又到一年一度嘅美酒佳餚巡禮，今年做四日，嚴格嚟講係三日半，舊年係多一日，今年終於冇咁熱，年年都熱到不得了，今年因為氣溫下降咗，所以舒服好多，約咗好友喺中環等，由地鐵站行過去摩天輪，今年都好多人，我哋入咗去先至買token，好有自己帶咗兩支紅酒入嚟，所以我哋主要係用Token買嘢食，我哋買咗德國腸配麵包、口水雞、迷你漢堡包、青口等等，整體嚟講覺得個收費係平咗，可能其中有一檔任何食物都係一個Token，相對就抵食啲，原本想去嗰間Marco，不過條人龍好長，因為佢最出名係芝士卡邦尼，係即刻喺一大嚿圓形芝士上即撈果隻，但係實在太多人，所以都冇排到，食完嘢我哋又去舞台嗰邊聽吓歌，今年啲歌星都係不知名嘅多，最出名應該係海兒，我哋聽嘅時候係一男一女似係菲律賓人，雖然唔識，不過氣氛都唔錯！
用晒啲Token之後，我哋就行出去海濱嗰邊，行過去金鐘睇巨型海上充氣雕塑，影完相行返出去搭的士，但係就一路都冇車，行到出灣仔搭叮叮去銅鑼灣，又去海底撈食火鍋，同舊年一樣，成班一齊打邊爐，不過夜晚返到去肚痾，唔知係咪湯底太油，定係啲生蠔有問題，另外有兩個好友都有少少肚痾，我諗真係啲生蠔有問題！
沒有留言:
發佈留言