舞浜駅

經過一晚休息,翌日醒來都好精神,這一天 (27/8/08) 既目的地係廸士尼,由新宿往廸士尼可乘火車往東京駅轉車去舞浜駅,舞浜駅係最近廸士尼既車站,落到去火車站,都幾多人,先揾左中央線往東京方向既月台號碼,跟住指示去揾都唔難,因為每條火車線都用唔同顏色代表,只係車站人來人往,四通八達,人人都匆匆忙忙,好像不可以停下來一樣,令人覺得又急又亂,我地跟住指示揾到月台,月台上都好清楚顯示下一班車的到站時間以及停在那邊月台,日本的火車站都有分類垃圾桶,地方都很清潔,只是比較舊一點,往新宿這些旺區的火車都比較新,車門上都有地圖和顯示屏,火車裏的座位都是軟墊的,而坐位上面都有個架,讓站立的人可以把手提物件放在架上,以免阻礙通道.

去到東京駅要轉京葉線去舞浜駅,轉車時要行一大段路,大約十多分鐘,(成450米!)沿路都有些商店,主要是便利店,藥房和賣手信禮盒的小店,過了這些商店,還要行幾段平路的扶手電梯(有點像尖沙咀的地下通道)再要落幾次電梯才能到達京葉線往舞浜駅的月台,在等車時見到月台的便利店,有招聘廣告,part time有900yen/hour,即係六十幾元,高過老麥!

京葉線的車比較舊,不過這條線都幾多人,當然,本土人去廸士尼既都好多,所以一到舞浜就好多人落車,都唔使揾,跟住d人行就會揾到迪士尼,而且無大厦遮擋,好遠都望到廸士尼既城堡,好興奮呀!!!!!!!!

Burgeroom

久久沒有和姊姊茶聚,今天去到銅鑼灣,試試看她有否時間,剛巧她也想到銅鑼灣,便相約去試Burgeroom, 地點位於加路連山道,Agnes b 斜對面,原先想去Agnes b試, 不過覺得食晚餐比較適合,所以都係下次先去Agnes b ,今次先試Burgeroom.

我地叫左兩個burger, 一個係The club 雙層芝士牛肉另一個係煎鵝肝牛肉,同埋炸雞翼,2杯咖啡,menu 無汽水果汁,買完先見佢地原來有汽水櫃,食burger都係覺得飲汽水比咖啡適合. 個雞翼熱辣辣,應該剛炸起,勝在無乜油,而果2個burger 真係非常大份,睇見都飽,份牛肉相當厚,個鵝肝煎得剛剛好,配菜有酸瓜,蕃茄,羅馬生菜,磨菇,煙肉,芝士同雞蛋,我地都食唔晒,真係非常飽,應該2個人share 一個就啱.

博多天神

到埗既第一餐去食拉麵,在歌舞技町一番街通往酒店的路上,有好幾間拉麵店,我地去左呢間博多天神,附近都仲有2間分店,佢地以平價及無料替玉(免費加多個麵餅)作招來,門口隻豬擺設用中文寫住"可以拍照",這店子很細,比較舊,約有十多個位,有三個師傅負責煮食.
佢地既豬骨湯底好似用一個好大既爐去處理,我見到店內有兩個大大個類似蒸氣煱爐既物體用來煮湯,d湯入口好濃好"奶"既感覺,d 麵係幼麵,煮得啱啱好唔會"淋",好好味,而麵既size 細細地,一個就少左d,兩個又太多,我地都無要到替玉.
價錢方面,淨麵(有芽菜木耳)$500 yen, 叉燒拉麵 $650 yen, 加蛋 $50 yen,我見好多男士都係叫淨麵加替玉, 店門口放了些供人客自取的"無料替玉"卷,不過都唔使比店員,見d人同師傅講,師傅就會煮比佢,用另一個無湯既碗裝住比客人,所以要加麵就要留返d湯!

住在新宿 Shinjuku

到左新宿當然係去酒店先,一出車站見天色有點暗,還下起雨來,我地訂嗰間Hotel Kent 酒店位於歌舞伎町一番街,由新宿駅步行約十分鐘左右就到,酒店雖然係三星級,不過設備齊全,亦很整潔,只是洗手間細左d,日本的電視都是全高清播放的,有"無料"(免費)電視,當然也有"有料"(收費)電視,不過有料電視主要是三四級的節目.
第一日在酒店附近行吓,食左碗拉麵,同埋買左d水果,就返酒店,晚上八點就瞓左,清晨四點幾起身,舟車勞頓左十幾個鐘,都好疲累,早d休息預備翌日既行程!

