添好運(K11)

上次去K11 果間coffee shop嘅時候，見到樓上呢間添好運，諗起都好耐冇食過，今次就去試吓，可能呢間店新開，所以冇乜人，佢哋嘅茶都有一個餐牌，我叫咗個雨花茶係綠茶嚟嘅，我叫咗三款點心，必點嘅係佢哋嘅焗叉燒包，另外叫咗紅米腸粉同埋粉果，味道不錯，後來店員話張單滿$100 ，又用滙豐信用卡俾錢嘅話，焗叉燒包會買一送一，可以加$2要個外賣盒，拎走送嗰份焗叉燒包！其實都幾抵，如果兩個人嚟食，真係要每人食一碟先夠，下次約埋好友過嚟一齊食先得！

 

Wine and Dine 2024

又到一年一度嘅 Wine and Dine ，今年冇買套票，因為已經太多杯喇！志在入去食吓嘢，好友甚至自己帶咗支酒入去，我哋四個自備酒杯，亦都冇去試酒，淨係買嘢食，酒就飲自己嘅，前後都飲咗兩支，買咗嘢食就坐喺舞台前面一路食一路聽歌，今年嘅食物大致上同去年差不多，我哋有食牛肉、串燒、青口等等，牛肉我哋食咗兩、三檔，真係分別都幾大，我哋行吓食吓兩個幾鐘就走！

跟住去咗銅鑼灣食海底撈，我從來未食過，今次第一次食，都係火鍋，主要都係睇吓佢地唱生日歌搞吓笑，成晚都有幾枱要唱生日歌，我懷疑根本冇人生日🤣🤣🤣🤣

 

飯局作客 - 生日飯

去好友屋企食飯，為我預祝生日，今晚整咗好多嘢食，整咗隻燒雞，今次係用好有在英國買回來嘅Nando’s 醃醬，另外買咗斧頭扒🥩、蝦🦐、海膽、豬扒、意粉🍝、薩莉亞雞翼、魚蛋，真係飽到不得了！好友早前買咗隻松鼠狗，家姐狗仔可以同小朋友玩，我哋大人就可以輕鬆啲傾吓偈，又提到出年去旅行嘅安排，之前講咗出年去北海道，不過其中一個好友又縮沙，主要係因為唔想暑假檔期去，覺得機票太貴，所以可能又去唔成，或者去其他地方都唔定，到時再決定！

食完飯當然唔少得食蛋糕🎂，好友今次買咗拿破崙蛋糕，雖然出自帝苑酒店，不過我都覺得係Tony Wong 好食D 🤣

 

Common Man coffee roasters

今日放假，夜晚約咗好友食飯，下午出去尖沙咀剪髮，剪完髮行過去K11 ，睇吓霸王茶姬仲係咪咁多人，見到門口都係好多人等緊，但係對面開咗一間新嘅咖啡店，而且都幾大間，又去試吓！

店入面分咗兩邊座位，中間係大水吧同收銀，收銀前面亦都有少少麵包類嘅食物賣，不過之後好少量，門口亦都有把一啲咖啡相關嘅產品，主要係咖啡豆，見到有條樓梯，但係條樓梯係由外面行上去，係上去另一間食店添好運，所以呢間實際係只有一層，雖然今日係星期日，都仲有少少位，試咗佢哋嘅杯 Force of Nature juice 裡面有羽衣甘藍、蘋果🍎、青瓜🥒、薄荷、薑🫚，又試左 Nitro honey oat latte with walnut crumble ，都唔錯 ，食物就試左 King prawn Laksa Mac & cheese 同埋 Black garlic pesto Rigatoni 後者雖然係素，但係味道唔錯，可能個芝士夠香！不過食物嘅份量都係比較細碟，呢間餐廳都唔錯，下次可以帶朋友嚟試吓！

 

安蘭 by Red Object

上次去呢一間店嘅時候佢係食滷水鵝嘅，而家轉咗手係食蕃茄濃湯的食店，座位空間同之前差唔多，餐牌都幾吸引，係比較日式嘅食物，我叫了一個雞扒蛋包飯，味道唔錯，下次可以試吓其他嘢，尤其是佢主打嘅蕃茄濃湯😄

 

Barista by Givrés

食完飯行扶手電梯上士丹頓街呢間 coffee shop，佢門口係打卡位，好多遊客影相，旁邊有Bakehouse ，見佢依家少左人排隊，上次食佢地個牛角包，覺得質素下降左，而且多左人做近似嘅麵包店，質素唔輸佢！ 我地order 左兩杯咖啡，質素唔錯！之後再叫兩個玫瑰造形 gelato，好靚好味👍🏻

 

Uma Nota

今日去中環睇醫生，醫生refer 我去照一照，希望冇事！睇完醫生上去卑利街食晏，去左呢間巴西餐廳，午餐時間都唔多人，少於一半坐位有人坐，lunch menu 有兩個course 或三個course 選擇，我地叫左三個course ，頭盤揀左炸木薯芝士粒、池魚刺身山葵虎乳汁，主菜就叫左炭燒牛柳同埋豬肋骨，第三個course 甜品或飲品，我地以為兩樣都有，所以叫左甜品，食完諗住叫飲品先知誤會左，咁就食完飯再出去飲咖啡🤭 整體食物質素唔錯，店員服務也很好👍🏻

 

Medium Rare

平時經過呢間食店見到都要等位，今日行過又冇乜人，又入去試吓，佢有D似 pepper lunch ，主要係食牛扒＇見佢有個和牛挽肉と蘭王卵 set ，又試吓佢！ 一個set 三舊免冶牛肉，都係$105，而且份量頗大件，當然牛肉質素一定麻麻地，始終一百幾十，算係性價比高！