隴滿桂、西塔老太太

上星期去完大陸，今日又去😅今次又係四個人，約咗在落馬洲口岸等，一齊撘地鐵去會展中心站，去福田平安金融中心食 lunch ，之前第一次來呢個商場已經想食呢間隴滿桂，因為見餐廳裝修好靚，店中間有隻艇，可以在艇上進餐，見佢寫住西湖船宴，應該食杭州菜

我地被安排坐𥚃面最入果邊，𥚃面都有隻艇可以坐十人左右，睇吓餐牌，食物選擇好多，每枱必點的叫花(化)雞，只要有叫呢個菜，店員會攞一個假的叫化雞放左蕂籃內，讓人客敲打叫化雞，像敲打叫化雞嘅外層，每敲打一下都會講一句有意頭嘅說話，儀式感十足🤣 另外我地叫左一個臭豆腐、小籠包、秋葵、韭菜餅，同埋一個我都唔記得咗係咩嚟嘅菜，食物嘅味道唔錯，賣相都幾精緻，不過又係冷氣不足嘅問題，坐喺裏面都幾熱！😅

食完晏我哋call車去深業上城，喺呢個商場度搵間咖啡店飲咖啡，呢間咖啡店喺商場嘅頂樓露天area，好熱🥵 我哋去咗一間叫做See Saw嘅 coffee shop度飲咖啡，咖啡不過不失，冇乜驚喜😇 

飲完咖啡行過少少見到有間 Galleries Lafayette ，好友入去睇鞋，睇啱咗隻款，價錢比香港平，不過冇佢想要嘅白色，諗住黑色都可以，不過冇佢size，所以最後冇買到😅跟住我哋行返入去商場，先發覺原來 Galleries Lafayette 個正門原來喺下面嗰層，入到去見到有一檔賣公仔嘅，一入去見到一隻浣熊公仔，覺得好靚好鍾意，不過略為嫌佢大隻咗D，但係佢細隻size又冇咁靚，最後都係決定買隻大嘅，不過佢話得一隻存貨，而且隻存貨爭咗頂帽，佢話因為啲配飾全部人手做，頂帽仲未整完，而陳列緊果隻頂帽又甩咗粒珠，所以要另外後補寄返俾我哋，但係佢唔寄返香港，所以叫佢寄去好友在深圳嘅屋企度，遲啲先再攞返！

買完公仔再行入啲睇吓衫，見到佢做緊七折，好有睇中咗一件T恤店員話而家有至上次，基本有七折，如果買夠四件再有七折，差不多等於半價，但係好友只係睇啱咗一件，不過呢啲Offer可以同場搵其他客搭單砌夠四件就大家都有折，所以好友都買咗兩件，兩件係同款唔同色，原價在香港賣千四左右，而家同樣價錢有兩件，抵好多！

買完嘢本來想去蓮花山公園度行吓，但係出面實在太熱，我哋行咗條天橋過去之後已經想返轉頭，本來諗住行去公園嘅另一邊搭地鐵，但係見到條斜路我哋就放棄咗，行返轉頭去返商場，先去喜茶買嘢飲散熱線，飲杯凍飲真係冇咁熱，跟住就call車去返皇廷廣場，因為要去超市買嘢同埋食飯，走嘅時候方便D!

去到皇廷廣場，就直接我哋想食嗰間西塔老太太攞位，先攞咗飛，應該都有排等，所以落去盒馬超市先，因為好友想買手撕雞，佢嘅手撕雞又真係幾好食同埋幾抵食， $39一隻手撕雞，即刻成隻雞起肉再加配料撈勻入盒，好友一次過買咗六隻，跟住又買大樹菠蘿，同埋買一D包裝嘅鴨腎，話要寄去英國俾屋企人，我哋就買咗兩份水果，陣間食完飯食，買完嘢再去另一間薛記炒貨度買零食，我都買咗Nuts 同埋凍乾秋葵！

上返去餐廳睇吓有位未，上到去仲未有位，我哋坐喺外面等，等咗一陣好友去咗廁所，佢就有位喇！呢間係食韓燒嘅餐廳，座位有少少迫，冷氣又係唔多夠，今晚都座無虛席，我見好多都係本地人，我地又係經美團買咗套餐，另外加左份鱔，呢度係有店員會幫你燒，自己唔使出手，肉類質素都ok ，我地食埋生果先至走，一齊搭車返去落馬洲，再分道揚鑣！

 

山本屋

出去尖沙咀行吓，主要係想去海運大廈影吓巨型死侍，不過今日超級熱，所以好快就出晒汗，嗱嗱聲入返商場涼下冷氣，喺海運大廈睇啱咗一副太陽眼鏡，但係冇我想要嘅黑色🕶️，退而求其次買咗啡色，行咗一陣，見到呢間山本屋，係食烏冬嘅，呢個位以前係一燈拉麵，之後轉咗做祥仔辣辣，近期就轉咗呢間烏冬店，叫咗個壽喜燒烏冬，個汁煮到非常之熱，烏冬都好煙靭，味道唔錯，始終壽喜燒汁唔會差得去邊🤣

 

Little Fresh

食咗幾日中餐，今日食返個西餐，今日天氣非常之熱，出咗去旺角，去咗呢間上樓舖，午膳時間，只有兩三枱客，午餐有意粉或者意大利飯，叫在個煙燻豬豚肉燴意大利麵，跟左麵包同湯，另外叫咗杯咖啡，意粉嘅味道都OK，只係份量少左D，咖啡都可以，呢度地方細細，如果想靜靜地傾吓偈都係一個唔錯嘅選擇！

