2025年4月東京獨遊 Day 2 - 中目黑、麻布台之丘、銀座

尋晚都幾好瞓，唔知係咪真係飲咗支益力多嘅關係，亦都可能本身好攰😅 今朝都八點幾起身，食唔到酒店嘅免費早餐，今日同天文台預測一樣落雨！☔️ 第一站去中目黑，搭JR總武線一個站去秋葉原再轉 Metro 日比谷線，既然去到秋葉原，順便去6號月台飲支鮮奶，月台入面嗰間”酪”，基本上每次經過都幫襯，今次想試吓佢果支北海道4.2牛奶，可惜佢話冇貨，咁唯有揀北海道4.0 ，好好味！👍🏻

撘日比谷線，足足15個站先去到中目黑，總站落車，一出地鐵站，對面間 I’m Donut 仍然大排長龍，我去搵一間叫做 flour+water 嘅店，聽個名就知係賣麵包嘅店，不過佢有得坐低食嘢，去到嘅時候要等位，我前面有六組人，攞完飛就喺店入面等，因為出面落雨，等左足足45分鐘先有位，呢度原來得一個餐牌，剩係brunch，個brunch包含咗四個麵包，一杯佢哋即刻沖嘅熱茶，另外有啲凍水果茶同埋水可以自己自助攞埋位飲！店員會捧一盤麵包過嚟俾你揀四款，不過呢度店員嘅英文麻麻哋，好在有Google Translate，店員介紹啲麵包都講日文😅，我唯有靠睇樣選擇，四個麵包好似有啲多，所以我其中一款揀咗好鬆嘅白麵包，另外揀咗一個牛角包、咖喱包、菇包，店員攞住壺熱茶每枱去斟，然後擺低張卡介紹呢隻係乜嘢茶，如果你飲晒，佢又會斟第二款俾你，呢度係冇咖啡飲，剩係得茶，我唔知佢原來會咁樣斟茶，所以我自己斟咗杯水果茶同埋一杯水，所以我有三杯飲品😅揀完麵包之後，店員會幫你整返熱，同埋如果啲包食唔晒可以打包，佢都擺咗啲膠袋同埋紙俾人打包用，我見基本上每枱都會打包，因為坐上99%都係女士，正常都食唔晒，我就食得晒四個，當然係好飽😅😅

食完嘢，就行去Starbucks Reserve，今日又唔係好多人，我記得上次走嗰陣係多人到要攞籌，今日就唔見有攞籌個位，可以直接入去，地下就冇乜位，例牌上去Bar嗰層，叫返之前飲過嘅咖啡，過往櫻花季節，店外面嗰條河係會開滿櫻花，當然而家係過咗櫻花季節，但係四月傳統嚟講都係櫻花嘅季節，所以佢哋喺四方形嘅冰上雕咗一個櫻花圖案，真係好有心思😍 因為今朝食咗四個包，所以今次只能夠飲咖啡，唔食野，仲要飲冇奶嘅咖啡，否則會飲唔落🥹 因為落雨嘅關係，佢室外嘅位都冇人坐，因為啲凳係已經濕晒，所以店入面唔算多人，喺度Hea咗陣，就落返地面睇吓有咩 買，今期有好多櫻花產品，但係都唔係特別靚，主要都係啲杯，佢都出咗啲同本地一啲品牌合作嘅杯，價錢都好貴，而且屋企已經好多杯，所以唔會買杯！買咗少少嘢就走！

行返去中目黑站搭返入比谷線去神谷町，因為落雨，所以諗住留喺商場，就去麻布台之丘，呢個area應該係一個比較新嘅商場，我亦都未去過呢個地方，淨係知道佢喺東京鐵塔附近，所以過去睇睇！有地鐵站出嚟已經係麻布台之丘嘅範圍，因為佢係幾個商場連埋一齊，呢度亦都有展覽場地，亦都有一間teamLab，我見到上次喺東京站買過手信嘅 Gin No Mori，旁邊就係teamLab，所以有一班人等緊入場，全部都係外國人，今次嚟日本覺得多咗外國人，少咗大陸人，就算講國語嘅人都係台灣人，一係就香港人！喺商場行咗個圈，見呢度其實唔係好多嘢行，最多人行應該係嗰間叫做尾粂，係賣一啲湯包，亦都可以自選材料，幫你打成粉做湯包，原材料有乾瑤柱、冬菇、魚乾、昆布等等，按重量計算，即刻同你打碎材料做湯包，本來有啲興趣，但係都唔識配搭，所以索性買現成😆揀咗一包，店員仲用國語介紹，行過去Hills House，呢道34樓有間Cafe，可以睇到東京鐵塔，不過上到去見到玻璃窗矇晒，因為落雨有霧，完全睇唔到窗外面嘅景色，所以冇入去幫襯就走咗，因為一心係想影東京鐵塔，喺商場行咗個幾兩個鐘，呢度買嘅嘢都係比較貴價，除咗幫襯頭先嗰間湯包之外，就只係買咗中村藤吉嘅抹茶甜品食😅

在神谷町搭返日比谷線，停一停銀座，一出路面就係日產show room ，去三越度行一行，見到佢有賣一隻特別版藍色盒嘅薯條三兄弟，只限呢度訂貨後在機場攞貨，本身都有啲興趣，但係驚佢唔知係過關前定過關後先至有得攞，所以都係考慮吓先，跟住上左去Food hall 果層，食返個鰻魚飯。呢間叫傋長，應該之前食過，叫左三膳目set，有三種食法，好食👍🏻👍🏻

食完飯行過9樓，見有個Art aquarium museum，之前在網上見過有人介紹，見佢仲有一個鐘頭時間，所以入去睇吓，入面有好多金魚，放咗喺唔同嘅裝置，加埋燈光同埋音響，都幾特別有少少teamLab feel，睇完呢個展覽，就返酒店！

返到酒店放低啲嘢，就落去浸浴，今晚得我一個，可以自己包晒成個場慢慢浸，出一身汗代替運動，浸完上去瞓覺都幾好瞓！