出發

星期二出發,約左旅行社早上5:40在機場取酒店及機票,我像之前一樣,乘的士去九龍站轉機鐵,去到九龍站才知道未有車!!!!!!!!!!要5:52先有第一班車,唯有再坐的士,我都驚截唔到車,咁啱有人坐的士來,都唔知好彩定唔好彩,去到機場5:50車費要$200,攞左機票要6:15先可以check-in !!!!!!!!!早知瞓多半個鐘,然後先至施施然坐機鐵都唔遲,事關呢班機好多人,第一次坐西北航空,呢班機以美國底特律為終點站,中途停東京,由於係波音747,所以超多人排隊check-in,不過佢地開晒d 櫃位,同埋好快手,check in完都7:00,跟住去左Pitaza食早餐,食左個芝士火腿包同青蘋果特飲,班機預定8:10起飛,但係到8:00上機既人龍仲係好長,當然delay左小小起飛啦!

4小時既航程,大部份時間都係瞓覺,因為早機,個個都眼瞓,只係派餐時醒一醒,食完就瞓,我地去到成田空港係當地時間1:15,成機人落機,多數人去候機室等轉機,大概只有兩成人去東京,加上多數係日本居民,我地行外國人通道過關,出奇地少人,記得上次要排個幾鐘,今次排幾個字就攪掂,跟住去買車票,睇書介紹買左遊客套票$3500yen,包一張去新宿既Narita Express 車票(原價$3110yen)同一張Suica咭(日本既八達通,入面有$1500yen+$500yen 按金) 坐火車去新宿要一個半小時,去到新宿三點幾,比預期早左.

回家了

五日四夜東京之旅,話咁快就完左,今次行程都唔太理想,也有點阻滯,東京呢幾日一時好熱(就落雨嗰種熱)一時又落大雨........成身大汗,要買既野又行好耐先揾到,影完d相張咭依家又讀唔到........!!!!!!!睇吓攪唔攪到,再分享吓今次行程苦與樂,今日先休息休息!

又打風

無端端又打風,呢個鸚鵡又迫近,唔知打唔打得成,悶熱在兩日應該會落大雨.

成個禮拜都唔係幾精神,上次睇完戲頭痛左兩日,呢幾日又瞓得唔好,今日都好頭痛,原本想去睇戲都唔夠精神無去到,忍倒都唔想食药,最終太辛苦都要食!

尋日就去左Super Sandwich 食焗薯,都好耐無食,最鍾意食西蘭花芝士焗薯,仲落左好多芝士tim,一路食我望到佢地個招牌原來仲保留左Oliver's 個字,以我所知好耐之前 Oliver 係一間高檔士多,因為賣外地食材的小店,像間雜貨店士多仔,那時還沒有City Super, Great, Gourmet 呢d超市,好多人想買些優質的外地入口貨,都會去Oliver,我只記得買過些特別的糖果朱古力,而Oliver就在海洋中心廣東道入口的扶手電梯底,後來在扶手電梯底的另一邊賣三文治,只記得那些三文治好super,好大份...........後來Oliver士多不見了,漸漸發展成現在的Super sandwich.

Journey to the Center of the Earth

睇左3D版,入場時派左個3D眼鏡,個眼鏡好重,可能我唔夠精神,睇一陣已經有d頭暈,仲要用手託住個眼鏡..................講返套戲,當然無乜劇情可言,成套戲得幾個人,主要係玩電腦特技同3D效果,都幾有趣,不過睇完真係好疲累!!!!!!!!!!!!

相機

想買部相機,用緊果部又開始壞壞地,個Menu掣無反應,教唔到拍攝mode,我諗緊買部Canon IXUS80I, 細細部唔太bulky, 不過個mon得2.5吋,如果3吋mon既IXUS860就大部d厚d,個樣無咁靚,仲要貴仟幾蚊!我諗都係會買2.5吋呢部,平d,佢有5種色,銀色就太普通,粉紅色唔夠粉色,好似灰灰地(上排右一),藍色又係灰灰藍藍,剩返下面既香檳色同朱古力色,香檳色個色都好靚,但係太令,有d反光,睇落似金金地色,朱古力色好特別,好實色,唔令,比較man...........都唔知要邊隻色好,等我再諗吓先!