 

海關戰線 Customs Frontline

亞禮跟上司張sir 一同在海關前線工作，亞禮朋友不多，與張 Sir 情同兄弟。張Sir經常要忍受上司助理關長郭sir 的利用和單打、而另一助理關長Madame 邵是張sir 的女朋友，她推薦亞禮參與一個聯合行動去泰國查早前一宗軍火走私案。禮和泰國一方的情報員Ying 深入軍火交易的活躍地域，追查幕後黑手，並發現海關內部應該有內鬼，定要查出內鬼的身份。。。。。

第一次喺大陸睇戲，在壹方天地呢間新天影院到睇，戲院都好新淨，而且都好闊落，而且電影比香港更早上畫，可能呢一場係粵語版本，所以只有10個客左右，不過喺睇戲嘅過程，前面有三組觀眾，佢哋分別都係睇戲嘅中途攞手機出嚟睇，可能廣東話佢哋都唔係好有心機聽，而且大陸人好習慣睇手機，佢哋都攞咗個手機出嚟好多次，喺香港就較少咁嘅情況！講返套戲，我哋都幾有期望，不過實際就覺得唔係想像中咁好睇，而且劇情都係有啲誇張，睇到張學友都好努力去演，不過佢始終唔係演戲嘅材料，你都係專心唱歌好D🤣

 

壹方城、壹方天地

今日又同好友返大陸，第一站去咗壹方城，我哋原本諗住係去壹方天地，但係搞錯咗去咗壹方城，一場嚟到，先去飲杯咖啡，上網搵咗一間叫做覔的咖啡店，佢喺一間書店裏面，我哋嗌咗幾杯嘢飲，味道就不過不失！

飲完咖啡行咗一陣，就去食餐晏，去左一間叫做皖廚，話係食徽菜，對我哋嚟講就係中菜🤣 呢度主打應該係一啲好似滷水嘅雞咁，因為我哋經美團點餐，所以我都睇唔到個餐牌，因為好友負責落單，我叫咗一個排骨、尖椒炒大腸、鵝片、雞煲，另外叫咗一jar 桃汁，食物嘅味道都OK，桃汁就麻麻哋！

食飽飯就搭返車過去壹方天地，呢個商場都好大，分開咗幾個區，我哋只係去咗其中一個C區，喺入面行咗一陣，就去睇戲，我都係第一次喺大陸睇戲，睇完戲再行吓，跟住就去食飯，我哋揀咗一間叫做漁舶𣾀食放題，佢喺門口有個海鮮檔，你自己揀海鮮返去打邊爐，亦都有海鮮料自己揀，又可以叫串燒食，不過佢用嚟煮海鮮個鍋好細，佢都分開咗兩個鍋俾我哋，一個話用嚟煮海鮮，另一個用嚟煮其他嘢，兩個都係好細個，雖然呢度都有牛肉食，但係質素麻麻，所以我哋只係食咗少少，主力都係食蝦，佢呢度都幾得意會收多$100按金，如果浪費食物就要沒收呢$100 ，否則的話會退返去支付寶Account，基本上要走咗之後先知會唔會扣你錢😅

食完飯我哋去行山姆超市，我係第一次去，兩位好友都有會員，可以入去買嘢，地方確實係幾大，我就冇乜嘢啱，因為佢啲份量好大，而且好重，好有想買餅乾，揀咗兩款大家share，跟住一齊call車出返去福田區，因為兩個好友要去按摩，我就同你好友去搭車返香港！原本都想搭高鐵，但係高鐵D時間有限制，所以最後都係搭港鐵返香港！

 

Kaya 咖吔

今日去將軍澳，試咗呢間食星加坡菜嘅餐廳，午餐試咗雞絲河粉、巴東牛肉飯、海南雞飯，仲有飲白咖啡，味道都唔錯，巴東牛肉都幾抵食，海南雞飯就一般，河粉就略為細份左D 😅

 

Arcadia

相約好友去銅鑼灣食飯，因為之前喺網上見到有間餐廳，好吸引，所以嚟試吓，餐廳有兩層，一層係室內，上多一層喺天台，即係露天座位，我哋訂咗室內位，去到嘅時候帶咗我上天台，天氣實在太熱，一行出去已經覺得熱辣辣，即刻話返俾佢聽我哋係訂室內，所以再落返去坐，呢度嘅佈置都好打卡able，而且呢度嘅cocktail 都有D特色，我哋叫咗一個叫一千零一夜嘅飲品，佢係一個好似神燈咁嘅壼，裝住D清酒，下面墊咗塊好似棉花咁嘅嘢，店員會用火機點着佢，就做到一個閃令令嘅效果，直至火光熄滅，再倒D酒出嚟飲！😎

食物方面我哋叫咗個套餐，前菜有魚子醬竹炭甜筒，個魚子醬冇乜味😅 仲有三揀二前菜：芝麻吞拿魚塊佯芒果莎莎醬、薄切紅菜頭配水牛芝士及烤合桃肉、鵝肝配果醬、沙律，因為我哋四個人，可以揀晒四款😄 主菜我哋揀咗煎鱸魚、脆皮豬手、兩份牛柳，食物嘅質素都唔錯，當然佢個價錢都唔係平，食完嘢就上返去天台影相，影咗一陣就走，因為真係好熱，呢幾日嘅天氣係熱到不得了！食完飯好有車我哋返過九龍，然後約好過兩日再一齊返大陸 😂