申子居酒屋（旺角）

今晚同好友 S 補食生日飯，雖然都過咗成三個禮拜，約咗去旺角呢間居酒屋食飯，好彩訂咗枱，如果唔係就冇位！前兩日好友嘅兒子去世，我哋呢兩個auntie，都好唔開心，所以呢餐飯都食得有點淡淡然 😔😔

我哋叫咗個海膽炒飯、幾款串燒、牡丹蝦刺身、水母刺身、炒雜菇等等，第一次食水母刺身，口感比較爽同埋有少少靭，牡丹蝦都好新鮮，其他食物都做得唔錯 ！

 

別了🥺小朋友👦🏻

 

十日前別了一個老朋友，今日又收到好友的兒子晞晞👦🏻離世的消息🥺，非常令人心痛😭，小朋友患了神經母細胞瘤，接受治療已經有一年半，做咗一年治療之後已經復發！九月嗰陣時見過佢，仍然好活潑，當然瘦咗好多，同埋甩咗頭髮，當其時都好樂觀，上個月知道佢病情惡化左，甚至腦出血，要留在醫院，已經知道情况唔理想，估唔到突然間就走咗，擔心好友的情況❤️，他的丈夫相對較堅強，希望兩人能夠過渡到呢個傷心嘅時候🥺🥺🥺

The Blind Pig

好友和他女友都係12月生日，咁就一齊食飯！

去咗尖沙咀食西餐！每次去諾士佛台，都經過呢間餐廳，因為係第一個鋪位！睇吓個餐牌，都好多肉類，同埋炸嘢，完全唔係我口味，不過一餐半餐食都無所謂，我哋叫咗Cocktail 飲，不過壽星女話想飲紅酒🍷，所以開咗一支 Shiraz ，味道都可以！

食物方面叫左雞翼配 Buffalo sauce、炸洋蔥圈🧅、豬肉條、炸魷魚鬚呢D小食，主菜有燒豬手、慢煮牛肋肉🥩、鱸魚、芝士雞扒，全部都係炸炸炸、肉肉肉！🥲味道唔錯，係 heavy 左D！

蒸蒸日上

都差唔多兩年冇同呢班舊同事聚會，上次係疫情剛開始的時候，係去年二月至今，都22個月冇聚會，原本係每年聖誕，去年剛開始左冇夜市堂食，所以一直冇出嚟！今次一叫即到！去左呢間上樓私房菜，地方細細，只有一間房同三張檯，主打蒸海鮮！

今晚有蜆、龍蝦、蝦、鮑魚、東風螺、龍躉、蟹、牛肉片、蒸雞，仲有粥底，好新鮮、好好味😋 仲可以自己帶酒嚟飲，我地帶左一支白酒、1.8litre 清酒🍶，同一支梅酒，全部清曬！👍🏻 

今晚有交換禮物🎁環節，我就收到一支梅酒 ☺️

 

奇幻魔法屋 Enchanto

 

Madrigal 家族，多年來家中的人都有自己的魔法，但去到 Mirabel 的時候，她卻沒有任何魔法！令家人非常失望，連最年小的表弟 Antonio 都有魔法了，令 Mirabel 更難過，她發現她們住的魔法屋竟然出現裂痕，更發現了失蹤多年的舅父………！

故事發展都係意料之內，套戲畫面好色彩繽紛，不過D歌冇邊首係特別好聽，劇情有小小悶！見有D人睇手機，D小朋友仲傾計！

A Disney Christmas

之前同好友參加抽獎，有機會去迪士尼聽音樂會，可惜抽唔中，之後忘記左音樂會係今日，我又預約左今日，所以入到去係超級多人！加上係會員購物日！銀卡會員最後今日！D shop 多人到不得了 🤦🏻‍♀️ 原本想散吓心，依家要同人迫 ！

既然入到黎，都玩一玩機動遊戲，玩咗Iron Man 同埋4D！然後買少少野就走，都忘記咗有音樂會！冇留低睇埋就走左！不過睇返D人留言，都話安排唔好，無睇都未必唔係好事🤦🏻‍♀️

 

Gucci 名門望族 House of Gucci

Patrizia 父親是經營運輸的，在一個 party 中認識了 Maurizio Gucci，是 Gucci 家族兄弟兩個獨子之一，Patrizia 主動約會他，兩人很快便走在一起，但 Patrizia 的身世不被接納，以至兩人結婚時，男家都沒有人出席，Maurizio 更要投靠外父，後來 Maurizio 父親病重，才無奈叫兒子回家，家族生意由 Maurizio 及叔父、表哥一同經營，但表哥不善經營，被Patrizia 乘虛而入，更連累父親入獄⋯⋯！

成套戲都cast 一D都唔弱，不過劇情就麻麻地，加上套戲好長，中間都有D悶，難怪口卑唔太好！

日本清酒藏所

尋日心情有點沉重，今日收拾心情出去食 lunch ，呢間食店經過好多次，今日終於去試，入到去見只有三枱客，除咗我地，其餘兩檯差唔多要走，走左之後，得我地一枱，可以慢慢坐，我地叫左兩個人lunch ，一個銀雪魚西京燒，同埋鰻魚飯，今日大家都想食魚，食物質素唔錯👍🏻，最重要冇乜人，又可以坐得耐！

 

別了老朋友

今日收到一位老朋友入院消息，知道他已到咗彌留階段，去醫院見見最後一面，早幾個月得知對方患胃癌消息，初時還頗樂觀，手術後仍能正常生活，但擴散至肝臟後病情急轉直下，呢兩日惡化得好快，昨晚入院，今日已經通知短時間內會心跳停頓，感覺在等待死亡😔😔

大家都冇乜野可以做，見佢仍有反應，而且可以回應，估計仍能維持多幾日，離開醫院後，在附近吃了碗麵就走！

至零晨兩點幾，醫院通知他已經離世，因為是零晨，只有他的兄長和兒子到醫院送別他，其他人都沒有去，始終有心理準備，而且已經離世，有至親陪伴已經足夠！

雖然已經沒有聯絡好幾年，但他的離去，令人不勝唏噓！始終相識多年，大家同齡，感覺生命無常，彌留之際的他，讓我彷彿看見自己的將來！他日我也一樣嗎？彌留之際，樣子完全認不到，成個人只剩皮包骨，像個老人，將來如果我變成這樣，都不希望愛我的人看到我這樣離開……😔