勝面

下雨天，去朗豪坊行下，呢期做 Line promotion ，不過今日未開放比公眾，只係俾傳媒影相，所以只係在外圍影下，而且 Line 亦都唔係我杯茶！

行上去11樓，有一間新開嘅台灣牛肉麵店，店子地方不大，大概有30個位，下午時間冇乜客，只有兩、三枱，叫咗佢地招牌嘅招牌麻辣牛三寶湯麵，本身佢地應該有台灣直送嘅關廟麵，但係今日話冇關廟麵，只有新竹米粉同埋刀削麵，所以揀咗刀削麵，牛三寶係有牛頸脊肉、牛面頰肉、牛𦟌、鴨血同埋豆腐，辣度方面有三個選擇，我揀咗中辣，另外再叫咗一個涼拌手撕無骨鹽水雞，飲品方面佢呢度有個比較出名嘅黑糖波波奶茶，但係我本身對奶茶冇乜喜好，所以揀咗杯蜜桃烏龍，個麵嘅辣度都好足，我諗大辣都可以食到，不過唔係想像中果種麻辣嘅味道，麻味不足，麵嘅份量都算幾少，個碗就好大，鹽水雞就幾好味，份量亦都比想像多，個就稍為失色，仲要等左好耐先到，茶入面有個茶包，茶葉嘅份量都算多，蜜桃亦都有少少果肉，不過味道好人造，整體來講不過不失，因為價錢都好相宜！

食完麵繼續行咗一陣，行過 iCremeria 見到有菠蘿椰子雪糕，好似好吸引，跟住又見到有個蜜桃芭菲，好似仲正，所以叫咗一個食，我覺得雪糕嘅味道偏甜咗D，不過都好滑，蜜桃好甜，不過果肉瘀左少少！

深圳 - 汕頭八合里海記牛肉店 (南湖店)

已經好多年冇去過大陸，上個月攞咗張回鄉卡，終於今日上去，約埋幾個好朋友夜晚上去食飯，我地先在沙田集合，然後一齊搭火車上羅湖，其實我地幾個都係冇乜經驗去深圳，純粹係朋友介紹去搵食，由火車站出嚟，街上面冇乜街燈，所以都比較暗，車站出邊嘅廣場望到羅湖商業城，前面有一間香格里拉酒店，我哋向住酒店果邊行過去，一路直行，行咗差不多半個鐘頭，去到一個叫做金光華廣場嘅地方，果度有間喜茶，諗住食完飯過去呢邊行吓，大家都好肚餓，所以要搵咗嘢食先！

去到呢間火鍋店，其實唔係好爆，不過冇大枱，所以要等位，好彩只係等左10分鐘左右就有枱，望一望個餐牌，價錢好平，牛肉大概係$28人仔一碟，最貴果碟都係$32，我地唔知叫邊款牛肉好，所以一次過由第一款叫到第十款，另外只係叫咗碟菜同埋響鈴，我哋自己帶咗兩支紅酒上嚟，另外又叫咗啤酒同埋一支果醋，好友話大陸人好鍾意飲呢隻天地壹號蘋果醋飲料，佢甜甜地唔會酸，都幾好飲，而且係冇酒精嘅！我哋每碟牛肉都係淥半碟，睇吓邊碟好食就再encore，起碼有個樣俾個店員睇到先！

食完一 round 諗住再叫嘅時候，其實個侍應都認唔到係乜嘢肉，只係大概知道係其中幾碟，所以我哋照order左六、七碟，食咗兩個幾鐘都成11點先走，行返去金光華廣場，喜茶已經關左門，唯有返去火車站，今次我地唔行路去火車站，因為行太遠喇，但係的士只可以坐四個人，我哋就分咗兩架車搭的士過去，搭車就非常近，行路就行好遠，去到火車站會合一齊之後，就搭返火車過關，今次食得好開心，因為價錢好平，食物質素亦都好好，最重要係同好朋友一齊開心食飯！好友笑我好似大鄉里第一次返大陸咁，過關嗰陣仲偷影我背脊，佢地好搞笑！即晚已經約定下次放假早D上嚟玩返一日，好期待呢！希望有機會上去放飛機啦！

栢檔極品海南雞飯

最近經常去油塘，在大本型商場內，食店選擇不多，試左呢間小店，呢度主要做外賣，雖然有4個位，餐具全部係用即棄餐具，所以唔太環保！

呢度除左海南雞，仲有肉骨茶！仲有元蹄同肉餅，試左肉骨茶，好耐冇食過，同記憶中的味道不同，中藥味比較淡，肉的份量算多，海南雞就不過不失，味道都 ok ，而煎肉餅就麻麻地，佢係豬肉加魚肉做的，而且魚肉份量較多，所以冇咁香，不過呢度價錢平，四十幾元一個飯，都算係咁 !

半島冰室

在炮台山一帶都有好多食店，之前見到呢間冰室經常都大排長龍，今日就去試吓佢，雖然要等位，但係其實好快，因為D人都係快食快走，因為都坐得比夠逼，都唔適合坐低慢慢傾計果種，所以客流量都非常大，餐牌睇落同一般茶餐廳差不多，價錢亦都好實惠，非常貼地街坊價，叫咗佢哋最出名嘅潤牛麵，同埋芝士豬扒包，佢仲有黑松露炒蛋多士都係名物，都係想試嘅，不過食唔到咁多野，下次先再試！豬扒包味道唔錯，芝士配麵包都唔會差得去邊，麵包又軟冧所以好食，個豬扒就麻麻哋，唔係咁入味，人潤牛麵就幾好食，豬潤啱啱好熟，牛肉就一般啦，麵就係大光麵，我都好少食茶餐廳嘅麵，不過為咗食佢破例一次啦，食物質素同價錢來講，都算係物超所值，因為價錢真係好平！食物都比一般茶餐廳好食！

叁拾壹堂

早前在網上見到呢間小店嘅介紹，一直都想去試，到今日先至得閒去試，小店嘅位置有點隔涉，不過都唔難搵，加上之前屋企裝修果陣住過附近，對呢邊都熟悉，小店在一條倔頭路，呢度附近多數都係五金店或者車房之類，只有呢一間食店，小店面積好細，剛好門口冇泊車就可以影到門口嘅正面，入面只有四個座位，只有我一個客，可以話包場！呢度係開放式廚房，所以都幾熱，門外都可以有個位置企到兩個人，我諗呢度主要都係做外賣，因為餐具全部都係即棄，餐牌好簡單，只有早餐同埋三文治/吐司，原本想食個全日早餐，但係我唔識腸仔同埋煙肉，個早餐就會得返雞扒、蛋、多士，所以都係改咗食雞扒蛋三文治，叫咗套餐，有埋薯條同飲品，叫咗杯熱咖啡，其實應該飲凍嘅，因為呢度比較熱，不過都係覺得熱嘅咖啡先好飲！店子細細，裝修有點台灣文青 feel，店主應該係一對年輕夫婦，食物係即叫即做，簡簡單單嘅住家口味，味道唔錯，下次帶埋朋友黎試吓先，走嘅時候見到有人特地揸車過嚟食野，應該口碑都唔錯！

食完野過去尖沙咀，上次過去影 Toy story 4，今次已經開放比公眾影相，所以又再去影過，今次影埋停車場樓上嘅裝飾，其實碼頭果邊可以俾錢玩遊戲，不過好多小朋友，所以冇去玩，只係在商場入面嘅迪士尼counter度買咗件甜品食！