2026年3月四人福岡自私遊 Day 3 - 由布院、金鱗湖、由布院の森

今朝要一早起身，因為要搭7:43分嘅火車去由布院！因為我遲咗訂巴士券，訂唔到，唯有搭火車就要咁早(開頭驚太早，距離回程嘅車太耐會冇地方去，後來發覺啲時間啱啱好)，我哋又搭的士去博多站，去便利店買早餐，好有一直想食便利店嘅雞蛋三文治，所以今日就可以買嚟食，三文治加咖啡，再帶埋我哋嗰盒努努雞，兩個幾鐘嘅車程就唔使驚肚餓，我哋啲程車係搭普通火車，因為係係自由席，所以我哋一早企咗喺月台排隊，咁可以一上車坐返個好啲嘅位！我哋分開左右兩邊坐，坐第一行，貪佢有張枱，一開車就食三文治飲咖啡，跟住好快就瞓着咗🤣🤣因為今朝好早起身尋晚有夜瞓🤭 瞓咗一陣，仲有成個鐘，就攞盒努努雞出嚟食，又幾好味喎，好香芝麻味，好食！

去到由布院已經10點，一出火車站就去便利店買嘢飲，去廁所(因為火車站個廁所排長龍) 跟住就沿着由布見通り行，我嚟過呢個地方，我記得係一條好長嘅商店街，去到街嘅盡頭就係金鱗湖，所以我哋慢慢行，沿路見到好多嘢食都好吸引，樣樣都想食，所以我哋決定晏晝唔食飯，淨係掃街食嘢，我見到一間賣飲品嘅店，主打Ginger ale，所以買杯飲吓先，仲可以有Extra薑，正呀！走嘅時候要返嚟買支薑糖漿！

我地去左湯布院花卉村，因為我哋想去貓頭鷹館，而好友又想去飄零燕海迪村，兩個地方都係呢度，不過我哋就分開去自己想去嘅地方，我哋三個去咗貓頭鷹館，喺門口買飛嘅時候我見到佢可以玩Cosplay哈利波特場景影相，只需要¥500，咁我梗係要去玩吓啦，入到去先睇貓頭鷹，大部份都可以俾人摸下個頭，唔可以摸嗰啲佢有指示，行咗半個圈見到有一間房，應該就係Cosplay哈利波特場景，因為見到有隻貓頭鷹喺度，呢度要撳掣叫職員，職員嚟到俾500円佢，就可以放低你個袋，着件學院袍同分類帽，戴上厚手套，職員會將貓頭鷹放喺你手腕上，仲可以攞支魔法棒，然後可以用自己嘅手機影相，佢冇特別限時間，我哋都喪影一輪，影影下開始有啲人發現到，就喺門外排隊，即刻就有六七個人排隊，我影完就到好友影，雖然佢唔係哈利波特迷，但係佢志在擺隻貓頭鷹喺手影相，我幫佢有拍片又影相好開心！呢¥500真係好抵，雖然佢冇限時間，不過影完我哋都出返去，因為有條隊喺度等緊😅

我哋喺貓頭鷹館玩咗40分鐘，出到嚟仲未見好友，準備搵佢嘅時候，佢就啱啱好買完嘢，同我預計差唔多，因為日本好少專賣海迪產品嘅地方，所以我預計佢都要搞好耐，時間啱啱好，我哋繼續行，去到金鱗湖，大家係咁意影幾張相，因為個湖又唔係話特別靚，其實呢度主要係住溫泉酒店，但係我哋冇特別安排，因為唔想搬行李，始終唔係自駕，影完相沿返原路出返去，開始掃街及shopping模式！

我哋沿路有買雪糕、烤大蘑菇、炸雞、燒團子等等，我哋去到一間專賣芝麻嘅店舖，入去買咗芝麻產品，因為好香，我就返去買Ginger糖漿，順便買多一杯嚟飲😅我哋又買咗一個好出名嘅B-Speak 忌廉蛋卷，一陣上火車食，我哋搭15:59 由布院之森返博多，諗住仲未天黑可以睇風景，時間控制得啱啱好，去到車站仲有10幾分鐘先開車，所以喺商店買吓手信！去到火車站附近先發覺原來呢度有真馬車😆

上車之後，我哋去咗特別車廂影相，又係提供制服俾你着嚟影相，我哋淨係帶咗頂帽嚟影，仲可以攞一張Postcard蓋印，有紀念品賣，我哋就冇買，因為唔係太啱心水，跟住返番原本嘅位置坐，食埋個蛋卷，跟住大家就瞓着咗，原本坐由布院之森，係貪佢可以喺特別車廂睇風景，但係原來特別車廂唔可以長時間坐，因為個個都可以入嚟，你又唔可以霸住個位，所以純粹係影吓相，因為車飛嘅價錢同正常車只係多少少，而且每日班次有限，所以都冇得揀，最好要預早一個月訂，因為啲位都好緊張！架車行咗半個鐘左右，停咗喺一個叫做豊後森站好耐，原來係可以喺呢個站落車影相，我發現嘅時候已經遲咗，差唔多要開車，所以匆匆忙忙影咗幾張相就上返車！

返到博多都已經六點幾，我哋搭的士去Luz 福岡天神，呢個商場主要係賣運動衫同埋男裝，好友想買對鞋，不過睇唔啱，我就喺附近兜圈，見到一檔屋台，係食法國菜嘅，之前喺網上見到佢都好多人介紹，台只有十二各位左右，但係我見到出面等緊嘅人龍有成四十幾人，如果每一轉食一個鐘，龍尾嗰幾個都要等四個鐘🫣行完呢度，我哋又返番去博多運河城，因為上次睇啱啲嘢，今日唔買驚冇時間，我哋買咗好多包麵，返香港慢慢食🤣

行完街諗住去食飯，原本想食屋台，但係每一檔都好多人等位，喺附近都搵唔到有乜嘢好食，見到有間牛角，所以都費事諗，直接入去食，可能前晚嗰餐燒肉太好味，呢間即刻比下去，啲肉冇咁好食之餘，價錢亦都冇咁抵，食完嘢我哋就搭的士返民宿！返到去好友繼續薯片啤酒😅