和幸

尋日同Edmond,Eva, 康仔,阿傑佢地出來食飯,去左銅鑼灣果間和幸食烤肉,等緊佢地既時侯遇見Ken,我知佢約左Alan佢地食泰國菜同佢farewell,我唔join佢地,因為約左Edmond,既然遇見就一齊影相留念啦!

上到去和幸見唔多人,店內格局都好日本漁港feel,不過佢主打係和牛同豚肉,我覺得個店名好熟,唔記得幾時聽過......佢地就來過幾次,所以全程佢地叫野食,不過都係唔同部位既牛肉,我最喜歡係牛舌條同和牛,好稔好味,白豚肉包着車厘茄都唔錯,雞翼就好淡,無醃過咁,無乜味,雖然主要食肉類,但係樣樣都好細片,都唔算太飽,食完肉叫左個焗露筍同甜品,d甜品都唔錯,我地叫左cheese cake,芝士年糕,兩樣都要燒一燒先食,幾好味喎!燒完個面脆脆地,好得意,另外兩個奶凍都好滑好味道!下次同Flora去試吓先!

我今日終於諗起喺邊度見過和幸個名,就係Sogo門口個牛排人呀!

恭賀新禧

祝各位身體健康,心想事成,新一年相信會面對更大挑戰,希望大家能安然渡過!

Lion dance

尋日去左朗豪坊食飯,商場好多人,依家show左d唔同色既醒獅,好少見有粉紅色,仲有大風車,同埋2個好似車公廟個風車,比人'轉"吓運,我地都影左d相,個Security好主動幫我地影相,又叫我地企唔到既位影相,仲要幫我地決定埋用唔用閃燈tim!

今次食飯係同嘉嘉補祝生日,我地去左上上食,因為嘉嘉唔舒服,我地叫d清淡d既菜,有白肉粉皮,小籠包,清炒蝦仁,咸肉津白同少辣既擔擔麵,仲有甜品南瓜餅!!我地不停咁傾計,講吓工作上既野,傾到人地差不多關門,嘉嘉已經一面疲態,我地走時,送左佢一段路先走,嘉嘉走左之後,我地行去銀行中心等車,一路傾,我唔記得話比佢聽,最近我知道左一件幾年前發生响我地身上既事,幕後黑手係邊個,真相令人相當失望........anyway, 我嬲左一陣就算,始終件事過左咁耐,forget it !

曲奇四重奏 Cookies Quartet

都有一段時間無去過九龍城,今日一心去餅,順道去左九龍城廣場行一行,個商場近期裝修過,不過都無乜好行,由商場出去就係福佬村道,我以為德昌魚旦執左,原來仲响度,依然係好多人,行過d就見到曲奇四重奏了,此店由4個名人合辨,當中有Tony Wong最令我對這店感興趣,因他是著名五星級餅師,近日都有報紙雜誌介紹過,我個人對曲奇興趣不大,但不知怎的,我對那蝴蝶酥很有興趣,所以特地去買來試.

這店細細地,並不像一般的餅店,佈置很簡單,由於他們只賣2款盒裝餅,所以只放兩盒餅在一張小圓枱上,和一張幼身高枱,上面放了多個高身玻璃瓶,放了各款曲奇供試食,此外就只有一張收銀枱,後面用布簾掩着的大概是餅房吧!我拿起木夾,打開玻璃瓶蓋,夾了蝴蝶酥和疍香曲奇試食,那曲奇仍不能挑起我的興趣,我走到收銀處買,那女人說要等10分鐘,我便到外面走走,我去左公和食豆腐花,食完15分鐘後過去,有幾個人在排隊付款,我見多數都買曲奇餅,到我時那女人仍叫我等,這時旁邊的謝寧將留給客的一盒蝴蝶酥先讓了給我,可能她見我來了2次吧!反正留餅的人還未來,我見門外貼了告示,話新年預訂已經滿額,不再接受預訂!我在短短15分鐘來回2次,都見幾多人來買,有些停車在門外買完便開車走!大概這也是選址原因之一吧!

回到家裏,打開來試,一打開蓋,香味撲面而來,好香,盒內有一張圖片是他們的assorted cookies的樣子,寫着"Eating is an art of life",盒內的蝴蝶酥有250g細細地,應該有廿多塊,入口香脆,不太甜,好好味,我會再去買些來送比人!

