少少去食，個位置有少少隔涉，我哋冇訂枱，因為通常八點後都會有位，安排咗個卡位俾我哋，呢度有幾張卡位，旁邊就係幾張中型圓枱，亦都有幾間房，我哋叫咗個鴛鴦湯底，因為兩個好友其實唔係好食得辣，佢哋驚個麻辣會好辣，所以我哋淨係叫咗小辣，我就覺得完全唔辣😅我記得上次我哋喺成都仲要加辣添😅 我哋叫咗一碟牛肉試一試先，諗住如果OK就叫第二個部位嘅牛肉，不過呢碟牛肉好一般，而且都幾細碟，我哋另外叫咗鴨血，因為上次喺成都食嗰個鴨血係好好食，不過呢度嘅鴨血唔係嗰回事，都係香港一般火鍋店嗰種好似豬紅咁嗰種，唔係成都嗰種鮮紅色好軟身嘅鴨血😅另外仲叫咗少少配料，食物嘅質素就一般，唔係想像中正宗四川嗰隻，本來呢度靜靜地冇限時，打吓邊爐傾吓偈都幾好，不過過咗10點後，因為有特價六折，所以多咗人，而且有部份人食煙、猜枚、玩骰盅，所以相當嘈吵，有點烏煙瘴氣，所以頂唔順，冇下次🫢
今晚約咗好友食飯，晏晝我哋先去行吓，去咗東涌東薈城睇吓個咖啡展，呢個咖啡展已經去咗三個location做，原先都冇諗住去，咁啱今日大家得閒，就去睇吓佢第三個location，亦都係最後一轉！ 先去食個lunch，就喺商場嗰間羅麥記度食，我之前冇食過呢間，以茶餐廳嚟講，食物嘅質素都...
