深森水晶

 

今日要去迪士尼，因為要睇煙花，所以唔使咁早入去，趁有少少時間，出一出去旺角，幫好友買水晶，因為佢近日非常黑仔，佢話有朋友叫佢買條金運石，睇個名覺得係而家新改嘅水晶名，因為好友俾咗張相我睇，我唔係好確定佢係咩水晶，個樣有D似金曜石，今日去咗呢間水晶店，見到佢都有金運石水晶賣 😅問咗店主，金運石本名係黑銀線 / 紫蘇輝石 (Hypersthene) 近年多左D好少聽到嘅水晶名，可能商家要發掘一D新嘅水晶嚟賣，又要改個吸引嘅名，所以有D水晶都未聽過😅 

同店主傾咗一陣，佢都介紹我買條平平哋嘅黑碧茜，因為好友之前冇帶過，買條平平哋嘅，爛左都唔會肉赤！呢度啲水晶價錢都幾合理，佢亦都有啲貴價貨，質素都唔錯，我就平平哋買咗條黑髮晶，因為我發覺自己原來冇黑髮晶 ！另外見到一條切割面嘅白晶都幾靚，又買埋佢！😆

航拍 23 -鴨仔灣

都有一排冇放飛機，因為政府要求航拍機要註冊，我未有時間去搞，前兩日好友約我去放飛機，大家先至上網睇吓點樣註冊，原來都要等佢發個註冊證，唔係咁快可以攞到，趁寬限期未到，飛返轉先！

又係好友揸車接我去放飛機，今次揀咗流浮山下白泥，呢個海邊叫做鴨仔灣，呢度有紅樹林，個景唔算好靚，就飛上去睇吓靚唔靚，由呢度望過對面海，就係深圳，好多高樓大廈，當然飛機唔可以飛過去，但係紅樹林對出就有D棄置左嘅養蠔場，就可以飛過去睇吓，呢個位置冇瓦遮頭，我哋飛第一轉嘅時候身水身汗，D汗都滴落個Mon度😅，最麻煩係陽光好猛烈，根本睇唔到個mon 🤦🏻‍♀️，唯有行入少少搵到個樹蔭位，個人企喺樹蔭下，飛機擺出去，飛咗兩轉，個景唔算好靚，而且部機好似有少少問題，有幾次disconnect 咗 ！唔知係咪部機都用咗幾年，都開始壞壞哋！😔

放完飛機返到屋企已經好晏，跟住去好友屋企打邊爐，今日四個齊人，差唔多食完好友嘅女朋友上嚟坐，因為佢同好友明天會去迪士尼酒店staycation，所以今晚會留喺度，方便明天一齊出發，好耐冇去旅行，好耐冇住酒店，個人就唔係太喜歡去staycation，既然喺香港，幾時都係自己屋企最舒服😅

明廚

約左好友去旺角呢間食店，要行過隔離舖位再上樓上，樓上再分開咗兩邊，有門隔開，好似兩間房咁，每邊大概坐兩枱，每枱大概八個人，我哋坐嗰間房冇其他客，對面間房都只有一枱客，閂埋門就可以各自傾偈唔會嘈到人！

今晚我哋有七個人，店員推介我哋食蝦同蟹，我哋就叫咗三隻油鹽焗火焰奄仔蟹，同埋一份火焰蝦，筍殼魚，另外叫咗幾個小菜，都係一D好熱氣嘅食物😅 好友們喪飲啤酒🍺🍺，因為有一個平時揸車就唔飲酒，今日佢冇揸車，可以盡情飲，我就冇飲喇！兩個好友飲多兩杯開始講嘢越嚟越大聲，亦都講左D笑話平時係唔會講嘅，我哋笑到肚痛，知道佢哋飲大咗，個人都玩得放D 🤣🤣🤣 我哋足足食咗三個幾鐘，笑咗成晚，食得好開心，最重要係自己一班人一間房，幾時都係人多食飯開心啲，下次可以再嚟 👍🏻

Pondside Cafe·Restaurant •Bar

大廈又要做強檢，今日出街先去做咗檢測先，跟住過中環睇醫生，因為約咗今日驗血同埋照超聲波，搞掂晒就落咗去金鐘，因為想去呢間餐廳試吓！

餐廳位於香港公園內，由太古廣場行上去都好近，我都係第一次去香港公園，唔知呢間餐廳開咗幾耐，不過最近有報道介紹，現場睇店裏面都有D新，外面就唔係好新，可能裝修嘅時候只係裝修到D窗，D石屎位翻新唔到，因為個餐廳在池邊，我諗外牆要翻新都有D困難，可能要好大工程，呢間餐廳嘅最大賣點就係個水池，由餐廳望出去睇到個小瀑布，同埋個水池，其實水池度有好多烏龜，不過唔近餐廳呢邊 😅 可能有報道介紹過，都全場滿座，要等位，見餐廳有一半位望到水池，另一半就睇唔到，見到有D情侶都係想等池邊位，店員好生手，見有幾張枱寫住Reserved，但係由頭到尾都冇人坐，本來係唔需要等位，就係因為有幾張枱hold 起咗，先至要等，不過都好快有位，我坐個位啱啱好望住個池，可以影下相！

食物方便，餐牌只有3 course 午餐，價錢都唔平，頭盤我揀咗蕃茄湯，佢跟咗一小塊意大利包，配橄欖油同醋，主菜揀咗香煎豬扒配黃梅紅酒汁意大利粉，飲品就要咗杯凍咖啡，因為要 Latte ，仲要加錢，同埋轉燕麥奶，都要加錢 😅，豬扒雖然有D乾，不過味道唔錯，意粉就係我喜歡嘅Al dente 😆 個汁都好味！咖啡都好好飲，唔錯唔錯！

