今次又撘零晨機，飛到日本6:40，過埋關去到火車站已經7:45 ，買最快火車飛要8:15 開出，呢度又冇乜野行，之前有間Starbucks 依家冇左😅，得返一間好細便利店和松本清，仲有間Doutour ，去松本清望吓，睇定D藥妝價錢，再去月台等，今次在自助售票機買，唔知咩原因只係三千幾円，入閘果陣過唔到，職員話要有張basic ticket ，最後都係要去售票counter 搵職員攪過，遊客正常有¥5,000來回飛優惠，唔知自助機點買到basic ticket，好左提早入閘可以夠時間攪，而且剛好唔使排好長隊，先趕得切上8:15班車！去到東京站轉總武線，在月台等等吓見咁耐冇車，先發現改左去另一月台，去到又剛走左班車，好在4分鐘後有車！
搭三個站去到錦糸(絲)町，今次住呢度，好近Skytree，先去酒店放低行李，再出發去清澄白河！
之前一直想去清澄白河，聽講呢度有點文青feel ，正常在錦糸町搭半藏門線兩個站就到，但我搵唔到個地鐵入口，所以行左去下一個站吉住駅撘(後來回程才找到入口原來在JR站前面的一座大廈旁😅因為Metro 嘅招牌通常較細)搭一個站到清澄白河，呢度其實係住宅區，只有一個好大嘅公園，而所謂的文青小店都好散，唔係集中一個Area，路過一間賣米的小店幾特別，再行入D橫街，有少少特色店但未開，見到之前杜如風介紹過賣北海道芝士果間店，行到肚餓想搵野食，在地圖上只顯示到Blue bottle 咖啡店，因為肚餓。所以都係去食少少野😅
呢間Blue bottle 似係兩層高，實際樓上冇開(可能唔多人所以唔開啩！叫左杯cold brew 加件芝士烤包，見佢D商品都幾靚，考慮吓先，仲有時間！
醫肚後，去搵深川江戶資料館，頭先在地鐵站有介紹，所以睇吓，街口有間賣茶的店，轉頭去睇吓，呢間深川江戶資料館，主要介紹江戶時代的歴史，而入口有個小型展覽，介紹緊一個相樸手的歴史，要入內參觀，要比入場費¥400，入到去係搭建左幾間江戶時代的建築物，如果你係團體會有人用日文介紹，我就影吓相，睇吓video 。睇完出返去，就去賣茶葉果間Teapond，試”聞”左幾款茶葉，就買左少少做手信！
跟住行去清澄庭園，呢個庭園入場費¥150，地方好大，都幾靚，真係日式庭園咁，中間有個大水池，可惜冇得餵魚🥹
行完公園，撘都營大江戶線去築地，今次諗住去海玄睇吓有冇位，冇就去食壽喜燒，去到海玄剛好2:00，佢哋收3:00，last order 2:30，而且冇人等位，可以直入，呢間店每次經過都勁多人等位，店內約有30個位，主要係食拖羅，呢個鐘數雖然冇乜人，但係有D野都賣晒，不過拖羅一定有，我叫左一個中拖+赤身的set，雖然係中拖但厚切，所以好飽D飯食唔晒😅坐隔離個男仔，食兩款拖羅set 仲添左兩碗飯，勁😅
呢個鐘數嘅築地，店舖都要關門了，所以冇乜人，去米本咖啡買咖啡豆，再行去築地市場站搭車，經過以前場內市場個位，見到有未來建築計劃，好似幾好，應該要十年八載之後先睇到，依家仲係爛地一塊😅
去築地市場站搭都營大江戶線去返清澄白河轉半藏門線返去錦糸町，先至搵到地鐵站入口！去附近果間Parco 行吓，睇定D藥妝，又去地庫超市，買左香蕉🍌同士多啤梨🍓，又買在個type C 轉換插，同埋一pack 益力多1000，話可以改善睡眠質素，今晚要試一試佢，一pack有六支，啱啱好每日一支，行返去酒店check in 先，今朝攪左check in 手續，攞返件行李就上房，放低野就出去食野，去左附近一間食燒鳥嘅店，叫做比內地雞炭火燒，叫左個5串拼盤，另外叫咗一串雞腿肉，同埋一串雞肝，店員話我獨立叫果串雞腿肉係生嘅，只係燒一燒個表面，問我O唔OK，我原本仲想叫雞肉刺身，咁既然呢個係刺身級別，我就唔再另外叫刺身，果五串拼盤，原來其中一款係雞pat pat，佢話賣晒，改做免治雞肉串，咁就最好啦，因為我都唔食雞pat pat，另外嗰四串分別係雞肉、雞翼、雞皮、雞肉大葱，雞肝都係半生熟，燒得幾好，好食，另外嗌咗杯梅酒，好快俾我飲晒，所以要叫多一杯😂食完就去酒店樓下嗰間Lawson 行吓，見到好多嘢都想買，呢幾日大把時間慢慢買！今晚早啲返酒店，去浴場浸一浸浴，然後早啲瞓，始終凌晨機，尋晚到而家舟車勞頓都好攰！
酒店住後感：
錦糸町站前超級酒店 Super Hotel Kinshicho Station
今次book咗五晚呢間酒店，第六晚就去秋葉原，錦糸町站都係第一次嚟，呢度其中一條馬路，可以望到Sky Tree，地鐵站都有指示，往Skytree方向，就係去酒店嘅方向，地鐵站嗰度寫住行去Sky Tree要20分鐘，而且見到呢度都有一架循環巴士，係可以去押上，呢個地鐵站都幾熱鬧，附近有Parco、丸井(OIOI)、Life 超市、Daiso、Donki、由火車站行去酒店大概五分鐘，酒店樓下已經有Lawson，行個少少都有7–11 同Aeon超市，不過呢個站得三條火車線經過，出去其他地方多數要轉車，如果東京站、新宿、渋谷、秋𦳑原呢D大站還是可以直到！
酒店亦都有提供一個碳酸水浴場，接待處喺2樓，浴場都喺2樓，酒店會提供免費早餐，但係要九點前，酒店嘅房間係用密碼，而女性嘅浴場都係需要入密碼，而且講明密碼會每日改，房間嘅空間唔多，不過佢張枱都幾大，張凳仲係有碌嘅，同張床都有個距離，唔使坐喺床邊，窗簾嘅遮光度都好勁，拉埋之後，早上都係唔透光，房間都算新淨，而且乾乾淨淨，同之前住東京嗰間Super Hotel一樣，可以自選枕頭，因為房入面個枕頭係一個好長嘅枕頭，而且都幾厚，接待處都有提供護膚品旅行裝一包包果啲可自取，當然房入面都已經有洗頭水沐浴露，牙膏牙刷，我有去浴場浸浴，地方好細，只有四個沖涼嘅位置，個池有兩邊，每邊可以坐兩個人，如果係熟人可以坐迫啲，都坐到三個人，我去到嘅時候得我一個人，後來多咗一個住客，個碳酸水浴池，有個牌寫住功效，還可以改善肩痛，咁就真係要試一試，浸浴後上返房，早D瞓😴😴😴😴
沒有留言:
發佈留言