十二月先去完東京，相隔兩個月，再去！原本諗住去廣島或者九州，但係見到東京迪士尼做 Duffy 主題火車，而且未試過二月份去，所以決定去一轉！今次安排得頗急，三星期前才訂package ，基本上 package 和上次一樣，坐ANA，住 Sun member hotel，同樣係早機去，黃昏機返。
同以往一樣，去黃大仙撘機場巴士，依家可以 check 到站時間，方便好多，因為有E線同A線分別，呢到有E22同A29都可以去機場，E22班次較密，價錢$18，但係多站停，由黃大仙去青嶼幹線收費站要停7個站，然後去左東涌先去國泰城，先至去機場，而A29就停4個站到青嶼幹線收費站，然後直接去機埸，相差十多個站，但係價錢貴一倍$39，而且半小時一班，miss 左就要等半個鐘！依家有得 check 到站時間就方便得多，去城巴 web site : eta.citybus.com.hk 睇睇，可以因應到站時間出門口，我6:58去到巴士站，到站時間7:03:23，見到有E22都唔上，因為等5分鐘，車程快大約半個鐘，我等到7:03未見有車，可能大家個錶有小小時差，7:04就有車喇，算好準時！去到機場 7:36，再去揾旅行社職員攞機票，旅行社話7:45，不過已經有職員等緊，攞完電子機票就check in，然後過關食早餐，今次食正斗，見佢有點心食，所以食呢間，叫左粥套餐，揀左魚片粥配蝦餃，跟埋叉燒酥，點心唔係好夠熱，就冇咁好味！食完行左一陣就去24號閘口等，十點起飛，9:30開始登機，時間過得好快，影左幾張相就夠鐘，上左機好快瞓着左，瞓一陣就派nuts，跟住派餐，食完野仲有兩個鐘，睇吓戲，揀左舊戲，穿 Prada的惡魔，睇完差不多到！
到埗後，過海關都幾多人，例牌行李等人，一出去就可以攞行李，今次個關員要 check 我行李，平時都唔會check！
今日同上次一樣先去酒々井 outlet，原本想 book 左去新宿巴士，又驚買野買遲左，都後去完 outlet先，去到30號 shuttle bus 巴士站，剛走了15:48那一班車，下一班16:15 要等27分鐘，趁等車時set 部電話，先可以同香港朋友保持聯絡！架 shuttle bus 遲左到站，所以等多幾分鐘，行車時間18分鐘，架車直接去outlet，回程就先停 Terminal 2，然後先返 Terminal 1，去到outlet 天仍未黒，先睇回程車時間表，可以預時間搭車！今日星期日，比上次多左好多人，上次閒日靜好多，先去Wedgewood 睇睇D餐具，好靚，比想像中平，買左兩隻碟，然後去 St. Cousair 買左兩包餅，再去Le Creuset，D色唔多靚，比較鐘情啞黑色，買左個27cm 淺身Oval 鍋，同一個煎 pan，好重呢！跟住去退稅，職員都係國語對答，見到D大陸人退稅係十幾張單，其他人都係兩三張單，難怪全世界D旅遊區都請D講國語職員，退稅都好快手，出示單同貨物，好快計返錢比你，做完退稅仲有半小時才有車，去左 food court 食野，食左碟意粉，呢度有免費水供應，雖然係水喉水（我估），不過呢度D水喉水可以直接飲用，啱我呢D唔飲甜野的人！
食完野慢慢行去車站，坐18:37車，返到丅1已經19:03，因為在T2多人落車落行李，其實可以在 T2 坐巴士返酒店，我一時諗唔起，去到T1先諗起，唯有在T1落車，下一班巴士返酒店要19:25，又係等，19:18先行出去車站，成個站得我一個人！架車由T2開過來，所以車上有客，去酒店要一個多小時，當然又睡覺了，返到酒店21:00了，匆匆check in ，今次比左 semi double 房我，雖然叫做雙人房，但係空間同單人房一樣少，只係張床大D！
放低左行李就出去食野，近近地過隔離華盛頓酒店食，去左釣船茶屋，呢間一直想試，今次就試試佢，店內設計成一隻船，船周圍係魚池，人客可以釣魚，好似係唔使錢，只係比魚餌同埋釣到之後處理食物費用！見大約15分鐘左就有人釣到魚，每次有人釣到，店員都會打鼓歡呼，氣氛頗熱鬧，我冇玩，只係叫左刺身食，食完就返酒店，休息休息！