YOI Coffee & Bakery

晏晝突然間又落雨，而且雨勢都幾大， 去九龍城食D嘢，上網search下，見到呢間新開嘅coffee shop，可能因為落雨，店入面唔係好多人，大概只有三四枱客，全店大概有30個位左右，餐牌都好簡單，主要都係吐司麵包之類，我叫咗個慢煮嫩雞胸羅勒醬三文治配火箭菜，同埋甜品 Religieuse à la Pistache 開心果修女泡芙，另外叫咗杯咖啡，三文治嘅麵包係用意大利香草麵包，好食！份量都幾大，食完都好飽！好彩個甜品好細件，佢個外形好似個壺蘆咁，係兩個泡芙疊埋一齊，裏面係開心果Mousse，再加啲開心果碎，近來都好少食甜品，呢個唔太甜，好好味！呢度D咖啡都好好飲，下次再試吓其他嘢食！

 

明日戰記 Warriors of future

 

在未來的世界，地球受到嚴重嘅污染，人類要興建天幕去解決問題，同時有一種巨型植物在地球迅速生長造成破壞，同時佢亦都能夠淨化空氣，人類稱佢為潘朵拉，科學家發明左一種藥物，可以抑制潘朵拉嘅生長，減低佢造成嘅破壞，同時仍然能夠保持到佢淨化空氣嘅作用，B16 區派出空軍執行任務，尋找潘朵拉嘅母體，再注入藥物，必須在下一場大雨之前完成任務⋯⋯！

睇呢套戲純粹係為咗捧香港電影場，之前睇預告，大概都知道故事講乜嘢，呢一類科幻片嘅劇情都係大同小異，值得人關注嘅係佢嘅電腦特技，香港嘅技術向荷李活大製作水準邁前一大步，製作水準都好高，雖然故事比較單薄，演員亦都係只有幾個，不過睇得出製作認真，花咗好多心機，好值得大家去捧場 💪🏻💪🏻💪🏻💪🏻

Starting over

今日去中環複診，睇完醫生上去士丹頓街，本來諗住想去食pizza，但係去到Pizza店，睇吓個餐牌，見到Pizza都係一個個咁order ，冇一件件🍕咁樣 order ，所以冇食到，因為一個人食唔到成個Pizza 😅，行過少少見到有間 coffee shop，個樣似係新開，因為好新淨，藍白色嘅裝修好靚，門口仲擺咗個舊式電話做裝飾，餐廳嘅玻璃窗仲可以望到大館，入去試一試佢先！

叫咗一個素嘅意粉，蘆筍黑松露意粉，另外叫咗杯咖啡☕️，本來唔想飲咖啡，因為今朝喺屋企自己沖咗咖啡飲，但係又冇其他飲品選擇，最後都係飲咖啡，不過呢度嘅咖啡真係幾好飲，有少少衝動想買包咖啡粉返去試，但係屋企仲有好多咖啡粉同埋Capsule，所以都係遲啲先！😆

 

Paul’s kitchen

上次去好友屋企食飯嘅時候，好友介紹呢間餐廳，話啲嘢好好食，同埋佢係食非洲菜，因為未食過非洲菜，所以想試吓，不過我都好疑惑，非洲菜真係好食咩？我哋訂咗枱，今晚就去試！

餐廳在重慶大廈裏面，入門口，就有一大班印度人遞傳單俾你，叫你試印度菜，你只要話俾佢聽你要去呢間餐廳，佢哋都唔會阻攔你，甚至會話俾你聽點樣去，一入重慶大廈一路直行，見到右手邊有條黑色嘅樓梯，行上一層，第一個路口轉右，行到尾就見，餐廳好新淨，唔知係新開定係新裝修，個格局好似西餐廳，睇吓個餐牌，食物嘅選擇都幾多，好友食過佢嘅炸魚話好好食，見到餐牌寫住炸魚係用鯽魚， 好友話佢個燒春雞都好食，不過我哋今次冇叫，為叫咗非洲辣王雞煲配烤餅，另外仲叫咗沙律配軟殼蟹、加納XO醬燒茄子、炸魚墨西哥薄餅、墨西哥夾餅配燒牛肉，飲品佢哋就叫咗非洲加納朱古力，個朱古力好香滑，味道好濃，真係好飲，我就叫咗巴基斯坦芒果汁，又甜又好味！最後叫左紅絲絨蛋糕，味道唔錯，不過好漏，我哋食得好飽，所以四個人share一件都食唔晒！😆😆😆😆

食物係好食嘅，不過感覺上佢唔係好正宗非洲菜，嚴格來講可能係用非洲嘅配料，加入去港式嘅菜式度 cross over ，如果係正宗嘅非洲菜，未必係啱香港人嘅口味都唔定，總之好食就得，一定會再幫襯！不過要留意一樣嘢好重要，就係佢個廁所，好恐怖！因為廁所係商場嘅廁所，又殘又舊又污糟，D門仲要冇鎖，出面有好多黑人同埋印巴藉男士，你都咪話唔驚！不過呢度個廁所唔關餐廳事，餐廳本身係好新淨，係個商場太舊，所以個廁所都好核突，所以建議先去iSquare借廁所，去完先至好嚟食嘢，食完想去廁所都係去返iSquare！😅