迪欣湖

一年前相約好友今天去海洋公園，可惜疫情仍然嚴峻，連海洋公園都冇開，去唔成海洋公園，都係想去郊外活動下，於是決定去迪欣湖，其實我從來都未去過迪欣湖，我哋相約去青衣等，我哋去超市買咗D零食同埋飲品，又去買咗一桶炸雞過去食，搭地鐵去到欣澳站落車，因為我一直以為迪欣湖就在欣澳站，原來搞錯咗，應該要去迪士尼站，唯有入返閘搭車過去，因為迪士尼樂園冇開，所以迪士尼線20分鐘先有一班車，我地等左一陣就有車，搭車嘅人又唔係想像中咁少，證明都有了人要去迪欣湖，落咗車之後在迪士尼樂園入口果邊影咗一陣間相，因為未見過沒有人的迪士尼樂園入口！

我哋影完相沿住指示行去迪欣湖，行咗大約10分鐘就去到，今日都唔算好多人，我哋一行到湖邊就搵個地方坐低，好友帶咗兩張坐墊，我哋就坐低開餐食嘢，唔係好夠食，因為買果陣時唔係好肚餓，行到過嚟又覺得肚餓，所以唔夠食，今日天色唔係太好，不過冇落雨，好耐都冇試過喺郊外 picnic ，本來今日想帶相機，但係今朝發現個電池壞咗！我地傾偈講開，今晚去邊度食飯，最後決定去好友荃灣嘅屋企，見到時間都唔早啦，又要去買餸，所以就起程離開！回程在迪士尼站上車，好多人！似係一D在迪士尼做維修工程之類的人，可能因為20分鐘一班車，所以成架車都滿晒人，同頭先迪士尼入口一個人都冇，反差好大！

泰．夯蝦

訂咗兩次位共至訂到呢間餐廳，瞓咗三個時段食，我哋訂咗7:15 ，去到要等入坐，不過佢地安排座位有D混亂，冇根據訂枱預先編排好座位，係見到有枱就俾人，所以好亂，呢間主要係食流水蝦，不過呢度就做唔到流水嘅效果，只係有一D水缸養咗D蝦，自己用箝捉蝦，然後放落個小冰筒度冰鎮佢，然後自己燒烤，除咗流水客，佢仲有一D蜆、花甲、扇貝之類海鮮，亦都有串燒同埋牛扒，亦都有D熟食、小食，每枱都有一份刺身同埋和牛，不過D和牛就麻麻哋，冇乜牛味！我地主要都係食蝦，除咗原隻燒，我地仲嘗試開邊燒，效果都唔錯！佢呢度有D大隻D嘅大頭蝦，要另外比$20一隻，不過睇過同我地食緊果D只係大少少，唔係咁抵食！

食完飯我哋出去行吓，去咗donki，見到有海膽，所以就買咗一Pack 嚟食，又買左D零食，跟住就搭車返去喇！

大門橫丁

睇完戲去食飯，去咗呢間食日本嘢嘅餐廳，好多年前食過一次，已經冇印象佢係食乜嘢，今日睇吓個餐牌見到佢主要係食烏冬，同埋一D串燒，試咗幾款串燒同埋烏冬，味道都唔錯，價錢都算實惠！

極地守護犬 The Call of The Wild

Bucks 是小鎮上一個法官的家犬，一直生活無憂，由於北部雪山有很多尋金客，對犬隻需求很大，Bucks 因為體型較大，被賣狗的人看上，Bucks 被誘騙上了貨車，被售賣到北部拉雪車，後來輾轉被 John 收留.......！

一開場就見到隻狗係 CG 特效，全程由眼神交戲，如果真狗係做唔到，中間有D遠鏡頭可能係真狗都唔定，因為有時隻狗體型會細隻咗，成套戲主要係講 Bucks 嘅遭遇， Harrison Ford 戲份集中在最後果半小時，如果鍾意狗嘅人，都會鍾意睇呢套戲。

大和堂

尋日放假去咗剪頭髮，夜晚係屋企執野，D時間好似唔夠用，今日想早D起身，但係都係遲咗，因為夜晚執完野好精神，所以唔係好瞓得着！落去九龍城食個早餐先，去咗呢一間咖啡店，聽個名好中式好古老嘅店名咁，原因係呢間店以前係藥材舖，佢沿用返藥材舖嘅舊裝修同埋店名，應該都開咗一段時間，我記得之前行過見到好多人等位所以冇試到，今日去到見到佢都滿座，都要等一等位，等左幾分鐘已經有位，入座之前都要量一量體溫，店入面有百子櫃，有中式牌匾，有古老嘅鐵閘，行出去仲有一D室內嘅位，呢度除咗咖啡之外，食物嘅選擇亦都唔少，有All day breakfast 、意粉、甜品等等，我就叫咗班尼迪蛋，加埋煙三文魚，咖啡我哋就叫咗一杯玫瑰 latte 同埋一杯 cappuccino ，見到佢有D特製嘅咖啡，隔離枱叫咗杯冰滴咖啡，見佢用 sake 樽裝住，另外有個 sake 杯，無糖無奶，真係要飲咖啡原味，我就未至於有咁高要求，不過我覺得杯玫瑰 latte 唔算好特別，同其他咖啡店一樣都係偏甜，蓋過左咖啡原味，個班尼迪蛋都唔錯，係個麵包有D硬，見呢度D人快食快走，都唔係飲咖啡應有嘅慢慢嘆態度，所以就算等位都唔駛等好耐！

Wildfire

食完火鍋，好友K同埋J話想去飲嘢，行咗去諾士佛台，見到呢度嘅酒吧，仍然係人頭湧湧，不過網入去店裏面，其實係冇乜人，因為個個都唔想坐室內，坐晒出面，因為空氣流通，當然有啲人係因為要食煙，不過都唔算多，我哋四個人，有三個叫同一款飲品 Pink Rosé ，另一個叫左 Mango smoothie ，好又話佢個杯 Mango Smoothie 好飲，我哋果杯 Pink Rosé 就好似沙冰一樣，而且冇乜酒味 ! 大家都喺度講，希望疫情快D過，因為個個都好想去旅行，又提返我哋之前講，話年尾想一齊去旅行，唔知可唔可以成事呢？

616 麥子

原本相約好友今晚去食流水蝦，但係竟然 full Booking，於是改去食壽司郎，點知壽司郎爆曬場，仲要冇得攞飛，明明話市道好差，又唔係星期五晚，點解周圍都爆場？最後改咗去食火鍋！好友之中 F 話要考慮，因為驚火鍋聚餐會出事，但係好友 K 好想食火鍋，所以最後都係去咗打邊爐！ 616呢個集團，我都食過好多次，尖沙咀呢間第一次去，可能因為傳聞火鍋好容易出事，所以店內唔係好多人，而且佢有室外露天位，咁就更加好啦，雖然坐露天位有少少凍，不過起碼空氣流通！同呢一班朋友對上一次食飯已經係超過兩星期，感覺大家同一班人相隔兩星期先好再聚餐！

呢度會先俾一個蜆鍋你食咗先，食完蜆先至會加湯做火鍋，D蜆都好新鮮，鮮甜！我哋叫咗好多唔同嘅牛肉，仲有水餃、菇、菜等等嘅配料，呢度亦都有串燒食，我哋叫咗雞泡魚乾、燒牛舌、牛柳粒，食物嘅質素都保持到水準，不過唔知點解冇優惠，好又話上次你有做優惠，今次就冇🤔