Australia 澳大利亞

看這電影要接近三小時,睇的時侯不覺得套戲有咁長,不過中途好多人出出入入去廁所!講返套戲,背景係1939年,講Nicole 由英國去澳洲揾佢老公,去到時佢老公死左,佢接手老公個牛場,同當地有勢力人仕爭取賣牛比軍隊,中間得到Hugh呢個趕牛男協助,同埋土著小童一起,她更視這小孩如己出,最後趕及簽約前把1500隻牛趕到碼頭,有一場戲係d牛比敵人放火嚇走,一路向住懸崖跑,佢地要追前欄截d牛,好緊張,其中一人比牛踩死好慘!有好幾場戲都好感動,最surprise見到元華,佢演Nicole屋企其中一個工人,都唔少對白,好多時仲講廣東話,d英文講得好攪笑,唔知係咪刻意咁講唔正呢?

Mochicream

今日去左銅鑼灣,又係半年一度既Wacoal大減價,收獲都唔錯,我見有d款前兩次減價到今次都仲响度,而上一季既款都有,比較少選擇,其實得一兩款比較新之外,其它都係舊款,不過有d棉褲都好平,會員買滿$500仲送多條褲仔tim!

買完野去地庫行左一陣,見到之前賣macaroon既counter變左Mochicream賣雪米糍,不過佢唔係雪到硬果種,介乎雪米糍同糯米糍之間,中間夾左cream同jam,所以要雪住,價錢係$13-$14一個,每個有小紙袋入住,味道都ok啦!我試左Honey cranberry幾好味,甜甜地,個皮都好軟綿綿.

回顧、前望

08年快要完結了,回想過去一年,時間過得好快,呢一年,都好平淡同安穩咁渡過,來年希望能夠平安渡過.祝大家新年進步,身體健康!

今日出左尖沙咀,多人到不得了,買乜都排晒隊,加上天氣凍左,氣氛更加熱鬧.一心想去City super買蘋果乾,超市特別多人,見佢地開多好多個臨時收銀處去疏導d人,不過賣護膚品果邊就無乜人.

買完野見碼頭已經好多人,見國金二期打出2009既字,我都逼埋去影左幾張相,影完諗住坐巴士返屋企,點知臨時取消左車站!!!!

金鳳

有成個禮拜無upload個blog,這個星期過得好平淡,沒怎麽外出,多在家裏休息,昨晚在家裏翻看相片,見到呢張牛扒相,係上次去完廸士尼玩,夜晚同Flora去左太子果間金鳳鋸扒,好多時睇好多雜誌介紹呢間有好多年歴史的餐廳,一直都未去過,呢次就去左試.

間餐廳就在天橋對下的位置,店外貼滿訪問的剪報,入到去好多人,我地坐左個細卡位,近住廚房,見到d鐵版出出入入好busy,果度環境相當舊,牆上的架放了些好殘舊的酒,我們剛坐低已見到有人等位!人客絡繹不絕,枱面既餐墊好住家feel,我叫左牛柳餐,唔記得幾錢,大概八十蚊左右,包埋湯同超細杯飲品,個餐包好舊式茶餐廳味道,個湯都OK,個牛柳好大塊同好"淋",直情唔似係牛扒,唔識點形容,總之好怪,不過食Flora嗰個就唔錯,我唔記得佢個係乜野扒,我諗下次去會叫第二樣野食.

尖東

聖誕快樂!

好幾天沒有上網了,上星期日同屋企人去尖東做節,吃了一半已經開始胃痛,吃不下東西了,走的時候還可以在街影影相,很久沒有去尖東了,以前很熟識的地方都忘記了,行到去羅馬柱就想起在那處影過好些相,回到家裏開始加重了胃痛,想起下午吃的那個午餐大概有些問題吧!匆匆洗個澡便睡覺休息,睡了一陣就開始嘔吐大作,成晚嘔左幾次,無覺好瞓!

第二日仲要返工,夜晚仲要攪活動......我吃了药感到好些,但無胃口食野,傍晚時份同Flora去左尖沙咀買抽獎既禮物,行左幾個鐘,今次我地去LV,無之前咁多人,仲幾好service添,之後去LCX買野,包好晒禮物之後再去旺角同其它人會合,今次我抽到個細獎,係個電動牙刷機,正想買一個,而大獎就比亞文抽中左,阿健就成晚用佢新買果部EOS450D係咁影相,我就成晚有得睇無得食,因為未好返!

