雞功房

之前睇雜誌介紹過呢間食店，話之前賣蟹，叫蟹功房，依家賣雞，所以改左做雞功房！

要上大廈二樓，店子很細，大約廿多個坐位，茶餐廳格局，過左 lunch time ，D人開始走，一入去，店員話剩返一份海南雞，所以叫佢留左先，原本想食頭抽醬油雞，但係賣晒！黃酒雞都賣，最後一份海南雞比我留埋，見到有人入來見冇晒雞就走，其實佢開到五點，六點又晚市，唔知點解唔整多D？

除咗海南雞，店員話仲有醉雞翼，我哋叫咗一客醉雞翼小食，另外叫咗蟹肉伊麵，因為呢間之前係賣蟹的，應該D蟹唔會差掛！海南雞跟咗一碗湯同埋油飯，個湯入口好大陣藥材味，但係入口唔會苦澀，仲有D酒香，幾好飲，海南雞冇預期咁好，雖然份量都唔算少，而且都頗多肉，只係唔夠滑，個油飯唔會好油膩，都幾啱食，而個蟹肉伊麵，蟹肉係好細粒的，味道還可以！醉雞翼略嫌唔夠酒味，整體來講都算係物有所值！

Coffee Central by Coffee Exchange

最近中環剛開始入伙的華懋廣場，開了家護膚品店，地庫有coffee shop，今日同老細去試下！

店內地方頗大，大約有60個位，我地四點幾去，得幾個客，望下有乜野飲，英文餐牌，有D名似係韓國拼音，又冇中文，唔知係乜，老細叫左Mocha，我見有一系列叫 Snow 的飲品，應該係水果 smoothie ，叫了蘋果芒果，老細話唔好飲，佢話冇咖啡味，得朱古力味！我果杯就似奶昔，都係麻麻地！

味一番

老細升職請食飯，一行17人，冒著大雨出去尖沙咀，一於撘的士！竟然無塞車！我地訂左七點，六點已經到左，呢間店因為唔大，佢地將D枱拍埋一齊，已經佔左大半個場，剩返三張4人枱同bar 枱，我地一張長枱，呢種格局唔係咁傾到計，佢呢度冇圓枱，都冇辦法！

我地仲有幾個未到，所以食住小食等，小食有枝豆、雞泡魚乾同埋炸雞軟骨，呢度之前來過一次，食物質素好，所以今次再來，坐至七點幾先齊人，一到齊即刻叫酒飲，叫左支獺祭純米大吟釀五十，1.8公升，店員倒落細樽比我地，呢隻酒易入口，幾好飲，餐廳做緊 promotion ，order 獺祭酒，生蠔可以有半價優惠，我地叫15隻，有兩個唔食，點知得8隻！咁唯有叫佢將D蠔一開二，原來D蠔都幾大隻！好肥美好新鮮，每人半隻都夠喇！

再嚟刺身盛，呢盤剌身好肥厚，而且好新鮮！真係好正！牡丹蝦個頭再攞去炸，送酒一流！食完刺身食壽司，壽司有鰻魚同埋大蝦天婦羅反卷，其他熱葷仲有炸豆腐、鹽燒牛舌、黑豚肉露荀、大蔥雞肉、燒東菇、牛肋骨同埋餃子！好多野食，食到好飽！我地都飲左兩支獺祭，再加一支黑牛純米酒，呢支比較辛口，有幾個話飲唔到！都係大吟釀好飲D！甜品係雪糕，好味！唔記得影相！成晚飲飲食食，傾計，好開心！

飯局主場 - 第十回

又在家中開餐！又係兩個人食，人小小，三個餸，簡單D，又用盡個蒸爐，買左半隻雞，一條石斑同埋通菜，蒸爐就蒸飯、蒸雞同埋蒸魚，蒸完魚灒熟油，整埋葱油淋雞，炒埋腐乳通菜，攪掂！食完飯唔少得水果，買左台灣巨峰提子同埋西瓜，正呀！