奧運開幕了!

2008年8月8日8時正,奧運終於都開幕了,開幕式只看了小部份,而升國旗同埋點聖火一刻,好感動...................好熱烈既氣氛,真不敢想像身在現場的震撼氣氛有幾大!能夠參與其中的人,一定畢生難忘,希望今年之內有機會可以去北京看看................無得去現場睇鳥巢同水立方,不如睇吓模型吖! 我見到都好興奮! ARUP 整左個展覽,有晒鳥巢,水立方,機場同埋唔記得乜野building,响又一城 ground floor 有得睇!

Book 左喇!

今天很忙呢!瞓醒覺就出去油麻地取護照,去入境處之前先去左橫綱食碗麵,好多人,差d無位,食完尋日既八番再食今日既橫綱,真係橫綱d麵好食好多,個湯都好味d,仲有八折tim, 2個麵加埋飲品都係$86,好抵,唔怪得咁多人,我地好快食完就走,去到入境處等左都唔使半個鐘就攞到新護照,新嗰d護照好靚,入面彩色既,而每兩頁都有個唔同既"華"子印左响中間,個人資料嗰頁仲好似過左膠咁,同埋放大左既相印左上一頁度,又加埋緊急求助熱線,我都想換,可惜未到期.

攞完証就坐巴士去旺角銀行中心,book左去東京既機票+酒店!!!!!!!!!!之前睇過d資料,又上網睇過d資料,揀左間三星級酒店,而又近新宿地鉄站既Hotel Kent ,其它酒店只有semi-double room, 即只有一張四呎床,得呢間有twin room, 其次就京王,上次去就係住京王,雖然係五星級酒店,不過比較舊,依家翻新緊,價錢貴成仟九蚊,今次都係住平d食好d,依家心情好興奮,好緊張,快d到月尾,又可以去東京廸士尼今次去日本自遊行一定唔可以唔帶既正文出版嗰本東京旅遊全攻略(好似賣廣告!!!)不過呢本書既資料好齊,我仲發現自己原來舊年年尾已經買左一本一樣既書,不過新果本update D.

Book完酒店去左許留山食野,食完去左買喼,見到個米奇喼好靚,要成五佰蚊太貴無買到,如果係史廸仔而又平d我會考慮,最後買左個三佰幾既,比較硬身d,相信會耐用d.

八番拉麵

忽然又打風,八號風球掛左成日,無無聊聊去左荷李活廣場,諗住攞返上次訂左嗰件衫,一吓醒唔起打風無人返工無得攞,商場大部份既店都無開,原本想去Riso食飯又無開,諗住去新個間ant one,但係上個星期去過覺得都係麻麻地,最後去左無乜人既八番拉麵,叫左個豬軟骨拉麵,連埋汽水$48,份量比較少,唔係咁抵食,而且麻麻地好味唔怪得無乜人.

之後去左又一城,好彩log-on有開,諗住買Hair pack, 上次買左2001既綠茶hair pack ,幾好用,用完頭髮好柔軟清涼,去到見佢地原來做緊vip privilege nights,有折仲有coupon送,我順便買d野食,之後再去Taste買左d水果,買左幾個火龍果,好重,最近鍾意食火龍果,好香蕉咁搣皮食,好味道!!!!!!

Plaza Hollywood

最近去荷李活廣場,見d shop唔同左,加入左d 大路d既連鎖店,好似多左d啱我既shop,food court 仲裝修緊做大食代,其實覺得個商場既設施都幾好,有育嬰室,仲分開有換片既房同哺乳既房,又有locker, 廁所又多又清潔,有得上網,有電視睇,又有多椅比人坐,上次去朗豪坊揾張櫈坐吓都無!呢度成日都有event攪,今次做扭計骰,都幾得意.

The Mummy : Tomb of the Dragon Emperor

期待已久的盜墓迷城3,終於都睇左,成套戲頭嗰part講男女主角的平淡生活比較悶,中後段有大量特技,千軍萬馬都好震撼,女主角換左人,無左之前既連戲感覺,今次大玩秦始皇和兵馬俑,可能題材耳熟能詳,唔似得睇埃及木乃伊咁有神秘感,梁洛施都幾搶鏡,不過佢同楊紫瓊d對白有時講國語有時講英文,都幾搞笑.