壹方城、壹方天地

今日又同好友返大陸，第一站去咗壹方城，我哋原本諗住係去壹方天地，但係搞錯咗去咗壹方城，一場嚟到，先去飲杯咖啡，上網搵咗一間叫做覔的咖啡店，佢喺一間書店裏面，我哋嗌咗幾杯嘢飲，味道就不過不失！

飲完咖啡行咗一陣，就去食餐晏，去左一間叫做皖廚，話係食徽菜，對我哋嚟講就係中菜🤣 呢度主打應該係一啲好似滷水嘅雞咁，因為我哋經美團點餐，所以我都睇唔到個餐牌，因為好友負責落單，我叫咗一個排骨、尖椒炒大腸、鵝片、雞煲，另外叫咗一jar 桃汁，食物嘅味道都OK，桃汁就麻麻哋！

食飽飯就搭返車過去壹方天地，呢個商場都好大，分開咗幾個區，我哋只係去咗其中一個C區，喺入面行咗一陣，就去睇戲，我都係第一次喺大陸睇戲，睇完戲再行吓，跟住就去食飯，我哋揀咗一間叫做漁舶𣾀食放題，佢喺門口有個海鮮檔，你自己揀海鮮返去打邊爐，亦都有海鮮料自己揀，又可以叫串燒食，不過佢用嚟煮海鮮個鍋好細，佢都分開咗兩個鍋俾我哋，一個話用嚟煮海鮮，另一個用嚟煮其他嘢，兩個都係好細個，雖然呢度都有牛肉食，但係質素麻麻，所以我哋只係食咗少少，主力都係食蝦，佢呢度都幾得意會收多$100按金，如果浪費食物就要沒收呢$100 ，否則的話會退返去支付寶Account，基本上要走咗之後先知會唔會扣你錢😅

食完飯我哋去行山姆超市，我係第一次去，兩位好友都有會員，可以入去買嘢，地方確實係幾大，我就冇乜嘢啱，因為佢啲份量好大，而且好重，好有想買餅乾，揀咗兩款大家share，跟住一齊call車出返去福田區，因為兩個好友要去按摩，我就同你好友去搭車返香港！原本都想搭高鐵，但係高鐵D時間有限制，所以最後都係搭港鐵返香港！

 

Kaya 咖吔

今日去將軍澳，試咗呢間食星加坡菜嘅餐廳，午餐試咗雞絲河粉、巴東牛肉飯、海南雞飯，仲有飲白咖啡，味道都唔錯，巴東牛肉都幾抵食，海南雞飯就一般，河粉就略為細份左D 😅

 

Arcadia

相約好友去銅鑼灣食飯，因為之前喺網上見到有間餐廳，好吸引，所以嚟試吓，餐廳有兩層，一層係室內，上多一層喺天台，即係露天座位，我哋訂咗室內位，去到嘅時候帶咗我上天台，天氣實在太熱，一行出去已經覺得熱辣辣，即刻話返俾佢聽我哋係訂室內，所以再落返去坐，呢度嘅佈置都好打卡able，而且呢度嘅cocktail 都有D特色，我哋叫咗一個叫一千零一夜嘅飲品，佢係一個好似神燈咁嘅壼，裝住D清酒，下面墊咗塊好似棉花咁嘅嘢，店員會用火機點着佢，就做到一個閃令令嘅效果，直至火光熄滅，再倒D酒出嚟飲！😎

食物方面我哋叫咗個套餐，前菜有魚子醬竹炭甜筒，個魚子醬冇乜味😅 仲有三揀二前菜：芝麻吞拿魚塊佯芒果莎莎醬、薄切紅菜頭配水牛芝士及烤合桃肉、鵝肝配果醬、沙律，因為我哋四個人，可以揀晒四款😄 主菜我哋揀咗煎鱸魚、脆皮豬手、兩份牛柳，食物嘅質素都唔錯，當然佢個價錢都唔係平，食完嘢就上返去天台影相，影咗一陣就走，因為真係好熱，呢幾日嘅天氣係熱到不得了！食完飯好有車我哋返過九龍，然後約好過兩日再一齊返大陸 😂

 

飯局作客 - 六月之星生日飯

又到兩個六月之星生日嘅飯局，今次又係去好友屋企食飯，佢哋提早去買咗海鮮同牛肉，我就去九龍城買雲吞同魚蛋，仲要攞蛋糕，跟住搭的士去好友屋企會合佢哋，今晚打邊爐，佢哋要食指定嘅牛肉，指定嘅雲吞同魚蛋，所以每次打邊爐都要去幾個地方買餸😅 我哋有蒸海鮮，然後打邊爐，最後食蛋糕，今次買嘅係 Tony Wong 嘅開心果拿破崙，因為其中一個壽星女鍾意食開心果，同埋唔想次次都食水果嘅拿破崙，呢個開心果拿破崙幾特別，好食！

 

麵山口商店

在網上見到有人介紹呢間拉麵店，位於油麻地廟街附近，今日就去試吓佢，2:27 pm 去到要等位，前面有四個，等左五分鐘左右有位，因為佢 2:30 截龍，3:00 落場，啱啱好趕及最後一轉，店入面只有十幾個位，餐牌好簡單只有三款拉麵，醬油豬骨白湯拉麵、札幌辛味噌豬骨白湯拉麵、鯖節豬骨白湯拉麵，我叫咗鯖節豬骨白湯拉麵，追加咗三塊叉燒，碗拉麵嚟到先發覺原來佢有叉燒，因為睇相見唔到有😅 拉麵同個湯都OK，不過冇乜特別，食完諗住過隔籬間coffee shop飲咖啡，不過佢full晒冇位，唯有下次啦！

 

元朗合隆潮州粉麵

最近成日去Airside ，對面新蒲崗呢間粉麵店，試吓去食！
試咗佢嘅胡椒豬肚湯底，送就試咗牛丸、豬肉餃、豬脷，另外有叫咗蘿蔔，佢個湯都加咗唐芹，胡椒都好夠辣，味道唔錯，佢呢度有D辣菜脯，試咗少少非常辣 🥵

 

韓脈

好友五月生日，約齊人一齊出尖沙咀食韓燒，去咗尖東食呢間，去到先發覺，呢間應該係之前叫韓珍，我唔知佢之前係咪喺同一個舖位，但係聽個名好似食過，我哋一早訂咗枱，不過嚟到見到唔多人，大概只有兩三枱客，我哋叫咗個套餐，另外加咗隻醬油蟹同埋煎蛋餅，店員會幫我哋燒肉，食物嘅質素唔錯，服務亦都幾好，不過飲品就麻麻哋！

傾計傾到好友父親患了肺癌，因為已經去到第三期，而且又擴散左，所以佢爸爸話唔醫喇！後來又改變主意話要醫，預計鏢靶藥要10萬蚊一個月，佢兩兄弟都諗緊夾份俾錢，不過擔心龐大嘅支出頂唔到幾多個月🥺 所以都未有定案點樣做，都戥佢哋擔心，近期都有朋友患癌，希望佢哋早日康復💪🏻