尋日同阿天食飯,佢老婆前晚穿左水,等左一日都未生,尋日打左催生針都仲要等,佢好擔心,我都擔心佢會好辛苦,仲要自己在產房等,一定好辛苦..........今朝收到佢SMS,話零晨五點幾開刀生左,佢個仔响平安夜果日出世,想唔記得都難喇..............我就病左幾日,同阿天一樣無乜心機同精神!

王家沙

前兩日出左旺角食飯幫阿天慶祝生日,佢帶埋佢老婆同佢老婆送既相機出來,我地諗住去朗豪坊間上上,但係關左門,唯有轉陣,去左王家沙,之前去又一城果間覺得麻麻地,旺角果間就好食d,我地坐低叫左野食先,再等齊人食,個個都好肚餓,我就覺得醉鷄同生煎包最好味,果個蘿白絲酥好"漏",個東坡肉個樣唔多掂,不過都幾好味,我地一路食一路影相,阿天部新相機係Canon既EOS450D,同我姐夫上個月買既一樣,佢配埋定焦鏡,我地影來影去,我先知原來佢都識影相,我就真係唔識攪,anyway,等我攪得掂自己部半專業機先啦!

地球停轉日 The Day the Earth Stood Still

睇trailer覺得套戲有d似明日之後,睇完都覺有少部份似,都係地球面對末日的來臨,只是加了外星人,開場幾段的氣氛很緊張,音效加上"唔知發生乜野事"令人屏息以待,加上大量電腦特技效果,可謂無乜冷場,奇洛李維斯一貫的冷漠,就如他以往的角色般冷冰,套戲當然少不了加入溫情的元素,不過有d情節都唔太明白,亦無解釋,睇完唔太明,單以特技電影作娛樂,都值得一睇既!

廸士尼雪亮聖誕

睇左廸士尼個廣告好想去玩,前兩日約定Flora一齊去,我地約左去東涌等,食完飯先入去,一入門口,見平時米奇米妮同人影相果個亭,多左張紅色絨布櫈,有個聖誕老人坐左响度同人影相,我地即刻埋去排隊,好快就到我地,個聖誕老人係外國人,佢非常非常nice,好親切,講野把聲好得意,每個人埋去佢都會同你傾一兩句,我好想攬實佢!好warm 既感覺!

影完相一入去d shop,我地瘋狂咁影相,d公仔好得意,d佈置好有氣氛,好浪漫!!!影完相就去左米奇間屋影相,又同d精靈一齊影相,去到同米奇影相既時候,竟然見到舊同事,我地好開心,大家都好surprise!我地一齊同米奇影相,我好鐘意呢張合照,我地笑得好開心,好難忘!

之後我地去城堡前面睇星閃皇家舞會,佢地有三場表演,其中一場是晚上演出,其實三場的表演是一樣的,唯一不同是晚上的城堡做了星閃效果,所以我建意睇夜晚果場,靚d!

話明係雪亮聖誕,入夜後四處閃亮的燈光,成個城堡加了很多燈,很漂亮,最特別係入場時派既眼鏡,用呢個眼鏡睇d圓型既燈光,個光點會變左雪人圖案,好得意,我試吓影又影到喎!不過要拉近d先睇到d雪人. 四週圍既燈都變左雪人,睇得好開心!到睇煙花時,用眼鏡睇,全部煙花都變晒做雪人,我地睇到大聲叫,猛話得意,係咁"嘩" "嘩"聲,我拍左短片,聽返我地講既野,我都覺得好好笑,玩到好疲累!

和亭

前兩日去試左呢間和亭,佢係和民個集團,水準同價錢差不多,只是食物的選擇不及和民多.
最近有點靜和悶,好似個個人都無乜活動,無乜節目,無乜聯絡,就算有通話都係一d好洩氣既說話,好似好多人都無心機或都無心情,唔知係咪股票蝕左錢呢?抑或見到泰國既混亂政局同埋印度911?好似唔見左d開心既心情,真係好想打破呢個悶局,做d開心既野,揾埋成班friend一齊去玩吓!開心吓!希望快d雨過天晴啦!