2025年9月成都之旅 Day 3 - 春熙路、成都大慈寺、太古里、九眼橋酒吧街

今朝起身又去飲咖啡，去咗一間叫做盡吼咖啡，呢度有啲書俾我哋睇，好有睇咗本書覺得唔錯，所以諗住之後再買呢本書睇埋佢，呢間嘅咖啡就不過不失！

飲完咖啡，返去酒店等好友，我哋喺門口迎接佢，問咗接待處，未夠鐘check-in，所以我哋將佢哋嘅行李擺咗喺我哋間房先，今晚返嚟先做check-in，放低嘢即刻出去食晏， call咗車過去春熙路附近，搵咗一間叫做雞毛店川菜，叫咗佢哋嘅招牌菜，天府手撕雞，仲有叫多兩三個辣嘅餸，同埋叫咗一碟瓜，食物都唔錯！

跟住落去春熙路嗰邊行，今日都非常之熱，幾多間非常之浮誇嘅金舖，樓上個露台仲有兩個女仔喺度跳舞， 十分搞笑，我哋行去附近買飲品，去咗一間叫做李山山茶事，佢主要係買瓦煲奶茶，我就叫咗杯柚子茶，都幾清爽！

跟住行去太古里嗰邊，嗰度有一間成都大慈寺，我哋入去拜神，睇吓啲佛珠，好有想買一串手串，不過我話俾佢聽佢睇啱嗰條其實係膠珠，所以佢都冇買，我建議佢可能買道符會好啲😅拜完神我哋去太古里嘅商店街行吓，呢度大部份係一線品牌，所以我哋只有Window shopping，行咗陣又去飲嘢，去咗阿嬤手作，坐低飲杯嘢，因為出邊好熱🥵 跟住行咗去Nike 好有就買咗T恤，仲可以自選圖案印上件T恤度！我就睇唔啱！

行完街我哋決定返酒店，因為想睇酒店開香檳，好友check-in之後我哋去佢哋間房睇吓，佢哋間房係大間啲，不過我覺得太大，因為我哋去旅行通常全日都不會在酒店，只有夜晚回來睡覺沖涼，佢間房有廳有房，好友都話冇用過個廳😅我哋跟住落去酒店大堂睇佢開香檳嘅儀式，儀式好簡單亦都好快完咗，然後每人有一杯香檳，有一小份小食，食完飲完我哋就再出去！

搵咗一間叫做岳富貴老火鍋，叫咗個好辣嘅麻辣火鍋，又叫咗一個好食嘅鴨血，佢呢度嘅麻辣火鍋辣得嚟係好食，雖然啲配料唔係最靚，但係都唔錯！

食完飯去咗一個叫做成都音樂坊，呢度係有一條河，有條橋應該係叫做九眼橋，河邊係一排食肆酒吧，我哋搵咗一間，入去坐低飲吓嘢，呢度都有人唱吓歌，佢哋又玩吓骰盅，其實我都好眼瞓，等佢哋玩完之後我哋就返酒店休息！

 

2025年9月成都之旅 Day 2 - 春熙路 IFS、寬窄巷子

今朝瞓醒又去飲咖啡先，去咗一間叫Singular Point，店入面嘅地方唔係好大，得我哋兩個客，買咗兩杯咖啡坐低飲，呢間嘅咖啡一般，冇尋日嗰間咁好飲！

飲完咖啡都成11點，我哋搭車去春熙路IFS，呢度係一個大商場，最出名嘅地標就係有隻大熊貓𥐙喺外牆，入去大廈上去樓上可以見到熊貓嘅正面，而呢度有一個大商場，全部都係名牌商店，亦都有唔少食肆，我哋行完呢度，就行去附近其他商場，入咗去一個商場坐低食碗麵，喺食麵嘅期間，好有收到訊息，佢買嘅飛唔能夠成功，即係話佢今晚冇得睇演唱會，所以佢灰到爆😔即刻冇晒心機，咩都食唔落，我都唔知點樣安慰佢！

出去行咗一陣之後，因為太熱，我哋就去咗霸王茶姬坐低飲杯嘢，佢就不斷短訊來往，睇吓有冇機會買到飛，機會非常之渺茫，跟住我哋call返車返酒店附近，去飲咗杯咖啡，今次飲呢間叫做卜居咖啡，細細間嘅咖啡店，只有兩個女仔店員，亦只有我哋兩個客😅呢間咖啡冇尋日嗰間咁好飲，不過都唔差！

飲完咖啡我哋再call車出去，去咗寬窄巷子，呢度都幾多人，而且係一個遊客區，所以大部份商店都係賣茶葉、熊貓產品、小食等等，呢度有間幾靚嘅Starbucks，又有間Pop Mart，又有唱片舖，大部份係周杰倫嘅唱片，行到咁上下因為好熱，所以搵咗間食店坐低，呢間叫做蓉槿薈，都係食啲川菜，我哋叫咗一碟菜、辣椒炒牛肉、炸乳鴿、仲有個川椒肉，啲餸都幾辣，我就冇問題，不過好有就食唔到咁辣，所以大部份係我食，加上好有買唔到飛已經冇晒心情，所以食完嘢都返酒店，返到去都係八點。

因為好友要睇網上直播，李宇春會唱一首歌做直播，睇完直播我哋又去酒店嘅酒吧飲嘢，今次去呢間St.Regis bar 唔同尋日嗰間，呢間就靜好多，不過最好笑個侍應係同尋晚嗰個係同一個人😂 即係兩間酒吧其實係一樣，只係唔同樓層，同埋唔同格調，所以餐牌都係一樣，亦都係麻麻地！好有仲叫咗份雪糕，都係麻麻哋😅坐到10點幾就返房瞓！返到房見到酒店擺低咗少少零食nuts 同兩粒細細粒嘅柿😅