猿人爭霸戰猩凶巨戰 War for planet of the Apes

15年前，猿流感令很多人類死亡，美軍圍剿猿人的基地，以圖擊倒以 Caesar 為首的猿人，幸好他們成功反擊，雖然他們捉到了美軍人質，但 Caesar 最終決定釋放人質來表達和平，可惜美軍上校對 Caesar 鍥而不捨，在猿人 Winter 背叛之後，上校漏夜偷襲，殺死了的Caesar 妻兒，Caesar 誓要找到上校報復。在猿人遷居的時候，作為領導的Caesar 卻沒有跟他們一起去，而選擇尋找上校，路途上，Caesar 與幾個戰友遇到一個患病的女孩，由於照顧他的人已被殺死，因為不願意獨留這個女孩，所以帶着她上路，在找到上校的同時，發現他們族的猿人，原來已被上校囚禁，在拯救他們時自己亦被上校捉到......!

套戲有D悶，有D場口好靜，好多對白都在 Caesar 和上校，因其他猿人不會說話，而且節奏拖得頗慢，就快到結尾仍未有甚麼突破，感覺拖了很久仍未完，中間見到有啲觀眾睇手機，雖然套戲有D悶，始終睇手機都影響到其他人，唔明點解D人要頻頻睇手機訊息，要睇訊息就應該出去睇，睇戲就應該專心睇戲！

蜘蛛俠強勢回歸 Spiderman Home coming

八年前，史達大廈經過一輪大戰，變得一片頹垣敗瓦，Adrian 和他的工友負責清理現場，她為了接這個job，還買了一架車，全副身家投入去做呢一份工作，可惜這工程卻忽現由政府部門接管，佢因此而失去你一份工作，正當他諗緊有乜嘢辦法不錢的時候，卻發現他的車上遺留了一些太空廢物，他以此研發一些高科技武器，藉着售賣這些高科技武器搵錢，八年後的今天，Peter 協助過復仇者聯盟，後來 Ironman Tony 安排他在公司參加實習計劃，不過Peter被投閑置散兩個月，他按奈不住想幫人的慾望，於是他四處協助附近的居民，他一直希望有大事件，可以讓他出動協助Tony，他無意中發現了 Adrian 的武器買賣，他決定調查呢件事，過程中他闖了不少禍，始終是一個15歲的少年，思想還未成熟，正如Tony話，如果佢只係依靠蜘蛛俠身上的裝備，就唔能夠真正成為英雄......!

套戲都幾好睇，不過蜘蛛俠在戲中仍然好孩子氣，相信之後還會有第二集第三集，應該係講佢慢慢成長吧，套戲係睇3D版本，因為有立體感，所以睇佢在尖塔頂果場戲，都幾驚！

蕎道樂

日日都落雨，都冇幾多日好天過，去銅鑼灣食個lunch先！去咗呢間日式餐廳，印象中以前係拉麵店，因為曾經去過呢個地方，店內地方唔係好大，剛剛過咗午飯時間，店內只有兩三個人，我地坐低之後，店員就俾個午餐的餐牌我地，要問佢另外攞煮餐牌佢先至俾我地，見到有個二人餐，有壽司有刺身，就叫一個試下，叫完嘢食，先來兩杯香檳，店員話係送的，佢有少少梨的味道，最重要係夠凍，先來個前菜，係沙律汁伴魚生粒，頭盤揀咗黑松露帶子沙律，刺身拼盤就有帶子、甜蝦、油金魚、三文魚，魚生肉都好肥美，一品料理就有鵝肝多士，鵝肝唔算話好靚，剪得唔夠脆皮，不過都OK，另外仲有蘆筍牛肉卷，壽司就有四款，有左口魚裙邊、花之戀三文魚卷、池魚同埋吞拿魚卷，最後仲有一個煮物，就係鮑魚海鮮鍋，食咗咁多生冷野，終於有D熱野食下，鮑魚嘅質素就麻麻地，原本想叫支梅酒飲，但係原來好大支，所以都冇飲到！整體食物一般啦！始終＄398有魚生有刺身有鮑魚有香檳，呢個價錢又點會有好靚嘅野食呢？以價錢計，都算物有所值！